Նյարդային Ալիևը քավության նոխազներ է փնտրում. Ո՞վ է հաջորդը

Երեկ Իլհամ Ալիևը առաջին հայացքից տարօրինակ թվացող ելույթով է հանդես եկել կառավարության նիստում:

«Ես չկարողացա նրան գտնել, նա աշխատավայրում չէր»,- ասել է Ալիևը՝ դժգոհություն հայտնելով արտգործնախարար Մամեդյարովից՝ նրան մեղադրելով անպատասխանատվության մեջ: Նա դիմել է երկրի վարչապետին՝ խնդրանքով իրենց տեղեկացնել Մամեդյարովի հետ երկխոսության մասին: Իր հերթին վարչապետ Ալի Ասադովն ասել է, որ ժամը 3-ին Մամեդյարովը տանն է եղել: «Ես հարցրի՝ ինչու եք տանը, պետք է աշխատավայրում լինեք և կատարեք նախագահի հանձնարարությունները»,- պատմել է վարչապետը:

Այնուհետև Ալիևը դժգոհություն է հայտնել, որ Մամեդյարովը հայկական կողմի հետ քննարկել է կորոնավիրուսի դեմ պայքարում համագործակցության հարցեր:

«Հայաստանի հետ ինչ համագործակցության մասին կարող է խոսք լինել»,- ասել է Ալիևը:

Այն, որ Մամեդյարովի գլխավերևում «սև ամպեր» էին կուտակվում դեռ ամիսներ առաջ՝ այդ թեմային մի քանի անգամ Hayeli.аm-ն անդրադարձել էր: Վերջին թարմ օրինակը Մամեդյարովի որդու ծախսած գումարների ու արտերկրում ձեռքբերած տան մասին տեղեկատվությունն էր, որը, վստահաբար, ոչ պատահական, հայտնվել էր ադրբեջանական մամուլի էջերում:

Իսկ այսօր, երբ Ադրբեջանի բանակը վերջին օրերին ստանում է արժանի հակահարված Հայկական Զինված ուժերի կողմից՝ առավել քան պարզ է, որ Ալիևը պետք է փորձի քավության նոխազներ փնտրել՝ իրավիճակի պատասխանատվությունը նրանց ուսերին բարդելու վրա:

Հիշենք, որ նախօրեին Ադրբեջանում կայացած ցույցերի ժամանակ, որոնք իբրև թե ի պաշտպանություն ադրբեջանական բանակի էին՝ հնչեցին հրաժարականների պահանջներ նաև ուղղված Ադրբեջանի պաշտպանության նախարարին ու բանակի այլ պատասխանատուների հասցեին:

Այնպես որ, Ադրբեջանում այսօր տեղի ունեցող գործընթացները սահմանային լարվածությանը զուգահեռ ունեն ներիշխանական, ներկլանային պայքարին բնորոշ դրսևորումներ:

Ակնհայտ է, որ Ադրբեջանում իշխանական կլաններն անթաքույց պայքարի են դուրս եկել, իսկ Ալիևը փորձում է իրավիճակն իր օգտին կարգավորել՝ օգտագործելով Ղարաբաղյան կարգավորումն ու սահմանում իր իսկ սանձազերծած ռազմական գործողությունները՝ ի նպաստ իր իշխանության պահպանության:

Իրավիճակը, եթե այսպես շարունակվի՝ ադրբեջանական բանակը շարունակի այսպիսի կորուստներ ունենալ՝ չի բացառվում, որ Ալիևը ստիպված լինի շարունակաբար քավության նոխազներ փնտրել ու զայրացած տոնայնությամբ ելույթներ ունենալ:

Մետաքսյա Շալունց