Միջուկային տեռոր՝ պաշտոնական մակարդակով

Երեկ Ադրբեջանի պաշտպանության նախարարության բարձրաստիճան պաշտոնյաներից մեկը պաշտոնապես հայտարարել է, որ ադրբեջանական զինված ուժերը՝ «կարող են հրթիռակոծության ենթարկել Հայաստանի Մեծամորի ատոմային էլեկտրակայանը», ԱԷԿ-ը:

Դեռ մի կողմ թողնենք Ադրբեջանի իշխանությունների՝ տրամաբանելու ունակության հարցը, որ փաստորեն չեն էլ գիտակցում, թե որևէ երկրի ատոմակայանի հրթիռակոծությունն ինչ աղետի կարող է դառնալ նաև այդ երկրի սահմանների դուրս գտնող այլ երկրների բնակչության համար:

Սարսափելի այն է, որ Ադրբեջանում կան իշխանություններ, որոնք չգիտեն, որ չի կարելի հայտարարել նման բաներ, որովհետև դա նախ մարդկության հանդեպ հանցագործության մասին հայտարարություն է, երկրորդ՝ դա անում են՝ պաշտոնական մակարդակով:

Ադրբեջանում, փաստորեն, չի գտնվել մի գրաճանաչ մարդ, որ բացատրի այդ երկրի ՊՆ պաշտոնյաներին, որ միջուկային սպառնալիքի մասին հայտարարությունը կոնկրետ հանցագործություն է, որը կարող է ՄԱԿ-ում և այլ կառույցներում ուղղակի քննարկման առարկա դառնալ:

Առանց այն էլ երեք տասնամյակ Հայաստանի ու Արցախի հանդեպ թշնամական քաղաքականություն տանելով՝ Ադրբեջանն այսպես, թե այնպես ընկալվում է որպես հայատյաց երկիր: Այժմ, ինչպես ասում են՝ պակասում էր միայն միջուկային սպառնալիքը Հայաստանի նկատմամբ՝ դա էլ արդեն արեցին:

Ադրբեջանի սպառնալիքներին երեկ պաշտոնական Երևանն արձագանքեց՝ ԱԳՆ-ի մակարդակով: «Ադրբեջանի պաշտպանության նախարարության հնչեցրած սպառնալիքը հրթիռակոծելու Մեծամորի Հայկական ատոմային էլեկտրակայանը վկայում է Ադրբեջանի ռազմաքաղաքական ղեկավարության հուսահատության մակարդակի և մտքի ճգնաժամի մասին:

Այն գործողությունները, որոնցով սպառնում է Ադրբեջանի ՊՆ-ն, հանդիսանում են ընդհանուր առմամբ միջազգային հումանիտար իրավունքի և, մասնավորապես, Ժնևյան կոնվենցիայի առաջին լրացուցիչ արձանագրության աղաղակող խախտում: Նմանօրինակ սպառնալիքները պետական ահաբեկչության ուղղակի դրսևորում են և արտահայտում են Ադրբեջանի ցեղասպան մտադրությունները: Ավելին, Ադրբեջանի ղեկավարությունը նման հայտարարություններով հանդես է գալիս որպես սպառնալիք տարածաշրջանի բոլոր ժողովուրդների, այդ թվում՝ սեփական ժողովրդի համար»:

ԱԳՆ-ն խստորեն դատապարտեց Ադրբեջանի հնչեցրած միջուկային սպառնալիքները, դա որակելով որպես՝ «միջազգային հանրության այդ անդամի ողջամտության և պատասխանատվության բացարձակ բացակայություն»:

Ֆեյսբուքյան իր էջում թեմային անդրադարձել էր ՀՀ Արդարադատության նախարար Ռուստամ Բադասյանը. «Ադրբեջանը սպառնում է ոչնչացնել Մեծամորի ատոմակայանը: Կարծում եմ՝ սա պետք է մտահոգիչ լինի ինչպես ամբողջ տարածաշրջանի, այնպես էլ միջազգային հանրության համար»:

«Այսօր Ադրբեջանի քարոզչամեքենան փայլեց հերթական գլուխգործոցով. պաշտպանության նախարարության կողմից, ի պատասխան մեր տիրույթում մասնավոր անձանց, գործիչների հայտարարություններին՝ Ադրբեջանի տարբեր ռազմավարական օբյեկտներին հարված հասցնելու վերաբերյալ, հայտարարվեց Մեծամորի ատոմակայանին հարվածելու մասին»,-լրագրողների հետ ճեպազրույցում երեկ նշել է Վազգեն Սարգսյանի անվան ռազմական համալսարանի պետի տեղակալ Արծրուն Հովհաննիսյանը:

Սա Հայաստանի Հանրապետության ողջ բնակչությանն ուղղված ակնհայտ հանցավոր սպառնալիք է, արձանագրեց Արման Թաթոյանը: «Նման հայտարարությունը պատերազմական հանցագործության բացահայտ մտադրություն է: Այն կարող է բերել հումանիտար աղետի ոչ միայն Հայաստանի, այլ նաև ողջ տարածաշրջանի համար: Այս սպառնալիքը քաղաքացիական բնակչությանն ուղղված բացահայտ ահաբեկում է, ինչը միջազգային մարդասիրական իրավունքի բացարձակ արգելք է:

Սա ոտնահարում է միջազգային մարդասիրական իրավունքի հիմնարար սկզբունքները, խարխլում է միջազգային հանրային իրավունքի հիմքերը: Այսպիսի մտադրություններն անգամ խաթարում են մարդու իրավունքների և հումանիտար պաշտպանության միջազգային համակարգը», հայտարարեց Հայաստանի մարդու իրավունքների պաշտպանը: Նա հրավիրեց միջազգային կառույցների ուշադրությունը քաղաքացիական բնակությանն ահաբեկելուն ուղղված, ինչպես նաև մարդու իրավունքների և հումանիտար պաշտպանության միջազգային համակարգը խարխլող այս հայտարարությանը:

Մետաքսյա Շալունց