Ապրեք տղերք, մինչեւ հիմա ոչ մեկին չէր հաջողվել «խփել» դրան. Լապշին

«Կեցցեն հայ զինվորականները: Ապրե՛ք, տղերք»,- Facebook-ի իր էջում գրել է բլոգեր Ալեքսանդր Լապշինը:

«Այսօր ԶԼՄ-ները գրում են, որ հայկական զինված ուժերը խոցել են իսրայելական արտադրության գերժամանակակից եւ շատ թանկարժեք (մինչեւ 30 միլիոն դոլար) Elbit Hermes 900 անօդաչուն: Շատ լուրջ սարք է, որը տասնյակ երկրների սպառազինության մեջ է եւ կարող է ավելի քան 30 ժամ օդում մնալ: Չնայած իմ որոշ հայ ընկերների գրածին, սա հարվածային անօդաչու չէ, այն զինված չէ: Դրա խնդիրն այլ է, այն զբաղվում է հետախուզմամբ, ռադիոկապ խլելով ու խոչնդոտներ ստեղծելով հակառակորդի ավիացիայի եւ ցամաքային ուժերի համար: Դրանք արտադրվում են 2009 թվականից եւ իրենց գերազանց են դրսեւորել: Ադրբեջանում այդպիսի մոտ 10 սարք կա, որոշ տվյալներով՝ 15: Հիմա մեկով պակասեց:

Փաստորեն, սա առաջին դեպքն է, որ նման մակարդակի սարքը ոչնչացվում է: Մինչեւ հիմա ոչ մեկին չէր հաջողվել «խփել» դրան, չնայած, որ այդ սարքերը մշտապես կիրավում են Սիրիայում, Իրաքում, Լիբանանում, Սուդանում, Աֆղանստանում ծավալվող ռազմական գործողություններում: Այս մեքենաները նաեւ վերահսկում են ԱՄՆ-ի եւ Մեքսիկայի սահմանը՝ հետեւելով թմրակարտելների գործողություններին, դրանք վաղուց աշխատում են Կոլումբիայում եւ Բրազիլիայում՝ գրոհայինների եւ թմրավաճառների դեմ պայքարի համար:

Այնպես որ՝ կեցցեն հայ զինվորականները: Ապրե՛ք, տղերք»,- գրել է Լապշինը` նշելով, որ իր ինժեներ ընկերոջից հետաքրքրվել է անօդաչու թռչող սարքերից, իսկ վերջինս ասել է, որ միայն լիակատար փնթիներն ու ոչ պրոֆեսիոնալները կարող էին հարվածի տակ դնել ցանկացած բանակի համար «թռչող ուղեղ» համարվող այս սարքը: