Հովիկ Աբրահամյանը վերադառնում է
Այս տարվա սկզբին ՀՀԿ-ից հեռացած նախկին վարչապետ Հովիկ Աբրահամյանը սահուն քայլերով քաղաքականություն վերադարձի ճանապարհն է բռնել: Մեկ շաբաթ առաջ նա այցելեց Ծիծեռնակաբերդի հուշահամալիր ու անակնկալ հայտարարեց, որ ՀՀԿ-ից չի հեռացել, հիմա էլ նրան տեսնում ենք Հաղթանակ զբոսայգում, որտեղ նա եկել է ՝ հարգանքի տուրք մատուցելու Հայրենական մեծ պատերազմում և Շուշիի ազատագրման պայքարում զոհված հերոսների հիշատակին: Հովիկ Աբրահամյանը երկրորդ հայտնությունը հեռացումից հետո կրկին նշանավորվեց հայտարարություններով, որոնք արեց նախկին վարչապետը: Հովիկ Աբրահամյանը նախ հերքեց շրջանառվող տեղեկությունն այն մասին, որ նախագահ Սերժ Սարգսյանի կողմից աշխատանքի առաջարկ է ստացել: Մամուլը գրում էր կոնկրետ ԱԱԽ քարտուղարի պաշտոնի մասին, այդուհանդերձ չբացառեց, որ կարող է ընդունել պաշտոնի առաջարկ, Աբրահամյանն ասաց, թե այդ մասին խոսելը հիմա ճիշտ չէ, քանզի նման բան չկա, բայց չմերժեց որեւէ հավանականություն: Նա նշեց, որ քաղաքականությունից չի հեռացել, զբաղվելու է հայանպաստ գործունեությամբ: «Ընդհանուր առմամբ, այն գործունեությունը, գործողությունները, որոնք տանում են հայ ազգի զարգացմանը, ամրապնդմանը, ես դրանց ակունքներում կանգնած եմ»: Պարզվեց նաեւ, որ նա նորմալ հարաբերություններ ունի Սերժ Սարգսյանի հետ.<<Ինչպես նախկինում>>,- հստակեցրեց Հովիկ Աբրահամյանը: Վերջինիս հարցազրույցը դիտելիս առաջին տպավորությունը, որ ունենում ես, հիշողությունը ստուգելու ցանկությունն է, մի՞թե ամիսներ առաջ Հովիկ Արահամյանի ու Սերժ Սարգսյանի , կամ փոխաբերական ասած՝ <<առվակների>> ու <<գետերի>> միջեւ հեռահար պատերազմը:Այս տարի հունվարին, երբ վարչապետի պաշտոնից զրկված Հովիկ Աբրահամյանը ՀՀԿ-ն լքելու որոշում կայացրեց, դրան հաջորդած ՀՀԿ խորհրդի նիստում Սերժ Սարգսյանը խոսելով ՀՀԿ-ից ու առհասարակ՝ իշխանական համակարգից հեռացողների մասին, նախ ծիծաղելի որակեց պնդումները, թե Հանրապետականից արտահոսք է սկսվել, վստահեցնելով, որ միայն վերջին մի քանի ամսիների ընթացքում իր ղեկավարած ուժին անդամագրվել է 11 հազարից ավելի մարդ, ապա այլաբանորեն նախազգուշացրեց՝ նրանք ովքեր հեռանում են, ապագա չեն ունենալու: Այդ հայտարարությունն, ի դեպ, ոգևորեց որոշ հանրապետականների, որոնք ծափերով ողջունեցին իրենց ղեկավարի խոսքը: «Մայր գետերը, լայն գետերը, առաջընթաց են ապահովում իրենց հոսքի ողջ երկայնքով: Կյանք են տալիս, հաց են տալիս, ջուր են տալիս: Եվ այն առվակները, որոնք պոկվում են մայր գետից և կարճ ժամանակում նորից չեն մտնում նույն հոսքի մեջ, չորանում են ու գնում: Սա է բնության օրենքը»,- պատկերավորեց Սարգսյանը: «Գետերի և առվակների փոխաբերությունը լավն էր: Ինքս էլ հավանել եմ: Չմոռանանք նաև, որ մայր գետերը ոչ այլ ինչ են, քան ինքնամոռաց առվակների միավորում: Բայց ինչ-որ պահից գետ լցվող տեխնոլոգիական գործարանի խառնուրդային ջրերը կմխտռեն ողջ մայր հունը, անպիտան կդառնա ամբողջը: Միգուցե մինչ այդ պոկված՝ դեռ սեփական հողի հոտը կրող առվակները, մինչև ոչնչանալը, հասցնե՞ն գոնե մեկ-երկու բնակավայրի կյանք պարգևել»,- նախագահին անմիջապես արձագանքեց Հովիկ Աբրահամյանը Ֆեյսբուքի իր էջում: Նախկին վարչապետի ակտիվությունը մի բանի մասին է միայն հուշում, որ նա ընդունում է Սերժ Սարգսյանի խոսքերի ճշմարտացիությունը ու մայր գետին միանալու քայլեր է անում: Քաղաքականության ինտրիգների ու վայրիվերումների մեջ թրծված Հովիկ Աբրահամյանը բոլորից լավ է հասկանում, որ ստվերում մնալով կնքելու է իր քաղաքական կարիերայի մահկանացուն, քանի ուզենք, թե ոչ առաջիկան գոնե մեկ տարում քաղաքական գործընթացները ղեկավարվելու են մեկ մարդու կողմից, եւ այդ մարդը Սերժ Սարգսյանն է: Չմոռանանք, որ նախկին վարչապետը բոլոր երեք նախագահների պաշտոնավարման շրջանում հաջողացրել է մնալ իշխանության մեջ, ավելին՝ վերընթաց կարիերա է արել՝ հասնելով վարչապետի պաշտոնին, որին այդպես ձգտում էր, հետեւաբար նրա քաղաքական հոտառության վրա պետք չէ կասկածել, հատկապես, որ ներքաղաքական դաշտում առաջիկա եւ հաջորդիվ տարիներին բուռն զարգացումներ են սպասվում իշխանությունը պահել-վերցնելու համար, իսկ այդ ընթացքում ցանկացածը կարող է դերակատար լինել, այդ թվում՝ Հովիկ Արգամիչը: Անի Սահակյան
Հետևեք մեզ Viber-ում
