Տանկ են տեղաշարժել, ողջ հասարակությունը դրա մասին է խոսում, անհարմար չէ՞. Դավիթ Բաբայան

Հակառակորդի զրահատեխենիկայի տեղաշարժը հոգեբանական արտահայտության մի ձեւ է: armtimes.com-ի հետ զրույցում այսպես արձագանքեց ԼՂՀ նախագահի մամուլի խոսնակ Դավիթ Բաբայանը՝ անդրադառնալով երեկ հակառակորդի կողմից Թափկարակոյունլու-Թալիշ ուղղությամբ կատարած զրահատեխնիկայի (շուրջ 10 տանկ) տեղաշարժին: - Պարոն Բաբայան, ըստ ձեզ հակառակորդի զրահատեխնիկայի տեղաշարժն ի՞նչ կարող է նշանակել: - Ոչ մի բան չի նշանակում, սա պարզապես իրենց քայլերն են, որեւէ բան չի փոխվում, որեւէ նպատակ չունի, ոչ մի տրամաբանություն այստեղ չկա: Բերել առաջ, հետո տանել, պարզապես հոգեբանական արտահայտության մի ձեւ է. բոլորս էլ գիտենք, որ սա առօրյա է, տարօրինակ երեւույթ չէ: - Ապրիլյան պատերազմից հետո սա առաջի՞ն դեպքն է, որ հակառակորդը տանկեր է տեղաշարժում: - Իհարկե՝ ոչ: Իրենք նաեւ զորավարժություններ էին վերջերս կատարում: Նման տեղաշարժեր երբեմն լինում են: - Պարբերաբա՞ր: - Պարբերական բնույթ այն առումով, որ տեխնիկա ունեն պետք է տեղաշարժեն, այդ տեխնիկան չի կանգնելու չէ՞ իր տեղը: Հետեւաբար՝ պետք չի սա ողբերգական ինչ-որ մի բան դիտել եւ, ըստ այդմ, ընկնել խուճապի մեջ: Տեխնիկա է, տեղաշարժել, տեղաշարժել են, հիմա ի՞նչ անենք: Ամեն անգամ իրենք ինչ-որ նպատակների հասնում են: Մի քանի տանկ են տեղաշարժել՝ այստեղ-այնտեղ, ողջ հասարակությունը դրա մասին խոսում է, անհարմար չէ՞, ինչի՞ համար: Պետք է հասկանալ, որ նման բաներով նրանք փաստորեն փորձում են ծաղրել մեզ: Տանկ ա՝ հերն էլ, անիծած, ի՞նչ ա եղել: - Իրավիճակը սահմանին հիմա ինչպե՞ս է: - Ամենօրյա, որեւէ նոր զարգացում կամ առավելեւս անհանգստացնող ինչ-որ երեւույթներ չկան: Սրա հիմնական նպատակն այն է, որպեսզի հանրությանը նորից հոգեբանական ճնշումների ենթարկեն: Ամոթ է, որ մենք սկսում ենք դրա մասին մտածել, խոսել ինչ-որ անկապ շարժերի մասին: Մեր բանակը միշտ էլ պատրաստ է ցանկացած պահին կանգնել սահմանների պաշտպանությանը: Տարօրինակ բան չկա, որ իրենք տեխնիկա են շարժում՝ բերում-տանում: Հիշեցնեք, որ այս գիշեր, բացի հրադադարի ռեժիմի խախտման դեպքերից ժամը 13:30-ի սահմաններում Թափկարակոյունլու-Թալիշ ուղղությամբ կատարել է զրահատեխնիկայի (շուրջ 10 տանկ) տեղաշարժ: Ժամը 14:55-ին դիտարկված տանկերը վերադարձել են իրենց ելման շրջանները: Ըստ ՊԲ հաղորդագրության, առաջապահ զորամասերը ադրբեջանական զինուժի ակտիվությունը ճնշելու համար դիմել են պատասխան գործողությունների եւ շփման գծի ողջ երկայնքով իրականացրել աչալուրջ մարտական հերթապահություն: