Ում գլուխը կթռնի կորոնովաիրուսի դեմ պայքարի տապալման համար

 Նախորդ շաբաթ Իտալիայի կառավարությունն իր պաշտոնական կայքում ներկայացրել է այն երկրների ցանկը, որտեղ վերջին 14 օրերին եղած մարդկանց մուտքն Իտալիա կարգելվի մինչև հուլիսի 31-ը: Ռիսկային երկրների ցանկում ներառվել է նաև Հայաստանը:

«Հուլիսի 9-31-ն արգելվում է Իտալիա մուտք գործել ցանկացած անձի, որը վերջին 14 օրերին գտնվել է կամ անցել է հետևյալ երկրներից մեկով. Հայաստան, Բահրեյն, Բանգլադեշ, Բրազիլիա, Բոսնիա և Հերցեգովինա, Չիլի, Կոսովո, Քուվեյթ, Հյուսիսային Մակեդոնիա, Մոլդովա, Մոնտենեգրո, Օման, Պանամա, Պերու, Դոմինիկյան Հանրապետություն և Սերբիա»,- ասված է կառավարության հայտարարության մեջ: Խոստովանենք, երկրների ցանկը, որում հայտնվել է նաև Հայաստանը, բավական խոստումնալից և հետաքրքիր է՝ այդ հասկացությունների ընկալման բացասական իմաստով։

Հիշեցնենք՝ Իտալիայում համաճարակի ամբողջ ընթացքում գրանցվել է վարակման 245 338 և մահվան 35 092 դեպք։ Հայաստանում, նախորդ շաբաթվա դրությամբ, գրանցվել է կորոնավիրուսով վարակման 36 613 դեպք, վարակման հետևանքով մահացել է 910 մարդ: Սակայն մեկ մլն բնակչության հաշվով համավարակի ցուցանիշը մեզ մոտ շատ վաղուց անցել է Իտալիային և ոչ միայն Իտալիային։ Եվ ահա ստանում ենք արդյունքները․ մեր դիմաց բոլորը փակում են դռները։ Նախորդ շաբաթ
ՌԴ վարչապետ Միխայիլ Միշուստինը ևս հայտարարել էր, որ Ռուսաստանն օգոստոսի 1-ից վերականգնում է միջազգային ավիահաղորդակցությունը։ Ինչպես գրում է «ՌԻԱ Նովոստի» գործակալությունը, ՌԴ վարչապետն ասել է, որ առաջնորդվել են համաճարակաբանական իրավիճակով, կորոնավիրուսային հիվանդացության մակարդակով և փոխադարձության սկզբունքներով։
Թռիչքներ են տեղի ունենալու Մոսկվայից, Մոսկվայի մարզից, Սանկտ Պետերբուրգից և Դոնի Ռոստովից: ՌԴ փոխվարչապետ Տատյանա Գոլիկովան հստակեցրել է, որ ավիաթռիչքները վերսկսվում են դեռևս 3 երկրի` Մեծ Բրիտանիայի, Թուրքիայի և Տանզանիայի հետ, իսկ ցուցակը գնալով կընդլայնվի:
Դժվար է ասել՝ ընդլայնումից հետո Հայաստանը երբ կընդգրկվի, կամ արդյո՞ք կընդգրկվի այն երկրների ցանկում, որոնց դիմաց Ռուսաստանը կբացի իր դռները։
Հարևան Վրաստանում ևս Հայաստանի քաղաքացիների ելումուտը իրենց երկիր առայժմ չեն պատրաստվում թույլատրել։ Վրաստանում օգոստոսի 2-ից կվերականգնվի նաև Մյունխեն-Թբիլիսի-Մյունխեն ավիահաղորդակցությունը, որը կիրականացնի Lufthansa ավիաընկերությունը:
Օգոստոսի 8-ից էլ Փարիզ-Թբիլիսի-Փարիզ ուղղությամբ չվերթերը կվերականգնի Air France ավիաընկերությունը: Հայաստանի մասին առայժմ ոչ մի խոսք։
Վերադառնալով Հայաստանին՝ նշենք, որ մեզ մոտ կարծես թե հասկացել են, որ կորոնավիրուսի ընթացիկ փուլը չհաղթահարած, մենք պետք է սպասենք և նախապատրաստվենք աշնաննը սպասվող նոր ցիկլին։ Բայց նախապատրաստական աշխատանքներն ըստ ամենայնի պետք է նաև քաղաքական բաղադրիչ ունենան պարտադիր։

Ի վերջո, համավարակի դեմ պայքարի տապալման համար Նիկոլ Փաշինյանը վաղ թե ուշ պատասխանատվության հարց է առաջ քաշելու։ Հայաստանում համավարակի խայտառակ ցուցանիշների և համատարած բոլոր առումներով տապալումների համար ինչ-որ մեկի գլուխը վաղ թե ուշ թռնելու է։
Թե ով կլինի այս տապալումների պատասխանատուն, ցույց կտա ժամանակը, և կորոնավիրուսի զարգացման հետագա ընթացքը։

Հայկ Դավթյան