Անմահները հրամայում են

Վովա Գասպարյանը պարզվում է անմահ է ու նախագահն էլ իրեն երկար ժամանակ է հնարավորություն տվել աշխատելու՝ 60 տարի։ Մայիսյան հաղթանակների տոնի առթիվ «Հաղթանակի» զբոսայգի այցելեց ոստիկանապետը անդավաճան մնալով իր ոճին ու տեսակին, հերթական պատեհ առիթը բաց չի թողել նոր ներկայացում բեմադրելու․ «Նոր կառավարությունում իհարկե լինելու եմ, ես ասել եմ՝ 60 տարով եմ եկել, հաշտվեք այդ մտքի հետ, ես էլ 150 տարի եմ ապրելու»,-տեղեկացրել է ՀՀ ոստիկանապետը, ում դիրքերը կարծես անսասան են դարձել եւ նա երկար տարիներ չի հեռանում իր պաշտոնից, թեպետ պարբերաբար խոսվում է ոստիկանապետի ու իշխանության այս կամ այն բարձրաստիճան պաշտոնյայի, առանցքային դերակատարի միջեւ հակասությունների մասին։ Հիմա էլ վարչապետ Կարեն Կարապետյանի հերթն է, այդ հակասությունը պարեբերաբար երեւում է կառավարության նիստերի ընթացքում վարչապետի խայթոցներից։ Վովա Գասպարյանը, բնականաբար, չի հաստատել այդ հակասության փաստը, սակայն պատասխան խոսքից ամեն ինչ հասկանալի է։ Երբ լրագրողները հետարքրքվեցին Կարեն Կարապետյանի ոստիկաններին ուղղված վերջին հրահանգի մասին, ըստ որի՝ ոստիկանները թերանում են աղբահավաքման հարցում, ոստիկանապետը պատասխանեց՝ էնքա՜ն աղբ կա մեր երկրում հավաքելու։ Գասպարյանը չհստակեցրեց՝ թե ինչ «աղբի» մասին է խոսքը, իշխանության մեջ էլ աղբ լինելու փաստը Վլադիմիր Գասպարյանը չի հերքել․«Աղբ ամեն տեղ էլ լինում է»։ Այդուհանդերձ խիստ տարօրինակ էր մեր օրերի անմահ ոստիկանապետի նյարդային պահվածքը մահկանացու լրագրողների հետ։ Նա անթաքույց հեգնանքով լրագրողներին ծաղրում էր՝ «մեղք եք երեխեք, նյութ չունեք, էլի ինձ հարցեր եք տալիս․․․ հիմա իմ նկարը կդնեք, չէ՞ ու կսկսեք վերլուծություններ անել․․․»,- ի վերջո նյարդերն այնքան տեղի տվեցին, որ հորդորեց «չքվել» լրագրողներին, կամ կառավարության «նորեկների»՝ առողջապահության, էկոնոմիկայի եւ այլ նախարարների տեղն էր մատնացույց անում․«Այ, իրենք նոր են, իրենց հարցեր տվեք»։ Երկարակյաց ու այսուհետ հավերժ ոստիկանապետի համար թերեւս բարդ է հասկանալը, որ լրագրողների՝ իր նկատմամբ անսպառ սերը ի պաշտոնե ու ի գործե է։ Երկրում կուտակված ու ստիկանությանն առնչվող հազարավոր խնդիրների պարագայում 2011 թվականից ոստիկանապետ աշխատող պարոն Գասպարյանի ու լրագրողների շփումը եղել է այս մակարդակից ոչ բարձր, նա խուսափում է մամլո ասուլիսներից, լրագրողների առջեւ հաշվետվությունից, հետեւաբար այլ բան չի մնում, քան Վովա Գասպարյանին տեսնելիս նրան «շրջափակման» մեջ վերցնել ու դառնալ «մեղք»՝ այսինքն կատարել մասնագիտական գործունեությունը, աշխատել, հարցեր տալ՝ ակնկալելով բանական պատասխաններ։ Ի դեպ, մեր սիրելի ոստիկանապետ, դուք ավելի մեղք եք, որովհետեւ օրնիբուն եք աշխատում, գիշեր-ցերեկ խորհրդակցություններ հրավիրում, տարիներ շարունակ բարեփոխումներ եք անում, համենայն դեպս այդ տպավորությունն է ձեւավորվել ձեր հայտարարություններից։ Իսկ նորեկները ի տարբերություն ձեզ հաճախ ու մարդավարի շփվում են չորրորդ իշխանության ներկայացուցիչներիս հետ, ցայտնոտի մեջ չեն ընկնում մեր հարցադրումներից ու շատ ավելի օրինապահ են, քան ՀՀ թիվ մեկ օրենքի պաշտպանը։ Հույս ունենք, որ իշխանական էլիտայի ներկայացուցիչների մոտ փորձի փոխանակում տեղի կունենա, ոստիկանապետը գործընկերների համար կբացահայտի իր անմահության գաղտնիքը, չի խանգարի որ «Անմահ մնալու 10 կանոններ» ձեռնարկով հանդես գա, իսկ մյուսները նրան կսովորեցնեն լրագրողների հետ շփման պարզունակ կանոնները։ Ի դեպ, Վովա Գասպարյանից այդուհանդերձ հնարավոր եղել է մեկ նորմալ պատասխան լսել, որը վերաբերել է Սեյրան Օհանյանի գործունեությանը, պարզվում է՝ ոստիկանապետը լավ չի վերաբերվում, քանզի Օհանյանը քարոզարշավի ժամանակ թույլ է տվել մի մեծ սխալ․««Սասնա ծռերին» հերոսներ անվանելը։ Սպան իրավունք չունի սպայի սպանողին այդպիսի արտահայտությամբ դիմել», իրավացիորեն նկատել է Գասպարյանը, քանզի պաշտպանության նախկին նախարարը, լինելով սպայական կազմի ներկայացուցիչ, նույնիսկ պարտավոր էր զերծ մնալ ճակատային հայտարարություններից ու իրողությունը քողարկել սոցիալական բեւվեռվածության եւ այլ քողի ներքո։ Անի Սահակյան