ՀՀ տնտեսության մեջ աննորմալ իրավիճակ է ստեղծվել

Երկարատև գնանկումային փուլից հետո Հայաստանում այս տարվա ապրիլին գրանցվել է գնաճ։ Անցած տարվա ապրիլի համեմատ սպառողական գները աճել են 1.2 տոկոսով։ Սպառողական գների աճը հիմնական պայմանավորված է սննդամթերքի թանկացմամբ։ Մեկ տարվա ընթացքում սննդամթերքը թանկացել է 5.9 տոկոսով։ Սա աննախադեպ ցուցանիշ է անցած մեկ-մեկուկես տարիների ընթացքում։ ՀՀ ԱՎԾ արձանագրած տվյալների համաձայն՝ անցած տարվա ապրիլի հետ համեմատ այս տարվա ապրիլին, բանջարեղենեը թանկացել է 28 տոկոս։ Սա ահռելի, աննորմալ, անտրամաբանական գնաճ է։ Այս մասին գրել է «Հայկական Ժամանակը»-ը։ «Անտրամաբանական ու սարսափելի գնաճ է արձանագրվել մրգերի պարագայում։ Գնաճը այստեղ կազմում է 22.2 տոկոս։ Ձկնամթերքի շուկայում անցած տարվա համեմատ արձանագրված 23.6 տոկոս գնաճը նույնպես տրամաբանական բացատրություններ չունի։ Շաքարավազի թանկացման առումով ամեն ինչ պարզ է։ Անցած տարվա ապրիլի համեմատ շաքարավազը Հայաստանում թանկացել է 15.6 տոկոս։ Հագուստեղենն ու կոշկեղենը անցած տարվա ապրիլի համեմատ էժանացել է 4.6 տոկոս, տնային գործածության ապրանքները՝ 5.6 տոկոսով։ Մի խոսքով, ՀՀ տնտեսության մեջ աննորմալ իրավիճակ է ստեղծվել, և գների այսպիսի տատանումները լուրջ ուսումնասիրության կարիք ունեն», - հավելել է թերթը։