Յանուկովիչի զբոսանավը նկատել են Թուրքիայի ափերի մոտ

Թուրքիայի ափերի մոտ նկատել են BANDIDO զբոսանավը, որը պատկանում է Ուկրաինայի նախկին նախագահ Վիկտոր Յանուկովիչի ընտանիքին: Այս մասին հայտնում է old.tsn.ua-ն: Լրագրողները նշում են, որ շքեղ զբոսանավը ոչ միայն կալանքի տակ չէ իրավապահների կողմից, այլև շարունակում է տիրոջը կայուն եկամուտ բերել: Հաղորդվում է, որ BANDIDO զբոսանավը պատրաստվել է հատուկ պատվերով, և այն ձեռք է բերել Յանուկովիչի որդին մոտ 6 մլն եվրոյով: Յանուկովիչի նախագահության ժամանակ այդ զբոսանավը Բալակլավում է եղել, սակայն ավելի քան կես տարի առաջ անհետացել է գեոլոկացիոն ռադարներից: Ավելի ուշ լրագրողներին հաջողվել է գտնել BANDIDO-ն, բայց արդեն ոչ թե Ղրիմում, այլ Թուրքիայի ափերի մոտ: Ավելին՝ այն հանձնել են չարթերի, և հիմա յուրաքանչյուր ցանկացող կարող է վարձակալել: Միջազգային չարթերային ընկերություններն առաջարկում են օրական 9000 եվրոյով կամ մեկ շաբաթը 40 000-ով զբոսանավով կրուիզ վարձել, որի ներքին հարդարանքն ապշեցնում է ոսկեզօծությամբ, բնական կաշվով, թանկարժեք փայտով և թանկարժեք աքսեսուարներով: «Սակայն տարօրինակն այն է, որ իմանալով Յանուկովիչի զբոսանավի գտնվելու վայրը՝ դատախազությունը չի շտապում դրա վրա կալանք դնել: Դատավճիռների միասնական պետական ռեգիստրում BANDIDO զբոսանավի մասին ոչ մի վճիռ չկա»,- նշում է աղբյուրը: Ուկրաինան Յանուկովիչին որոնում է առանձնակի խոշոր չափի ունեցվածքի յուրացման կամ պաշտոնեական լիազորությունների չարաշահման ճանապարհով մեծ ունեցվածքի տիրանալու մեղադրանքով: