Մեսիջներ Երևանից՝ Ստեփանակերտ. ինչու էր Մնացականյանը հասել Արցախ

Հուլիսի 4-ին աշխատանքային այցով Արցախ էր ժամանել Հայաստանի ԱԳ նախարար Զոհրաբ Մնացականյանը, որը հանդիպել է Արցախի նախագահ Արայիկ Հարությունյանի հետ, ԱԳ նախարար Մասիս Մայիլյանի հետ:

Արայիկ Հարությունյանի հետ հանդիպմանը Մնացականյանը նշել է. «Արցախում կայացած մրցակցային, ազատ, ժողովրդավարական ընտրություններն ի ցույց դրեցին Արցախի ժողովրդի և ղեկավարության հաստատակամությունը՝ ամրապնդելու և կառուցելու ապագան հենց այդ հիմքերի վրա: Բազմիցս ընդգծել ենք այն գերակայությունները, որոնց շուրջ կառուցում ենք մեր աշխատանքը. Արցախի ներգրավվածությունը, ինքնորոշման իրավունքի իրացումը, ինչպես նաև Արցախի անվտանգային համակարգի կայունությունը: Այս կարևորագույն դրույթների հիման վրա մենք կառուցում ենք մեր բոլոր դիրքորոշումները՝ հասկանալով, որ մենք պետք է հասնենք այնպիսի լուծման, որն ընդունելի է բոլոր երեք կողմերի համար»:

Չնայած նրան, որ Ադրբեջանը շարունակում է Հայաստանը գրավելու հայտարարություններ անել, չնայած որ Հայաստանն ու Երևանը «ադրբեջանական տարածք» են անվանում՝ Հայաստանի իշխանությունները դեռ հիշեցնում են, որ ադրբեջանական կողմի համար էլ պետք է ընդունելի լինի ղարաբաղյան հնարավոր լուծումը:

Առհասարակ, անհասկանալի է, մի կողմից Փաշինյանն ու Մնացականյանը խոսում են՝ Արցախի մասնակցության մասին՝ խաղաղ բանակցային գործընթացում, քաջ գիտակցելով, որ պաշտոնական Բաքուն դեմ է դրան:

Փոխանակ մտածելու, թե ինչպե՞ս անել, որպեսզի Ադրբեջանը հաշվի նստի այդ փաստի հետ՝ շարունակաբար խոսում են՝ «երեք կողմերի համար ընդունելի լուծման» մասին:
Այսքանից հետո, Հայաստանի արտգործնախարարը անվերջ խոսում է՝ Արցախի ժողովրդին, Արցախի ժողովրդի և Արցախի ղեկավարության մոտ խաղաղ գործընթացի հանդեպ այդ սեփականության զգացման ամրապնդման մասին:

Զոհրաբ Մնացականյանը Ստեփանակերտում հանդիպել է Արցախի ԱԳ նախարար Մասիս Մայիլյանի հետ: Նրանք քննարկել են հունիսի 30-ին ԵԱՀԿ Մինսկի խմբի համանախագահների միջնորդությամբ և մասնակցությամբ՝ Հայաստանի և Ադրբեջանի ԱԳ նախարարների միջև կայացած տեսակոնֆերանսին: Այդ համատեքստում ԱԳ նախարար Մնացականյանը նշեց. «Նախևառաջ դա զուտ գործնական հարց է, որովհետև խաղաղ կարգավորումը վերաբերում է Արցախի ժողովրդին: Սա անհերքելի իրողություն է, որը պահանջում է Արցախի ժողովրդի և նրանց կողմից ընտրված իշխանությունների ավելի ընդգծված ներկայություն և վերջիններիս մոտ խաղաղ գործընթացի հանդեպ սեփականության զգացման ամրապնդում»:

Խաղաղ գործընթացի միջավայրի ձևավորման և Արցախի ժողովրդի համապարփակ անվտանգության շարունակական ապահովման անհրաժեշտության համատեքստում Հայաստանի ԱԳ նախարարը նշել է. «Մենք բազմիցս ընդգծել ենք, որ խաղաղ կարգավորումը որևէ այլընտրանք չունի: Ասելով դա՝ ընդգծում ենք նաև, որ և՛ Արցախի ժողովուրդը, և՛ Արցախի իշխանությունները ավելի քան վճռական են պաշտպանելու իրենց անվտանգությունը, իրենց անկախությունը և իրենց զարգացման իրավունքը»:

Ստեփանակերտում Զոհրաբ Մնացականյանը հանդիպել է նաև Ադրբեջանից հայ փախստականների միության, Արցախի ժուռնալիստների միության, Ստեփանակերտի մամուլի ակումբի, Շուշիի կանանց ռեսուրսային կենտրոնի, Երիտասարդության միջազգային քրիստոնեական միության (YMCA), Քաղաքացիական նախաձեռնությունների կենտրոնի և Ժողովրդական դիվանագիտության ինստիտուտի ղեկավարների հետ: Մնացականյանը ներկայացրել է Լեռնային Ղարաբաղի խաղաղ կարգավորման գործընթացում ՀՀ մոտեցումները և կարևորել է քաղաքացիական հասարակության դերը հումանիտար ոլորտի շփումներում։

Մնացականյանի այցը Ստեփանակերտ, վստահաբար ունեցել է պատճառ: Ինչպես երևում է, Հայաստանի արտգործնախարարը Մամեդյարովի հետ հանդիպումից հետո ցանկացել է Արցախում շոշափել տրամադրություններ: Հնարավոր է, որոշ կարևոր դետալներ Մնացականյանը փոխանցել է Արցախի նախագահին ու արտգործնախարարին:

Մետաքսյա Շալունց