«Թող մտքներից հանեն, որ այս մի բանը կարող են մարսել». Կարինե Խոդիկյան

Այսօր Հայելի ակուբում ԵՊՀ լեզվի պատմության ամբիոնի դոցենտ Նարինե Դիլբարյանը նշեց, որ քննարկվում է Լեզվի պետական տեսչության լուծարման հարցը, որովհետև դա ամենաանվտանգ բնագավառն է: «Ես նկատել եմ՝ Կարեն Կարապետյանը գնում է թույլ դիմադրության ճանապարհով։ Նա նայում է՝ ո՞վ է ամենաանվտանգը՝ Լեզվի պետական տեսչությունը։ Քանի որ հայոց լեզվին էլ ինքը տիրապետում է այնքանով, որքանով, իր աշխարհընկալման մեջ նա փոքր տեղ ուներ, և եկեք՝ անկեղծ լինենք՝ լեզվի պետական տեսչությունն էլ բնավ չէր փայլում աշխատանքային սխրանքներով, բայց հոնքն ուղղելու փոխարեն՝ աչքն են հանում։ Ընդ որում՝ խախտվում է ՀՀ Սահմանադրությունը, որովհետև Սահմանադրության մեջ միարժեք նշված է, որ ՀՀ պետական լեզուն հայերենն է, և պետական լեզվի դեմ ոտնձգություններին պետք է արձագանքեն Լեզվի պետական տեսչության ներկայացուցիչները»։ Ինչպես նկատեց՝  մեր երկրում համակարգային որոշումներ չեն կայացվում, որոշումները կայացվում են՝ ելնելով անձնային նպատակահարմարությունից։ Նախարարություններ են ստեղծվում՝ կոնկրետ անձին պաշտոն տալու համար, մարդուն պաշտոնից հանելու համար էլ տեսչություն են փակում։ Այնուհետև առաջարկեց, եթե տեսչության ղեկավարը վատ է աշխատում, ապա պետք է ղեկավարին փոխել, ոչ թե տեսչությունը փակել: «Գրական թերթի» գլխավոր խմբագիր Կարինե Խոդիկյանն էլ, ավելացնելով Նարինե Դիլբարյանի խոսքը նշեց. «Կարող է՝ նախարարությունում մի ամբողջ օղակ ստեղծեն՝ ինչ-որ մեկին պաշտոն տալու, իսկ ինչ-որ մեկին պաշտոնից ազատելու համար՝ մի ամբողջ գերատեսչություն փակեն, բայց թող մտքներից հանեն, որ այս մի բանը կարող են մարսել»։