Ռուսաստանում ամեն ինչ կարող է վերածվել քաոսի. Ադրբեջանական տեռոր՝ ընդդեմ հայերի

Անցած գիշերը Մոսկվայից ստացվող տեղեկություններն ու տեսանյութերը քաոսային իրավիճակ են հիշեցնում:

Տեղի են ունեցել բախումներ՝ հայերի և ադրբեջանցիների միջև: Մասնավորապես, մի խումբ ադրբեջանցիներ նախապես պլանավորված կերպով հարձակվել են տեղի մի շարք հայ բնակիչներ վրա, ծեծել և հայհոյել վերջիններիս: Ադրբեջանցիների մեկ այլ խումբ ջարդուփշուր է արել հայկական պետհամարանիշերով ավտոմեքենաներ՝ ծեծի ենթարկելով դրանց վարորդներին:

Համացանցում մի տեսանյութ է հրապարակել՝ Infoteka24.ru կայքին հղմամբ, որում երևում է, թե ինչպես են մի քանի ադրբեջանցի ծեծի ենթարկում մեքենայի մեջ նստած տղամարդուն, կոտրում մեքենայի ապակիները: «Մոսկվայում ադրբեջանցիների զայրացած ամբոխը ծեծի է ենթարկել հայկական պետհամարանիշով մեքենայի վարորդին: Մեր աղբյուրները հայտնում են, որ Մոսկվայում ադրբեջանցիները բանդաներ են կազմում, որպեսզի հարձակվեն հայերի վրա», - ասվում է տեսանյութին կից գրառման մեջ։

Ռուսաստանի հայերի միության աշխատակից Դավիթ Տոնոյանն էլ ֆեյսբուքյան իր էջում հայտնել է, որ ադրբեջանցիները դանակահարել են իրեն ծանոթ մի հայի: Նա տեսանյութ է հրապարակել, որտեղ երևում է, թե ինչպես են Մոսկվայի հարավ-արևելքում ՕՄՈՆ-ի աշխատակիցները ձերբակալել մի խումբ ադրբեջանցիների: Տոնոյանը նաև գրառում է կատարել՝ հայտնելով, որ Մոսկվայի Մարինո, Բրատիսլավսկայա և Լյուբլինո շրջաններն ամբողջությամբ շրջափակված են «ՕՄՈՆ»-ի և «Ռոսգվարդիայի» ուժերի կողմից, բոլոր մեքենաները ստուգվում են:

Ինչպես հաղորդում է աղբյուրը, Մոսկվայում վաղուց չէին եղել նման ծավալի բախումներ հայերի և ադրբեջանցիների միջև, այդ թվում՝ արցախյան հակամարտության գոտում նախկինում գրանցված լարվածությունների ժամանակ:

Իրավիճակն ավելի է թեժացրել «Ֆուդ Սիթի» առևտրի կենտրոնի շուրջ ստեղծված իրավիճակի պատճառով, որտեղ օրեր շարունակ Ադրբեջանի և Թուրքիայի ղեկավարության հրահանգով արգելված էր հայ վաճառողների մուտքը:

Նկատենք, որ հայկական ծիրանի՝ ադրբեջանցուն պատկանող «Ֆուդ սիթի» շուկայում վաճառքի արգելքից հետո, երեկ էլ ադրբեջանցի գործարար Արազ Աղալարովին պատկանող «Крокус» առևտրի կենտրոններից հանվել են բոլոր հայկական ապրանքները, և դրանք փոխարինվել են ադրբեջանական ապրանքներով:

Ռուսաստանում այս ամենը տեղի է ունեցել Ռուսաստանի արտգործնախարար Սերգեյ Լավրովի՝ Ռուսաստանում հայկական և ադրբեջանական համայնքների ներկայացուցիչների հետ հանդիպումից հետո:

ՌԴ ԱԳՆ ղեկավար Սերգեյ Լավրովը հուլիսի 23-ին հանդիպել էր Ռուսաստանում հայկական և ադրբեջանական համայնքների ներկայացուցիչների հետ: Ինչպես հայտնել էր ՌԴ ԱԳՆ-ն. «Արտաքին գործերի նախարար Սերգեյ Լավրովը հանդիպումներ է ունեցել Ռուսաստանի հայկական և ադրբեջանական համայնքների նշանավոր ներկայացուցիչների՝ «Կիևսկայա պլոշադ» ՍՊԸ-ի տնօրենների խորհրդի նախագահ Գոդ Նիսանովի և «Ռուսաստանի հայերի միություն» համառուսաստանյան հասարակական կազմակերպության նախագահ Արա Աբրահամյանի հետ»։

Հաղորդագրությունում ասվում է, որ քննարկվել է հայկական և ադրբեջանական համայնքների դերը Ռուսաստանի Դաշնության տարածքում ազգամիջյան խաղաղության և ներդաշնակության պահպանման գործում՝ երկրի օրենսդրությանը համապատասխան: Նշվել է համատեղ բացատրական և կրթական աշխատանքի կարևորությունը՝ ազգային պատկանելիության հիմքով Ռուսաստանի քաղաքացիների իրավունքների ոտնահարման դեպքերը կանխելու և վերացնելու համար: Կարևորվել է համայնքների կառուցողական ներդրման անհրաժեշտությունը Բաքվի և Երևանի միջև հարաբերությունների բարելավման համար պայմանների ստեղծման գործում»:

Տպավորություն է ստեղծվում, որ Ռուսաստանում հայ-ադրբեջանական լարվածությունը մոտենում է քաոսի և ինչ-որ պահից ամեն ինչ իսկապես կարող է դուրս գալ վերահսկողությունից:

Ռուսական իրավապահները, եթե համարժեք քայլերի չդիմեն, ապա, կարելի է ենթադրել, որ ադրբեջանական սադրանքներն ու հարձակումները շարունակական բնույթի կլինեն:
Ինչ վերաբերում է հայկական ապրանքատեսակների դեմ Ռուսաստանում ծավալված արշավը, ապա այստեղ ևս ռուսական իշխանությունները պետք է միանշանակ լինեն:

Այլապես կստացվի, որ Ռուսաստանում հայերը խտրական վերաբերմունքի են արժանանում:

Մետաքսյա Շալունց