Ելքը մեկն է. Արամ Սարգսյան
«Ելք» դաշինքը ելք առաջարկող թիմ է, մեզ համար չկան անելանելի իրավիճակներ, և մեր ելքն իրականություն դառնալու համար մի տարբերակ կա. դա ձեր քվեն է: Այս մասին այսօր՝ մայիսի 11-ին Հյուսիսային պողոտայում ընթացող հանրահավաքում հայտարարել է «Ելք» դաշինքից ԱԺ պատգամավոր Արամ Սարգսյանը։ Ըստ նրա՝ Երեւանի պրոբլեմը անսարք վերելակները չեն միայն, անանացանելի ճանապարհները, փոշին ու կեղտը չէ միայն, այս քաղաքի խնդիրը համակարգային է։ «Իսկ խնդիրը համակարգային կարող է լուծել նոր ուժը, ընդդիմությունը, որովհետեւ խնդիրները իշխանությունն էստեղծել եւ նա խնդիր լուծող չէ։ Միայն հակադիր համակարգի պարագայում է, որ փոխադարձ վերահսկողության արդյունքում փոփոխություններ կլինեն»,- նշեց Արամ Սարգսյանը։ Արամ Սարգսյանի խոսքով՝ իշխանությունն ամեն ինչ անում է ժողովրդավարության պատրանք ստեղծելու համար։ «Աշխարհում շատ երկրներ անցել են այդ կեղծ ժողովրդավարությամբ։ Կեղծ ժողովրդավարությունը ոչինչ չի տալիս, դա արագ հասկացան եվրոպացիները։ Միայն իրական ժողովրդավարության պարագայում է, որ կարելի է բան փոխել, առաջընթաց ունենալ»: Ըստ Արամ Սարգսյանի, «Ելք» դաշինքի թիմի համար անհաղթահարելի խնդիրներ չկան։ «Կուսակցությունները շատ-շատ են, բայց ելքը մեկն է»,- ասել է Արամ Սարգսյանը՝ կոչ անելով Երեւանի ավագանու ընտրություններում ձայն տալ «Ելք» դաշինքին։
Հետևեք մեզ Viber-ում
