Նիկոլ Փաշինյանի հերթական ապտակը Արմեն Սարգսյանին

Նիկոլ Փաշինյանի թիմը որոշել է մինչեւ վերջին խազը վարկաբեկել Հայաստանի հանրապետության նախագահի աթոռին բազմած մարդուն՝ Արմեն Սարգսյանին։ Իմ Քայլը այսօր խմբակցության նիստ է հրավիրել, քննարկել են Սահմանադրական դատարանի թեկնածուների ընտրության հարցը։ Շատերը դեմ են եղել նախագահի թեկնածուին։

Դռնփակ նիստից հետո պատգամավոր Նիկոլայ Բաղդասարյանը լրագրողներին հայտնեց, որ խմբակցությունում առաջադրած թեկնածուների վերաբերյալ միասնական դիրքորոշում չունեն: Այդուհանդերձ, ՀՀ նախագահի թեկնածուին «Իմ քայլը» դեմ է: «Այսինքն՝ եթե ես քվեարկել եմ մի ձևով, ես նույն ձևով կքվեարկեմ նաև այսօր կամ վաղը: Ի վերջո, այդ մարդու չափանիշների, մարդու կյանքի մեջ ոչ մի բան չփոխվեց: Անհասկանալի է նախագահի այն քայլը, որ առաջադրում է նույն մարդուն՝ հասկանալով, որ ընտրողը նույնն է, և այդ ընտրողն արդեն իր որոշումը կայացրել է, և այդ որոշման փոփոխության գործակիցներ նախագահը չի ներկայացրել: Ես պետք է հասկանամ, թե ինչու այն ժամանակ այնպես եմ որոշել, իսկ հիմա այլ կերպ եմ որոշում»,- պարզաբանեց նա:
Հիշեցնենք՝ նախագահ Արմեն Սարգսյանը Սահմանադրական դատարանի դատավորի պաշտոնում առաջադրել է Արթուր Վաղարշյանի թեկնածությունը: 2018թ. ապրիլի 9-ին իր պաշտոնը ստանձնելու օրվանից մինչև 2019թ. մայիսի 30-ը ՀՀ նախագահն Ազգային ժողովին է ներկայացրել Սահմանադրական դատարանի դատավորի 5 թեկնածու ։ Առաջադրվածներից մեկն էլ Արթուր Վաղարշյանն էր, ում թեկնածությունն ԱԺ-ն 2019թ. մայիսի 29-ին մերժել էր:
Իմքայլականները Արմեն Սարգսյանի այս առաջադրումը որակել են իրենց ուղղված մարտահրավեր։
Կարծիքներ են փոխանակել, որ չպետք է կուլ տալ այս անարգանքը եւ միաձայն դեմ քվեարկել նախագահի ներկայացրած եւ իրենց կողմից մերժված թեկնածուին։

Արմեն Սարգսյանն ամեն ինչ անում է՝ աջակցելու Նիկոլ Փաշինյանի հակաօրինական, հակասահմանադրական ծրագրերը, դրա վառ ապացույցը Սահմանադրական դատարանի դեմ ընթացող ասպատակություններն էին, որոնցում իր բաժին ունի նաեւ Արմեն Սարգսյանը։ Թվում էր, թե Նիկոլ Փաշինյանը նրան հնարավորություն կտա ՍԴ-ում ունենալ իր ցանկալի մարդուն, բայց արիուտես, որ Արմեն Սարգսյանին այս իշխանությունը դիտարկում է բացառապես կամակատարի դերում, ով պարտավոր է ամեն ինչ անել իրենց համար, բայց ոչինչ չստանալ։ Մեծ հաշվով կյանքում էլ է այդպես, ծառայամիտներին երբեք չեն գնահատում, հատկապես Արմեն Սարգսյանի դեպքում, ով ունի լեգիտիմության խնդիր եւ նրա քաղաքացիության հարցն այդպես էլ մնաց չբացահայտված անգամ նոր իշխանությունների ժամանակ։ Նիկոլ Փաշինյանը իշխանության գալուն պես հանդիպեց Արմեն Սարգսյանի հետ, հայտարարեց, որ տեսել է նրա քաղաքացիության փաստաթղթերը, բայց դրանք մնացին չհրապարակված՝ կրկին արդիական թողնելով այդ հարցը։
Արմեն Սարգսյանը ըստ էության ողջ կյանքը պարտական է մնալու Նիկոլ Փաշինյանին եւև պարբերաբար ստիպված է լինելու կուլ տալ այն անարգանքը, որը կդրսեւորեն իր նկատմամբ։

Մյուս կողմից՝ իմքայլականների «սկզբունքայնությունը» իսկապես հիացմունքի է արժանի, փաստորեն կարելի է ընտրել Սերժ Սարգսյանի տարիներին իրավական համակարգը կառավարողի, Նիկոլ Փաշինյանի եւ Մարտի 1-ի գործով մնացած քաղբանտարկյալների վճիռները կայացրած մարդու որդուն, կամ Վճռաբեկի նախագահին, բայց չի կարելի ընտրել մի իրավաբանի, ով անցյալում ընդամենը դասախոսական աշխատանքով է զբաղված եղել ու մերժվել է ամենակարող իմքայլականների կողմից՝ քաղաքական նպատակահարմարությունից ելնելով։

Անի Սահակյան