Պաշտոնից ազատման հրամանը՝ սկուտեղի վրա
Լրատվամիջոցները հերթական անգամ «բռնացրել են» բարձրաստիճան պաշտոնյայի, որը խախտել է արտակարգ դրության կանոնները։ Այս անգամ օրինախախտը ՀՀ ոստիկանապետ Վահե Ղազարյանն է, որը ոստիկանության բարձրաստիճան պաշտոնյաների հետ խնջույքի է մասնակցել Գագիկ Ծառուկյանին պատկանող «Ծիրանի» ռեստորանային համալիրում: Լրագրողները հաշվել են մոտ երկու տասնյակ ծառայողական մեքենա, ինչպես նաեւ ճանապարհային ոստիկանության ուղեկցող մեքենաներ: ԶԼՄ-ների ներկայացուցիչներին տեսնելով՝ ոստիկանապետը հեռացել է:
Խնջույքի առիթը, ըստ ԶԼՄ-ների, Արցախի նորանշանակ ոստիկանապետ Հակոբջանյանի հայաստանյան այցն էր, ում տարել են հյուրասիրության, որը վերածվել է մեծ ու աղմկոտ տոնախմբության:
Մոտ մեկ ամիա առաջ աշխատանքից ազատվեց ՀՀ ԶՈՒ գլխավոր շտաբի պետ Արտակ Դավթյանը՝ համավարակի և կարանտինի պայմաններում որդու հարսանիքի խնջույքը կազմակերպելու համար։ Լրագրողները նկարել էին խնջույքը։ Արդյունքում վարչապետ Նիկոլ Փաշինյանը նրան հեռացրեց աշխատանքից, քանի որ նա փաստացի խախտել էր պարետատան կանոնները:
ԿԳՄՍ նախարար Արայիկ Հարությունյանը խիստ նկատողություն տվեց Երևանի թիվ 114 ավագ դպրոցի տնօրեն Ռ․ Կոստանյանին այն բանի համար, որ նա իր սաների ավարտական միջոցառման ժամանակ պարել էր։ Շրջանավարտների ավարտական միջոցոռումը տեղի էր ունեցել ոչ թե ռեստորանում, այլ տանը, բայց տեսագրությունը հայտնվել էր համացանցում։ Ըստ էության տիկին Կոստանյանը նախարարության կիրառած նկատողությունների հիմքով ամենայն հավանականությամբ կկորցնի պաշտոնը։
Տվյալ դեպքում նույն անօրինականությունը կատարել է նաև ոստիկանապետը․ նա խախտել է Պարետատան սահմանած կանոնները։ Եվ հիմա վարչապետ Նիկոլ Փաշինյանն ուղղակի պարտավոր է չխախտել իր իսկ սահմանած խաղի կանոնները և շատ արագ ստարագրել ոստիկանապետի ազատման հրամանը։ Ի վերջո, ոստիկանությունն ի պաշտոնե հենց այն կառույցն է, որը պատասխանատվություն է կրում Պարետատան սահմանած կանոնների պահպանման համար։ Իսկ ոստիկանապետն ի պաշտոնե այն բարձրաստիճան պաշտոնյան է, որը պատասխանատու է իր ղեկավարած համակարգի արդյունավետ աշխատանքի համար։ Բայց ստացվում է, որ ինքն անձամբ է խախտում այն կանոնները, որոնք չպահպանելու համար ոստիկանները բերման են ենթարկում սովորական քաղաքացուն, և որի համար որոշ մարդիկ պաշտոն են կորցրել։
Եթե Նիկոլ Փաշինյանը պաշտոնից չազատի Վահե Ղազարյանին, կնշանակի՝ նոր Հայաստանում օրենքի առաջ բոլորը հավասար են, իսկ ոստիկանապետը՝ օրենքից դուրս է։
Հայկ Դավթյան
Հետևեք մեզ Viber-ում
