Շտապօգնություն Ելք-ին իշխանությունից
Ինչպես ապրիլի 2-ի խորհրդարանական ընտրությանը նախորդող վերջին օրը, այնպես Երեւանի ավագանու ընտրության նախօրյակին աննախադեպ թեժ մթնոլորտ է ստեղծվել Ելք դաշինքի շուրջ, որը տարբեր շրջանակներում կասկածների տեղիք է տալիս։Ելք դաշինքի ցուցակը գլխավորող Նիկոլ Փաշինյանին պատկանող լրատվամիջոցը երեկ գիշերը ահազանգեց, որ Տարոն Մարգարյանի Արարատյան զանգվածի Կուրղինյան փողոցում գտնվող շտաբում ընտրակաշառք բաժանելու փաստ է արձանագրվել,փաստն արձանագրել է «Հայկական ժամանակ» օրաթերթի լրագրողը։ Այսօր ընտրակաշառք բաժանելու փաստի բացահայտման բուռն մթնոլորտը շարունակվեց Կոմիտասի պողոտայում, որտեղ գտնվող Տարոն Մարգարյանի շտաբի ներսում կրկին նույն տեսարանն է եղել, շտաբի մեջ 20 հոգի կանգնած են եղել, մի քանի հոգի նստած եւ սեղանին նրանց առջեւ ինչ-որ ցուցակներ են դրված եղել, ազգանուններ են հնչել: Շտաբի անդամները նկատելով, որ այլ անձ կա տարածքում պահանջել են դուրս գալ շտաբի տարածքից պնդելով, որ մասնավոր տարածք է: Այնուհետու բռնությամբ հեռացրել են լրագրողին սենյակից, փորձել են նաեւ հեռախոսը խլել: Այդ շտաբ է տեղափոխվել Ելք-ի թիմից բազմաթիվ կազմ Նիկոլ Փաշինյանի գլխավորությամբ, արդեն մի քանի ժամ է այդ շտաբում ոստիկանների, շտաբի անդամների եւ ընդդիմադիր ուժի ներկայացուցիչների միջեւ բուռն բանավեճ է ընթանում, լարված մթնոլորտ է ստեղծվել։ Ապրիլի 2-ի խորհրդարանի ընտրություններից մեկ օր առաջ Մալաթյա-Սեբաստիա վարչական շրջանում գտնվող Ելք-ի շտաբներից մեկում տեղի ունեցած միջադեպը դեռեւս չի մոռացվել։ Արթուր Այվազյանը, որը հանրությանն առավել հայտնի է Մանախ մականունով եւ որը 15 տարվա ազատազրկման էր դատապարտված եղել Հոկտեմբերի 27-ի գործով կարևորագույն վկայի սպանությունը պատվիրելու և իրագործելու համար, ազատության մեջ էր հայտնվել այդ միջադեպից շաբաթներ առաջ , ըստ Ելք-ի մտել էր իրենց շտաբ եւ զենք պահել շտաբի ներկայացուցիչների վրա։ Վերջիններս վնասազերծել էին Մանախին եւ այդ միջադեպը վերջին օրով ակնհայտ բարձրացրեց դաշինքի վարկանիշը՝ տպավորություն ստեղծելով, որ իշխանության համար թիվ մեկ վտանգ ներկայացնող ընդդիմությունը Ելք-ն է։ Իհարկե, անհայտ մնաց, թե ինչու իշխանությունների հետ առանձնապես ոչ բարիդրացիական հարաբերություններ ունեցող Մանախը հանկարծ դարձավ իշխանության պաշտպան, բայց դա կարեւոր չէ։ Ելք-ի հանդեպ իշխանության բարիդրացիությունը նկատելի դարձավ դեռ խորհրդարանական ընտրությունների քարոզարշավի ընթացքում, երբ Արցախ այցի ժամանակ Սերժ Սարգսյանի նախընտրական գործընթացներին կատարած հպանցիկ ակնարկում հատուկ անդրադարձավ այս դաշինքին։ Սերժ Սարգսյանը առանց անուններ տալու քննադատեց «շենքերի տանիքներ մագլցող» ընդդիմադիրներին, որը փաստացի այս ուժի քարոզչությունը դարձավ։ Երեւանի ավագանու ընտրություններին առավել քան Ելք-ին աջակցություն էր հարկավոր։ Նիկոլ Փաշինյանի 15 հազար դրամների հայտարարությունից հետո քաղաքագետներն ու վերլուծաբանները ընտրության ավարտ ազդարարեցին, քանի որ ընդդիմության լիդերի կողմից խրախուսվեց ընտրակաշառքը, միայն թե դա փաթեթավորվեց «քաղաքակիրթ» տարբերակով ու հետընտրական ժամկետում։Հիշեցնենք, որ Փաշինյանը խոստանում է հաղթանակի դեպքում 15 հազար դրամի չափով սոցիալական աջակցություն տրամադրել այն քաղաքացիներին, ովքեր հրաժարվել են ընտրակաշառքից: Սա նշանակում է, որ իշխանությունը Երեւանի ավագանու մասնակից ընդդիմադիր ուժերից նախընտրում է Ելք-ին, որի վարկանիշը Զարուհի Փոստանջյանի ղեկավարած Երկիր Ծիրանիի նկատմամբ ակնհայտ իջել է։ Անի Սահակյան