Ինտրիգը պահում են

Հայաստանի հանրապետական կուսակցությունը և Դաշնակցությունն այսօր կոալիցիոն հուշագիր ստորագրեցին: «Հուշագրի կնքման համար հիմք են հանդիսացել նոր Սահմանադրությունը, նախորդ կնքած կոալիցիոն հուշագիրը, մեր կուսակցությունների նախընտրական ծրագրերը, ինչպես նաև Ազգային ժողովի վերջին ընտրությունների արդյունքները։ Կոալիցիայի հիմնական ուղղություններն են լինելու՝ մարդը, հասարակությունը և պետությունը», - հուշագրի ստորագրմանը հաջորդած ճեպազրույցին ասաց ՀՀԿ փոխնախագահ Արմեն Աշոտյանը։ՀՅԴ Հայաստանի Գերագույն մարմնի ներկայացուցիչ Աղվան Վարդանյանն էլ նշեց, որ այս համաձայնագիրն ընդգրկելու է 6-րդ գումարման Ազգային ժողովի ամբողջ ընթացքը՝ մինչև 22 թվականը։«Երեք հիմնարար արժեքներ են դրված մեր համագործակցության հիմքում, առաջինը՝ Հայաստանի և Արցախի ընդհանուր անվտանգությունը, տնտեսությունը և տնտեսության կարգաբերումն ու զարգացումը, երրորդը՝ երկրում որակական, արմատական փոփոխություններ անելու համատեղ վճռականությունը», - ասաց Վարդանյանը: Քաղաքագետ Ստյոպա Սաֆարյանին հուշագրի ստորագրումը առանձնապես չի զարմացրել․«Դա մի բան էր, որին բոլորը սպասում էին դեռեւս խորհրդարանական ընտրություններից առաջ, հետեւաբար չեմ կարծում, թե կարելի է շատ մեծ սպասելիքներ ունենալ նման կանխատեսելի հուշագրից», մեզ հետ զրույցում ասաց քաղաքագետը։ Ինչին է պետք իշխող Հանրապետականին նոր խորհրդարանում 7 հոգանոց խմբակցություն ունեցող Դաշնակցությունը, հարցին Ստյոպա Սաֆարյանը պատասխանեց կարճ․«Թերեւս միայն մեկ բանի համար՝ Հայաստան-Սփյուռք կապերի», ասաց նա ու հիմնավորեց․«Այնուամենայնիվ ՀՅԴ-ն Սփյուռքում միակ լավ կազմակերպված քաղաքական ուժն է»։ Նկատենք սակայն, որ սփյուռքյան կառույցները վերջին տարիներին երես են թեքել ոչ միայն ՀՀ իշխանություններից, այլեւ հենց Դաշնակցությունից, մինչեւ անգամ հրաժարվում են ներդրումներ կատարել ։ Ստյոպա Սաֆարյանը միեւնույն է նկատում է, որ ՀՀ բոլոր իշխանությունները լավ գիտեն՝ ուզեն, թե չուզեն ՀՅԴ-ն է Սփյուռքում միակ կազմակերպված ուժը․«Ամեն դեպքում ՀՅԴ-ն գործոն է եւ այս կոալիցիան ձեւական չէ»։ Կոալիցիոն հուշագրում, ի դեպ, վարչապետի թեկնածության հարցը դուրս է մնացել փոխհամաձայնությունից, և այն թողնված է բացառապես ՀՀԿ որոշմանը: Այսինքն՝ Դաշնակցությունն այդ հարցում թերեւս լինելու է Սերժ Սարգսյանի դաշնակիցը ։ Անդրադառնալով վարչապետի հարցի վերաբերյալ փոխպայմանավորվածության բացակայությանը Ստյոպա Սաֆարյանը նշեց․«Սա նշանակում է, որ գիտակցված, թե չգիտակցված այդ հարցը բաց է թողնվում եւ ինտրիգը պահպանվում է։ Իհարկե, Կարեն Կարապետյանը արդեն հայտարարել է, որ ինքը պատրաստ է լինել նաեւ վարչապետ 2018 թվականից հետո, բայց այս հուշագրից ակնհայտ է, որ նրանք չեն շտապում այդ մասին հայտարարել»։ Նշենք, որ կոալիցիոն հուշագրում ամրագրված է նաեւ, որ «Քաղաքական կոալիցիայի կողմերի միջև սկզբունքային տարաձայնությունների առաջացման դեպքում դրանք լուծվում են բանակցությունների միջոցով: Բանակցությունների միջոցով համաձայնություն ձեռք չբերելու դեպքում կուսակցություններից յուրաքանչյուրը, մյուս կողմին գրավոր տեղեկացնելով, կարող է դուրս գալ կոալիցիայից»: Անի Սահակյան