Թուրքական զինանոցի նոր «ռումբն» Ալիևի համար

Երեկ Թուրքիայի նախագահ Ռեջեփ Թայիփ Էրդողանը Ազգային անվտանգության խորհրդի նիստ է հրավիրել, որի շրջանակում քննարկվել է նաև Հայաստանի և Ադրբեջանի միջև սահմանային վերջին լարվածությունը:

Թուրքական մամուլի փոխանցմամբ՝ Թուրքիան ևս մեկ անգամ իր աջակցությունն է հայտնել «եղբայրական» Ադրբեջանին:

«Թուրքիան դատապարտում է Հայաստանի ագրեսիան, որը խախտում է միջազգային իրավունքը: Թուրքիան ևս մեկ անգամ շեշտում է, որ աջակցելու է Ադրբեջանի ցանկացած որոշմանը»,-ասվում է Թուրքիայի Ազգային անվտանգության խորհրդի հայտարարությունում:

Պաշտոնական Անկարան, այսպիսով, կրկին Անվտանգության խորհրդում քննարկում է Հայաստան-Ադրբեջան սահմանային իրավիճակը՝ ավելին, արձանագրում, որ Ադրբեջանի կայացրած ցանկացած որոշմանը կսատարի: Ասել կուզեն, եթե Ադրբեջանի որոշի պատերազմել Հայաստանի դեմ՝ մենք աջակցելու ենք:

Հուլիսյան ռազմական գործողություններից հետո Թուրքիայի առավել ագրեսիվ քաղաքականությունը իսկապես պետք է ուշադրության արժանի լինի միջազգային հանրության համար: Հայաստանն այս առումով հետևողակական աշխատանք պետք է տանի:

Բացատրական աշխատանքը հետևյալ ուղղությամբ պետք է իրականացնել՝ թուրք-ադրբեջանական միասնությունը սպառնում է մեր տարածաշրջանի կայունությանն ու անվտանգությանը: Աշխարհը պետք է գիտակցի, որ մեր տարածաշրջանում ռազմական գործոնը, եթե խաղարկվեց՝ դրա իրականացնողները Թուրքիան ու Ադրբեջանն են:

Թուրքագետ Ռուբեն Մելքոնյանն անդրադարձել էր նախօրեին Թուրքիայի նախագահ Էրդողանի հրավիրած Անվտանգության խորհրդի նիստին, նկատելով, որ Էրդողանն ելույթում նույն հարթության մեջ էր ներկայացնում Սիրիայի, Իրաքի, Լիբիայի և արդեն Հայաստանի խնդիրները. նկատենք, որ վերոհիշյալ երեք երկրներում Թուրքիան ռազմական գործողություններ է ծավալում....«Հայաստանին այդ շարքում դասելը հստակ մեսիջ էր` ռազմական ենթատեքստով, որը նույնպես, ըստ էության, աննախադեպ էր գոնե վերջին տարիներին (չհաշված վաղ 1990-ականները): Եվ այսօր, քիչ առաջ ավարտված Թուրքիայի անվտանգության խորհրդի նիստից հետո պաշտոնական հայտարարության մեջ ասվում է. «Թուրք ժողովուրդը տեր է կանգնելու ցանկացած որոշման, որը կընդունի եղբայրական Ադրբեջանը իր արդարացի դատի շրջանակներում»....Երևի ավելորդ չի լինի այս ամենին ավելացնել ներկայումս Թուրքիայում ծավալվող հայտնի կարգախոսի` «մեկ ազգ, երկու պետություն», նոր տարբերակը` «մեկ ազգ, մեկ բանակ»... Որպես եզրահանգում` տիկնայք և պարոնայք պատասխանատուներ, հանե´ք վարդագույն ակնոցները, դադարեցրե´ք ինքնախաբեությունը և ավելորդ պոռոտախոսությունը, հրաժարվե´ք անտեղի և անիմաստ խաղաղասիրությունից, դադարե´ք թուլացնել Հայաստանի անվտանգությունը ապահովող մեխանիզմները և դաշնակցային, բարեկամական հարաբերությունները»:

Վստահաբար, հուլիսյան ռազմական գործողությունները հայ-ադրբեջանական սահմանին նոր իրավիճակ են ստեղծել ողջ տարածաշրջանի համար:

Շահագրգիռ գերտերությունների, տարածաշրջանային խաղացողների համար հիմա թիվ մեկ խնդիրը պետք է լինի զսպել լարվածությունը, մեղմել և հնարավորինս նպաստել նրան, որպեսզի կողմերը շարունակեն բանակցել:

Վերջին տարիներին, թերևս, առաջին անգամ Թուրքիայի հնարավոր ներգրավվածության հավանականությունը, թերևս, պարզ է բոլորի համար՝ Ռուսաստան, ԱՄՆ, և հարևան՝ Իրան ու Վրաստան: Լայնածավալ ռազմական գործողությունների բռնկումը, կարծես, չի բխում որևէ մեկի շահերից:

Մետաքսյա Շալունց