Թուրքիան ու Ադրբեջանը «թքած ունեն» Մոսկվայի քայլերի վրա

Թուրքիան ու Ադրբեջանը համատեղ լայնամասշտաբ զորավարժություններ են անցկացնելու, հայտնում է Ադրբեջանի պաշտպանության նախարարությունը։

«Համաձայն Ադրբեջանի ու Թուրքիայի Հանրապետությունների միջև ռազմական համագործակցության համաձայնագրի ու տարեկան պլանի՝ մեր երկրում կանցկացվեն համատեղ լայնամասշտաբ մարտավարական զորավարժություններ՝ երկու երկրների ցամաքային զորքերի ու օդուժի մասնակցությամբ։ Համատեղ զորավարժություններում ներգրավվելու են անձնակազմերը, զրահամեքենաներ, հրետանային համակարգեր ու ականանետեր, ինչպես նաև երկու երկրների ռազմական ավիացիան ու ՀՕՊ համակարգերը»,- ասվում է հայտարարության մեջ։

Ցամաքային զորքերի ներգրավմամբ զորավարժություններն անցկացվելու են Բաքվում ու Նախիջևանում օգոստոսի 1-5-ը։ Իսկ ռազմական ավիացիայի մասնակցությամբ զորավարժությունները պլանավորվում է անցկացնել հուլիսի 29-ից օգոստոսի 10-ը Բաքվում, Նախիջևանում, Գյանջայում (Գանձակ), Քյուրդամիրում ու Եվլախում։

Այսինքն, ադրբեջանական հուլիսյան հարձակումից երկու շաբաթ անց, երբ ողջ միջազգային հանրությունը լարվածությունը մեղմացնելու, բանակցությունների վերադառնալու, սադրանքները բացառելու քաղաքականություն է տանում՝ հորդորելով կողմերին կառուցողական դաշտ վերադառնալ և բովանդակային բանակցություններ վարել, Թուրքիան ու Ադրբեջանը «թքած ունենալով»՝ ուժի ցուցադրության հերթական փորձն են անում:

Հայտնի է, որ զորավարժությունները համարվում են լարվածություն առաջացնող միջոցառում, այն էլ՝ նոր սրացման ֆոնին:

Թուրքիայի ու Ադրբեջանի քայլը լուրջ հարված է նաև Ռուսաստանի ջանքերին: Մի քանի օր առաջ Ռուսաստանի արտգործնախարարը հեռախոսազրույց էր ունեցել թուրք գործընկերոջ հետ, որի ընթացքում, ըստ պաշտոնական հաղորդագրության, Մոսկվան ընդգծել էր հայ-ադրբեջանական հակամարտության հարցում հավասարակշիռ մոտեցում որդեգրելու և կողմերի վրա զսպող ազդեցություն թողնելու կարևորությունը` իրավիճակի հետագա սրացումը կանխելու, սահմանի անվտանգությունը երաշխավորելու և ղարաբաղյան խնդրի կարգավորման շուրջ ջանքերը ակտիվացնելու համար:
Ըստ Ռուսաստանի արտգործնախարարության, Սերգեյ Լավրովն ու Մևլութ Չավուշօղլուն պայմանավորվել էին զարգացնել Մոսկվայի և Անկարայի փոխգործակցությունը` ի շահ տարածաշրջանի կայունացման:

Հուլիսի 12-ին հայ-ադրբեջանական սահմանին սկսված բախումներից հետո Թուրքիայի պաշտպանության նախարարը հայտարարեց, թե հայերը «անպայման պատասխան կտան իրենց արածի համար»:

Բազմիցս նույնպիսի կամ նման բովանդակությամբ հայտարարություններով են հանդես եկել Թուրքիայի նախագահը, արտաքին գործերի նախարարը և նախարարությունը, խորհրդարանականները, Ազգային անվտանգության խորհուրդը:

Պաշտոնական Երևանը դատապարտել է այդ հայտարարությունները՝ շեշտելով, մասնավորապես, որ Անկարան «այս մոտեցումներով հանդիսանում է Հայաստանի և տարածաշրջանի անվտանգության սպառնալիքը»:

Ու հիմա՝ Անկարան ու Բաքուն, կարծես, արհամարհելով ԵԱՀԿ Մինսկի խմբի, ողջ միջազգային հանրության կոչերը՝ գնում են հերթական սրման:

Մետաքսյա Շալունց