Բուժաշխատողն ահազանգում է անմարդկային պայմանների մասին

Արդեն մի քանի ամիս շարունակ երկրում կարեւոր դերակատարում ունեցող բուժաշխատողները հայտնվել են սոսկալի վիճակում՝ քայքայված առողջություն, նյարդեր, գերհոգնածություն, իսկ ամիսների իրենց նվիրման դիմաց ստանում են շարքային աշխատավարձ:

Մեր խմբագրություն է ահազանգել բուժքույրերից մեկը, ով աշխատում է կորոնավիրուսի համար մասնագիտացված հիվանդանոցներից մեկում, եւ ցանկանում է պատկան մարմինների ուշադրությունը սեւեռել մոռացության մատնված բուժաշխատողների վրա: Հասկանալի պատճառներով տիկնոջ անունը չենք հրապարակում, միայնակ մայրը ընտանիք պահելու խնդիր ունի եւ չի ցանկանում թեկուզ 70-80 հազար դրամ աշխատավարձից զրկվել: Արդեն զրկվել է առողջությունից, իմունիտետն է թուլացել, գլխացավեր ունի, մազաթափություն է սկսվել. <<Հնարավոր չի ամբողջ օրը ցելաֆոնե արտահագուստի մեջ մնալ, այն էլ մի քանի շերտ, մարդիկ մեկ դիմակ չեն կարողանում կրել բաց տարածքում, մենք ստիպված ենք երկուսը կրել՝ ռեսպերատոր եւ սովորական, դուք պատկերացնում եք այդ արտահագուստի մեջ եւ երկու դիմակով ուղիղ քսանչորս ժամ մնաք, այն դեպքում, երբ դրսում 38-40 աստիճան է>>:

Բուժքույրն ասում է, որ բոլորի մոտ անխտիր մաշկային խորը ցան է առաջացել.<<Մեր մարմինը կարծես եփված լինի, ամբողջը ցան, ջուր է դուրս տալիս, ոնց որ գրիլ լինենք>>: Կարծում է, որ ամռան ամիսներին պետք է հերթափոխի ժամանակահատվածը կարճացնել.<Ֆիզիակապես ուղղակի հնարավոր չէ 24 ժամ շարունակ մնալ այդ հագուստի մեջ>>: Ավելին նրա կարծիքով եթե ՀՀ իշխանությունները դիմակային աշավ չսկսեին եւ թույլ տային դիմակ չկրել, կորոնավիրուսն ավելի շուտ կնահանջեր: Ասում է՝ գոնե ամռան ամիսներին պիտի բաց թողնեին, հանրային իմունիտետ ձեւավորվեր.<<Միգուցե աշնանն այլեւս նոր սրացումներ էլ չունենայինք>>: Մեր զրուցակցի համար պատկան մարմինները անհասկանալի քաղաքականություն են վարում.<<Տպավորություն ունեմ, քանի Արսեն Թորոսյանն ու Տիգրան Ավինյանը կան իրենց պաշտոններում, Հայաստանում կորոնավիրուսը չի նահանջելու>>:

Ուշագրավ է, որ արդեն մի քանի ամիս է բուժաշխատողները չեն ստանում կորոնավիրուսի համար հատկացվող հավելավճարը: <<Չորս օրը մեկ հերթափոխով աշխատու եմ եւ մեկ հերթափոխի համար ստանում 10-12 հազար դրամ աշխատավարձ, ճիշտ այնքան, որքան սովորական պայմաններում>>:

Հավանաբար իշխանությունները կորոնավիրուսի համար վերջերս մասնագիտացված բուժհաստատությունների աշխատակիցներին հարկ չեն համարում հավելյալ վարձատրել, այդ գումարը իրենց պարգեւավճաների ֆոնդին կուղղեն, մարդիկ երեք ամիս պարգեւավճար չեն ստացել, համաձայնեք ծանր ու դժվարին բան է երբեմնի գործազուրկների համար ապրել միայն չոր աշխատավարձով՝ առնվազն կես միլիոն դրամով:

Անի Սահակյան