Դաշնակցական հանրապետականներ. ովքեր են նոր նախարարները

Այսպիսով, ենթադրվում է, որ Դաշնակցության քվոտայով ՀՀ կրթության եւ գիտության նախարար կնշանակվի Լեւոն Մկրտչյանը, ՀՀ Էկոնոմիկայի նախարար` Արծվիկ Մինասյանը, իսկ Դավիթ Լոքյանն էլ կդառնա ՀՀ տարածքային կառավարման նախարար: Թեկնածուների փոփոխության հավանականությունը գոնե այս պահի դրությամբ քիչ հավանական է ու այլ կերպ պատկերացնել նույնիսկ հնարավոր չէր: Կարելի է արձանագրել, որ տեղի է ունենալու մի համագործակցություն, որով իշխանությունը համաձայնություն է հայտնելու ոչ թե որոշակի մասնաբաժին Դաշնակցությանը հանձնելու հարցում, այլ իշխանությունն իր շարքերն է ընդունելու յուրայիններին, որոնք հանդես են գալիս այլ քաղաքական ուժի անվան տակ: Համենայն դեպս, Դավիթ Լոքյանի ու Լեւոն Մկրտչյանի հարցում սա անհերքելի իրողություն է, սույն անձինք քաղաքական շրջանակներում անգամ հայտնի են իբրեւ դաշնակցական-հանրապետականներ: Ու չնայած մամուլում հայտնված տեղեկությունների, որ թեկնածուների ընտրության հարցը կռիվ է գցել նաեւ ՀՅԴ-ի տունը, որտեղ իրավիճակի գնահատականից ելնելով նեղսրտել են, որ ոչ թե իշխանությունից զիջում են կորզում, այլ <<կորցնում>> են ակտիվ կուսակցականների, այդուհանդերձ,  որոշումը չի բեկանվել: Այսպիսով ովքեր են Դաշնակցության ապագա նախարարները, ինչ կեսագրություն ունեն, միանգամից ասենք, որ նշված երկուսը տարբեր ժամանակներում ավելի շատ իշխանության աթոռներն են զբաղեցրել: Մասնագիտությամբ քիմիկոս-կենսաբան Դավիթ Լոքյանի քաղաքական կարիերան սկսվել է 1998 թվականից, երբ Հայաստանում տեղի ունեցած փետրվարյան հեղաշրջումից հետո ՀՅԴ-ն մտավ Ռոբերտ Քոչարյանի հովանու ներքո՝ դառնալով վերջինի քաղաքական հենարանը: Լոքյանը նույն տարում զբաղեցրեց Լոռու մարզպետի տեղակալի պաշտոնը: Ի դեպ, հենց փոխմարզպետի պաշտոնում աշխատած տարիներն են միայն, որ համարվում են Լոքյանի աշխատանքային կարիերայի լուսավոր էջերը, ասում են, որ նրա շնորհիվ գազիֆիկացվեց Վանաձորը: 1999-ի մայիսի 30-ի ԱԺ ընտրություններում Լոքյանին հաջողվեց մեծամասնական ընտրակարգով պատգամավոր դառնալ: Երկու տարի անց պատգամավորական աթոռից արդեն ցատկ կատարեց նախարարականի, Լլոքյանը նշանակվեց ՀՀ քաղաքաշինության նախարար: 2003 թվականի նախագահական եւ ԱԺ ընտրություններից հետո Ռոբերտ Քոչարյանը կրկին կոալիցիա ձեւավորեց, նոր կառավարությունում Լոքյանը գյուղատնտեսության նախարարի պաշտոնին էր: Նա այդ պաշտոնում երկու անգամ վերանշանակվեց` 2007-ին եւ 2008-ի ապրիլին: Ի դեպ, վերջին անգամ Դավիթ Լոքյանը գյուղատնտեսության նախարար վերանշանակվեց 2008-ի նախագահական ընտրություններից հետո ձեւավորված իշխանական կոալիցիայի շրջանակներում, երբ Մարտի 1-ի արյունալի իրադարձություններից հետո ՀՅԴ-ն չխորշեց իշխանության հետ պատասխանատվություն կիսել: ՀՅԴ-ական Դավիթ Լոքյանը Սերժ Սարգսյանի «լյուբիմչիկներից» է,ավելին, նրա թղթախաղի ընկերը, Հովիկ Աբրահամյանի ամենամտերիմ մարդկանցից մեկը: Ասել կուզի՝ համաձայնությունը կայացվել է մի անձի վերաբերյալ, որ ոչ այնքան ՀՅԴ-ական է, որքան իշխանությանը սերտաճած մեկը, որն աչքի է ընկնում տնտեսական իր հետաքրքրությամբ ու դրանով դարձել է իշխանության «խաղի կանոներով» առաջնորդվող անձ եւ ամենակարեւորը՝ կառավարելի: Լոքյանն ամենաձախողած նախարարներից մեկն է, որի նպատակը միայն հարազատներին նախարարությունում աշխատանքի տեղավորելն էր, թե ինչպես է նա գլուխ հանելու ծանր պաշտոնում, դեռեւս հարց է: Նրա որդին՝ Սերգեյ Լոքյանը, ի դեպ, Հովիկ Աբրահամյանի խորհրդականն է, որն Օպերայի հարևանությամբ «Լուբրանո» կոչվող ռեստորանային մի համալիր է բացել, տնօրինում է ուրիշ բիզնեսներ եւս: Ի դեպ, Լոքյանն իր հարստությունը կուտակեց հենց գյուղնախարարի պաշտոնում գտնվելու տարիներին, որքան վատանում էր գյուղացու կյանքը, այնքան  լավանում Լոքյանինը: Մասնագիտությամբ պատմաբան Լեւոն Մկրտչյանն էլ չորրորդ ժամկետն է, որ կղեկավարի Կրթության ոլորտը. առաջին անգամը 1998-1999թթ է եղել, որից հետ մեկ տարի աշխատել է վարչապետի խորհրդական՝ ՀՀ կրոնի գործերի պետական խորհրդի նախագահի պաշտոնակատար, 2000-2001թթ. ՀՀ արտաքին գործերի նախարարի տեղակալ, 2001-2003 թթ. կրկին ԿԳՆ, դրանից հետո երեք տարի Մկրտչյանը ԱԺ պատգամավոր է եղել. 2006-ի մայիսից նորից ԿԳ նախարար, վերջին տարիներին մամուլում բազմիցս էին տեղեկություն հայտնվում, թե Մկրտչյանը դիվանագիտական կորպուսում նոր աշխատանք կստանա, կամ կզբաղեցնի ԱԽ քարտուղարի պաշտոնը, որը թափուր է Արթուր Բաղդասարյանի հեռանալուց հետո, ասել կուզի՝ Մկրտչյանը փաստացի մշտապես եղել է իշխանության դիտակետում, եթե չասենք իշխանության կողքին, նա էլ Սերժ Սարգսյանի սիրելիներից է, Լեւոն Մկրտչյանի ու նրա եղբոր հյուրանոցային համալիրի ու խաղատների մասին բոլորը գիտեն:ԿԳ նախարար աշխատած տարիներին Լեւոն Մկրտչյանը մի այսպիսի միտք էր արտահայտել, թե միասնական քննությունները նպաստելու են, որպեսզի կոռուպցիան ծանրանա կենտրոնացված քննությունների վրա: Ստանձնելով կրթության ոլորտի ղեկավարման ղեկը, հետաքրքիր է՝ այս հարցում ո՞րն է լինելու Մկրտչյանի առաջին քայլը: Ինչպես նաեւ, նրա նախարարության տարներին էին լուրեր շրջանառվում, որ ընդունելության քննություններին աստղաբաշխական գումարներ են պտտվում, տեսնենք այսուհետ ինչպես կլինի...Քիչ թե շատ անկախ կարգավիճակ ունի Արծվիկ Մինասյանը, որի` Հովիկ Աբրահամյանի մտերմության մասին քաղաքական միջանցնքներում չեն դադարում խոսակցությունները: 1990-1995թթ. սովորել եւ գերազանցությամբ ավարտել է Երեւանի պետական համալսարանի տնտեսագիտության ֆակուլտետը` ստանալով տնտեսագետ-մաթեմատիկոսի որակավորում, ունի նաեւ իրավաբանի կրթություն: 1996-1999թթ. աշխատել է ՀՀ ֆինանսների եւ էկոնոմիկայի նախարարությունում որպես մասնագետ, բաժնի պետ, վարչության պետ: 1998թ. սկսած դասախոսում է Երեւանի պետական համալսարանի տնտեսագիտության ֆակուլտետում: 1999-2000թթ. ՀՀ վարչապետի որոշմամբ նշանակվել է ՀՀ արժեթղթերի շուկայի տեսչության պետի տեղակալ: 2000-2005թթ. ՀՀ Նախագահի հրամանագրով նշանակվել եւ աշխատել է ՀՀ արժեթղթերի հանձնաժողովի անդամի պաշտոնում: Արդեն երկու ժամկետ է ԱԺ պատգամավոր է ու ՀՅԴ նախարարացուների մեջ միակ թարմ դեմքը: Անի Սահակյան