Մի աղբի պատմություն

Դեռ երեկ, Հաղթանակի զբոսայգում ՀՀ ոստիկանապետ Վովա Գասպարյանը ինքնավստահ պարծենում էր լրագրողների առաջ, որ ինքը դեռ 60 տարի պաշտոնավարելու է, որ Սերժ Սարգսյանն է դա իրեն թույլ տվել ու նա բավականին քամահրանքով էր արտահայտվեց վարչապետ Կարեն Կարապետյանի մասին լրագրողների հարցերին: Մասնավորապես, վարչապետի աղբի վերաբերյալ հանձնարարականի առիթով Գասպարյանը հակադարձեց, թե աղբ կա ամենուր, այդ թվում իշխանության մեջ: Իսկ այսօր Գասպարյանի ղեկավարած կառույցից ամենայն մանրամասնությամբ հաշվետվություն են ներկայացնում վարչապետի հանձնարարականի առիթով ու  ներկայացնում, թե ինչպիսի  եռանդով են կատարել վարչապետի հանձնարարականը ու բռնել աղբ թափողներին: Ասես Հայաստանում ոստիկանությունը բոլոր պարերը պարել էր, կատարել օրենքով իրենց վերապահված առանցքային գործառույթները եւ մնացել էին չթույլատրված վայրերում աղբ թափողներին բռնելը: Կառավարության ապրիլի 20-ի նիստում Դիմելով Վլադիմիր Գասպարյանին վարչապետն ասել էր. «Պարոն Գասպարյան, խնդրում ենք ձեզանից՝ այսօր չունենալով տույժ տուգանք, ուղղակի մեր ոստիկանության գործընկերներին խնդրում ենք մաքսիմալ կանխարգելման միջոցառումները…, ոնց պատկերացնում են… բռնում ենք, ասում ենք՝ լսի, հավաքի՝ գնա»:  Վլադիմիր Գասպարյանն էլ հիշեցրել էր, որ վարչական իրավախախտում է աղբ թափելը եւ մինչեւ 300 հազար դրամ տուգանք է նախատեսված: Եւ ահա, այսօր ՈՍ լրատբականի տարածած հաղորդագրությունից իմանում ենք, որ «Մաքուր Հայաստան» ծրագրի շրջանակներում ՀՀ ոստիկանության կողմից իրականացվել են մի շարք միջոցառումներ՝ հանրապետության տարածքում չսահմանված, չնախատեսված տեղերում ու վայրերում աղբ թափելու դեպքերը բացառելու նպատակով: «- Սպասարկվող վարչական տարածքում չսահմանված վայրերում աղբի կուտակումներ հայտնաբերելիս ձեռնարկվել են գործուն միջոցներ աղբը թափողի ինքնությունը պարզելու ուղղությամբ եւ այդ մասին իրազեկվել է տարածքային կառավարման եւ տեղական ինքնակառավարման մարմիններ։ - Չսահմանված վայրերում աղբը թափող անձի ինքնությունը հայտնի լինելու պարագայում վերջինիս տրամադրվել է սեղմ ժամկետ՝ իրավախախտման հետեւանքները վերացնելու համար եւ այդ մասին իրազեկվել է տարածքային կառավարման եւ տեղական ինքնակառավարման մարմիններ։ - Ավտոճանապարհներին ճանապարհապարեկայնի ծառայություն իրականացնելիս տրանսպորտային միջոցից իրեր եւ առարկաներ նետելու, ինչպես նաեւ տրանսպորտային միջոցների վարորդների կողմից բեռների փոխադրման կանոնները խախտելու դեպքերով օրենքով սահմանված կարգով կազմվել են վարչական իրավախախտման վերաբերյալ արձանագրություններ։ - «Մաքուր Հայաստան» ծրագրի շրջանակներում համայնքային խորհուրդների հետ համագործակցելով՝ ոստիկանության կողմից ազգաբնակչության շրջանում տարվել են բացատրական աշխատանքներ՝ բնակավայրերում, ճամփեզրերին, հանգստի եւ ժամանցի գոտիներում աղբ թափելու դեպքերը բացառելու ուղղությամբ։ - Սպասարկվող երթուղիներում՝ առավելապես հանգստի եւ ժամանցի գոտիներում, զբոսաշրջության վայրերում, քաղաքացիների կողմից աղտոտումը կանխելու նպատակով հրահանգավորվել են ՊՊԾ վերակարգերը։ - Սպասարկվող վարչական տարածքներում տնտեսվարող սուբյեկտների՝ առեւտրի, սննդի, ժամանցի, հանգստի, ինչպես եւ մյուս կազմակերպությունների տնօրինությանը ոստիկանության կողմից խիստ նախազգուշացվել է՝ իրենց կողմից վերահսկվող եւ հարակից տարածքները մաքուր պահելու ուղղությամբ» այսպիսի հետեւողական ու համալիր աշխատանք է կատարել ոստիկանական գունդը՝ կարծես մեր երկրում ՀՀ քաղաքացիների սպառնացող միակ վտանգը աղբն է ու ոստիկանները հերոսաբար չեզոքացրել են այդ աղբը: Արդյունքում՝ կատարված աշխատանքների ընթացքում հայտնաբերվել է  չսահմանված վայրերում աղբ թափելու 685 դեպք, սակայն Ճանապարհային ոստիկանության ճանապարհապարեկային ծառայության անձնակազմի կողմից ՀՀ ՎԻՎ օրենսգրքի համապատասխան հոդվածների հատկանիշներով կազմվել է 287 արձանագրություն: Իրականում ակնհայտ է, որ այստեղ խնդիրը ոչ այնքան աղբի ու շրջակա միջավայրը աղտոտողներին տուգանելու հարցն է, որն այդքան կարեւորվել է ՀՀ ոստիկանապետի կողմից, որքան ներքաղաքական բարդ եւ նոր իրավիճակում դիրքերի վերահաստատման ու ամրապնդման հարցը: Չնայած այն հանգամանքի, որ ՀՀ ոստիկանապետը պատեհ առիթներով շեշտում է իր՝ ՀՀ նախագահի մարդը լինելու փաստը, այդուհանդերձ նոր կառավարության ձեւավորումից ու Սերժ Սարգսյան-Կարեն Կարապետյանը ոչ բացահայտ պատերազմի  ընթացքում չի ցանկանում սրել իրավիճակը, չկատարել վարչապետի հանձնարարականը ու շրջանցել, այն, այլ հակառակը  զավեշտի հասնող աստիճանի լրջացնում է աղբի հարցը՝Կկարեն Կարապետյանին խուսանավելու տեղ չթողնելով: Անի Սահակյան