Ալիևն «ազատ անկման» մեջ` առավել ագրեսիվ քաղաքականություն է սպասում իր ԱԳՆ-ից
Իլհամ Ալիևի հետ ինչ-որ բան այն չէ: Նրա վերջին օրերի ելույթներից կարելի է տպավորություն ստանալ, որ նրա մոտ որոշակի խուճապային տրամադրություններ կան:
Մի ղեկավար, որ իր իշխանության «ամրության» ու «հզորության» մասին քարոզչությամբ առասպել էր ստեղծել՝ այսօր, ոչ ավելի ոչ պակաս հրապարակային քննադատել է արտաքին քաղաքական գերատեսչությունը:
Ահա, Ալիևը ադրբեջանցի մի շարք դիվանագետների մեղադրել է դավաճանության մեջ, պնդել է, թե նրանք դավաճանել են հայրենիքին և չեն էլ թաքցնում։ Թե ովքեր են նրանք և ում օգտին են դավաճանել, Ադրբեջանի նախագահը չի հստակեցրել:
Նախօրեին նորանշանակ արտգործնախարարի հետ հեռավար հանդիպման ժամանակ Ալիևը հայտարարել է նաև, որ ադրբեջանցի մի շարք դիվանագետներ գտնվում են այն երկրների հատուկ ծառայությունների վերահսկողության տակ, որտեղ և բնակվում են։
«Մենք այդ մասին բավականաչափ տեղեկություններ ունենք։ Այսօր բոլոր նրանք, ովքեր ներկայանում են ադրբեջանցի, Ադրբեջանի դեմ կեղտոտ արշավ են վարում, հայերից էլ վատ», - հավելել է Ալիևը և մեղադրանքների տարափ հնչեցրել իր բնորոշմամբ բարեկամ ներկայացող երկրների հասցեին, որոնք խոսում են գործընկերության մասին, սակայն իրականում Ադրբեջանի դեմ են գործում:
«Նրանց նպատակը Ադրբեջանին սևացնելն է, Ադրբեջանի ղեկավարության մասին ստեր տարածելը, կյանքը, սակայն, ցույց է տալիս, որ այդ ամենը որևէ նշանակություն չունի», - համոզմունք է հայտնել Ադրբեջանի ղեկավարը, ով հայ-ադրբեջանական սահմանին շարունակվող ռազմական լարվածության ֆոնին արդեն մի քանի օր է անխնա քննադատում է ոչ միայն Հայաստանի իշխանություններին, այլ նաև հայրենի ընդդիմությանը՝ անվանելով նրանց հինգերորդ շարասյուն, և իր ենթակայության տակ գտնվող ու իր իսկ կողմից նշանակված դիվանագիտական ճակատն առաջնորդող պաշտոնյաներին:
Ադրբեջանական լրատվամիջոցների փոխանցմամբ՝ իր այս վերջին ելույթում, որի սղագրությունը նախագահական աշխատակազմը տարածել է, Իլհամ Ալիևը հիշատակել է միայն քաղաքական էմիգրանտներին: «Մեր հատուկ ծառայությունները բազմիցս տեղյակ են պահել այդ մասին իրենց գործընկերներին։ Մենք ասել ենք, որ հենց նրանք են այդ մարդկանց աշխատանքը համակարգում, դա ցույց է տալիս այդ երկրների երկերեսանիությունը, որոնք միայն բառերով են մեր ընկերները», - սրտնեղել է Ադրբեջանի ղեկավարը և մի շարք հանձնարարականներ տվել իր կողմից նշանակված նոր արտգործնախարարին, ով, սակայն, դիվանագիտական գործունեությամբ երբեք չի զբաղվել:
47 -ամյա Բայրամովը մասնագիտությամբ տնտեսագետ և իրավաբան է, մինչև նոր նշանակումը զբաղեցնում էր Ադրբեջանի կրթության նախարարի պաշտոնը: Ավելի քան մեկուկես տասնամյակ արտգործնախարար աշխատած Էլմար Մամեդյարովից հետո դիվանագիտական փորձ չունեցող Ջեյհուն Բայրամովի նշանակումը «Թուրան» գործակալության մեկնաբանն անսպասելի է համարում` տարակուսանք հայտնելով նորանշանակ նախարարի հետագա գործունության արդյունավետության վերաբերյալ:
«Եթե ենթադրենք, որ Մամեդյարովը վատ էր կատարում պետության ղեկավարի հանձնարարությունները և բավականաչափ ակտիվ չէր, ապա, բնականաբար, նոր նախարարից ավելի շատ վճռականություն է պահանջվում ազգային շահերն առաջ մղելու հարցում։ Սակայն դժվար է հավատալ, որ դա կմոտեցնի ղարաբաղյան հակամարտության կարգավորմանը», - գրում է ադրբեջանական «Թուրան» լրատվական գործակալությունը:
Հոդվածագիրն այնուհետև նկատում է, որ մինչ այժմ պետության ղեկավարը երբեք չէր քննադատել ԱԳՆ-ին պասիվության համար։
«Ընդհակառակը՝ բոլոր հարթակներից բարձրագոչ հայտարարում էին, թե մեր դիվանագիտությունն ակտիվ է, և մենք գաղափարական հաղթանակ ենք տանում Հայաստանի նկատմամբ, ողջ աշխարհը ճանաչում է մեր ճշմարտացիությունը և տարածքային ամբողջականությունը», - գրում է «Թուրան»-ի մեկնաբանը և եզրափակում․ - «Միևնույն ժամանակ, ԱԳՆ-ի գործողությունների և արտաքին քաղաքական քայլերի վերաբերյալ ցանկացած քննադատություն մամուլում և ընդդիմության կողմից իշխանությունները գնահատում էին որպես երկրի հաջողությունները սևացնելու փորձ»:
Այսինքն, Ալիևի կողմից երկրի ԱԳՆ-ն քննադատելը նույնիսկ անհասկանալի է թվում ադրբեջանցի փորձագետներին:
Տարիներ շարունակ քարոզչական դաշտում ադրբեջանական իշխանությունները «տոնում» Հայաստանի հանդեպ տարած «հաղթանակները», թե ողջ աշխարհը գիտե ճշմարտությունը Ղարաբաղյան խնդրի մասին:
Այժմ, փաստորեն, Ալիևը իր երկրի ԱԳՆ-ի ավելի նախահարձակ քաղաքականություն է ակնկալելու: Թե ինչպես է Ադրբեջանի Կրթության նախկին նախարարը այդ քաղաքականությունն իրականացնելու՝ դժվար է պատկերացնել...
Մետաքսյա Շալունց
Հետևեք մեզ Viber-ում
