Երեկ՝ Ալիևը, այսօր՝ Պնախարարը. Իրավիճակը գնում է դեպի սրացում

Երեկ՝ Ալիևից, այսօր էլ՝ Ադրբեջանի պաշտպանության նախարար Զաքիր Հասանովից հնչեցին հոխորտանքներ:

Շփման գծում հերթապահություն իրականացնող ադրբեջանցի զինծառայողները պետք է առաջնորդվեն այն պահանջներով, որոնց մասին իր վերջին ելույթներում բարձրաձայնել է նախագահ Իլհամ Ալիևը, - առաջնագիծ այցի ընթացքում նման հայտարարությամբ է հանդես եկել Ադրբեջանի պաշտպանության նախարար Զաքիր Հասանովը։

Ադրբեջանական APA գործակալությունը փոխանցում է, որ այցի ընթացքում ռազմական գերատեսչության ղեկավարին ուղեկցել են բանակային հրամանատարության մի շարք ներկայացուցիչներ, այդ թվում` Գլխավոր շտաբի պետ Նեջմեդին Սադիխովը։
Ադրբեջանական աղբյուրները, սակայն, չեն հստակեցնում, թե շփման գծի հատկապես որ հատված են այցելել բարձրաստիճան զինվորականները։

Ալիևին երեկ ծավալուն հակադարձեց վարչապետի մամլո խոսնակ Մանե Գևորգյանը՝ նկատելով, թե միամտորեն մտածել ենք, թե Ալիևը ծանոթ է անտիկ պատմագրության ամենապոպուլյար գործերին խորհուրդ էր տվել կարդալ՝ 16-19-րդ դարերի օսմանցի հեղինակներին, որոնցից մի մասը ոչ միայն առատ տեղեկություններ է հաղորդել Հայաստան աշխարհի մասին, այլև ճամփորդելով Արմենիա-Էրմենիստանով, շփվել է նրա հայ-քրիստոնյա բնակիչների հետ։

«Հակառակ դեպքում 19-րդ դարի որևէ փաստաթղթում հայերի հիշատակված լինել-չլինելու մասին խոսելով ինքն իրեն վատ վիճակի մեջ չէր դնի: Անտիկ ժամանակից հայերը և Հայաստանը հիշատակվում են պատմագրական երկրներում, պատմական փաստաթղթերում, քարտեզներում: Կարծել ենք, թե պարոն Ալիևի իմացությունը նրան պիտի թույլ տար լավ իմանալ դեռևս վաղ միջնադարում Արցախում հայերի կողմից կառուցված ու հայատառ արձանագրություններով պարուրված Ամարասի, Դադիվանքի, 13-րդ դարի Գանձասարի մասին: Վերջինս ի դեպ, մինչև պարոն Ալիևի հիշատակած Քյուրակչայի պայմանագրի ժամանակները 18-րդ դարի առաջին կեսին Արցախում հայերի կողմից ստեղծված, Իրանի Նադիր շահի կողմից հատուկ հրովարտակով Իրանի դաշնակից երկիր ճանաչված Խամսայի մելիքությունների հոգևոր կենտրոնն էր: Եվ ոչ թե վարչապետ Փաշինյանն է ասում, որ Արցախը Հայաստան է, այլ հենց Ամարասը, հենց Դադիվանքը, հենց Գանձասարը՝ իրենց հայերեն գրավոր արձանագրություններով»:

Գալով ԼՂ հարցի բանակցային գործընթացին, Փաշինյանի մամլո խոսնակը շեշտել է, որ Փաշինյանը բանակցությունների գործընթացն արդյունավետ դարձնելու հստակ բանաձև է առաջարկել. «Ղարաբաղի հարցի որևէ լուծում պետք է ընդունելի լինի Հայաստանի ժողովրդի, Արցախի ժողովրդի և Ադրբեջանի ժողովրդի համար: Այս բանաձևն ընդունում է միջազգային հանրությունը, բայց այս բանաձևը չի ընդունում պարոն Ալիևը, պնդելով, թե հարցի կարգավորումը պետք է ընդունելի լինի միայն Ադրբեջանի ժողովրդի համար: Ու նա մեզ մեղադրում է ֆաշիզմի մե՞ջ: Եվ ինչու՞ է անընդհատ պնդում, թե Ղարաբաղի հարցն ունի ռազմական լուծում: Մեր արձագանքը նույնն է. եթե հարցն ունի ռազմական լուծում, ուրեմն Արցախի քաղաքացիները վաղուց լուծել են այդ հարցը: Պարոն Ալիևը հարցի չկարգավորման մեջ մեղադրում է ԵԱՀԿ ՄԽ համանախագահներին, Հայաստանին, պատմական արդարությանը, մինչդեռ պիտի մեղադրի միայն ինքն իրեն, որ վաղուց հեռացել է քննարկումների կառուցողական դաշտից»:

Հաշվի առնելով այն հանգամանքը, որ այսօր Ադրբեջանի պաշտպանության նախարարն ադրբեջանական բանակին կոչ է արել Ալիևի նախորդ օրվա հոխորտանքներին, թե պետք է առաջնորդվեն այն պահանջներով, որոնց մասին իր վերջին ելույթներում բարձրաձայնել է Ալիևը, ապա կարելի է փաստել, որ պաշտոնական Բաքուն անցնում է ընդդեմ հայկական քարոզչության ավելի կոշտ քաղաքականության:

Եվ ոչ միայն... Հնարավոր է սահմանային իրավիճակի սրացում՝ դիվերսիոն գործողություններով, զինադադարի պարբերական խախտումներով:

Մետաքսյա Շալունց