Նիկոլ Փաշինյանի անձնական «օգտագործման» Լիսկաները
«Քաղաքացիական պայմանագիր» կուսակցության վարչության որոշմամբ Տրդատ Սարգսյանը նշանակվել է կուսակցության աշխատակազմի ղեկավար։ Տրդատ Սարգսյանը Վայոց ձորի նախկին մարզպետն էր: Նա հրաժարական էր ներկայացրել Վայոց Ձորում փոխգնդապետ Արա Մխիթարյանին դաժան ծեծի ենթարկելու միջադեպի առնչությամբ: Փոխգնդապետի հարազատները մինչև հիմա պնդում են, որ Սարգսյանը մասնակից է եղել ծեծին։
Կասկածները չեն փարատվել, փոխգնդապետը շարունակում է կոմայի մեջ մնալ, սակայն Տրդատ Սարգսյանը նշանակվում է կուսակցական պատասխանատու աշխատանքի: Մի կուսակցության, որը ստանձնել է պետության կառավարումը եւ սա սոսկ կուսակցական, թիմի ներսում աշխատանք չէ: Կարելի է պատկերացնել, թե ինչպես կարձագանքեր ընդդիմադիր պատգամավոր Նիկոլ Փաշինյանն այս նշանակմանը, այո, ճիշտ այնպես, ինչպես Բուդաղյանների ողբերգական միջադեպից եւ Սյունիքի ոճրրագործ երբեմնի մարզպետ Լիսկայի վերանշանակման ժամանակ, երբ Փաշինյանն արձանագրում էր, որ գլխավոր դատախազը մաքրեց Լիսկային, գործը կարվեց այնպես իբր նա ներկա չի եղել միջադեպին, իսկ իրականությունն այն է, որ Սյունիքի ժողովուրդը պատանդ է ընկել Լիսկայի ձեռքը:
Մեր օրերի իրադարձությունները դեժավյուի տպավորություն են թողնում: Հիմա էլ ժողովրդին դարձրել են քայլարածների պատանդը: Կապ չունի մարդը հանցանք է գործել, թե չունի տվյալ ոլորտում մասնագիտական ունակություններ, կախված այն բանից, թե նա քայլել է հեղափոխության օրերին եւ Փաշինյանից քանի մետր հեռավորության շառավղով, ըստ այդմ էլ պետք է բարձր պաշտոն ունենա: Տերպետրոսյանական ժամանակների <<ՀՀՇ-ական լինի, թեկուզ պոլի փայտ լինի>> լոզունգն այսօր առավել քան կենսունակ է դարձել;
ՄԵԿ օր առաջ էլ ՏՄՊՊՀ պաշտոնում նշանակվեց Գագիկ Ջհանգիրյանի փեսան Կարեն Սեդրակյանը, նույն օրը ԿԲ անդամի պաշտոնում ներկայացվեց Հակոբ Սիմիդյանի ընկերը, ԱԱԾ պետն էլ իր սանիկ-ազգականնրին է լցրել համակարգ ու այսպես ամենուր, բոլոր ոլորտներում: Բայց համաձայնեք Տրդատ Սարգսյանի նշանակումը ոչ մի կերպ կուլ չի գնում: Քանզի անգամ նախկինում հիմնականում չէին անցնում բարոյականության սահմանները: Հիշենք Հարսնաքարի դեպքը, Ռուբեն Հայրապետյանն ուներ իր մտերիմ ընկեր Սերժ Սարգսյանի բարձր հովանավորչությունը, բաց նախընտրեց վայր դնել մանդատը:
Անի Սահակյան
Հետևեք մեզ Viber-ում
