Նորերի կեղտերը նախկինների արածներով կոծկելու դիմակը

Ողջ կյանքում լրագրող և ընդդիմադիր թերթի խմբագիր աշխատած Նիկոլ Փաշինյանը ոչ մի կերպ չի կարողանում հաշտվել ընդդիմադիր մեդիայի գոյության և այլակարծության հետ:

Եվ այս հարցում Փաշինյանին մասնագիտացված հատուկ ծառայություն մատուցելու սև գործը առանձնակի հաճույքով իր վրա է վերցրել ՀՌԱՀ նախագահ Տիգրան Հակոբյանը:
Արմնյուզ և 5-րդ ալիք հեռուստաընկերություն են այցելել ոստիկանները՝ վարույթ հարուցելու ծանուցմամբ։ Վարույթը հարուցվել է, քանի որ տաղավարային հաղորդում վարողները եթերում դիմակ չեն կրել: Սա այն դեպքում, երբ, ինչպես խնդրի առնչությամբ հայտարարել է Արմնյուզի գլխավոր խմբագիր Լիլիթ Թումանյանը, հեռուստատեսային ոլորտի կարգավորող մարմին ՀՌԱՀ-ից թե' բանավոր, թե' գրավոր հաստատում են ստացել, որ սոցիալական հեռավորության պահպանման դեպքում դիմակ կրելը կամավոր է։ <<Ըստ ոստիկանների, նմանատիպ վարույթներ կան նաև այլ հեռուստատեսությունների նկատմամբ։ Լրատվամիջոցների դեմ արշավը սկսված է>>,- գրել է Թումանյանը։

Խնդրին անդրադարձել է նաև «5-րդ ալիք» Հ/Ը-ի տնօրեն Հարություն Հարությունյանը։ <<Պարետը պետք է հասկանա, որ տաղավարը գրասենյակային տարածք չէ, եւ եթե այդ տաղավարից մենք արտադրանք ենք տալիս, նշանակում է այն արտադրական է. ես հրաժարվել եմ ստորագրել եւ ընդունել վարչական վարույթ բացելու ծանուցագիրը>>,- գրել է նա:

Հեռուստաընկերության ղեկավարները, ինչպես Հարությունյանն է նշել, բացատրել են ոստիկաններին, որ հյուրի եւ հարցազրույց վարողի հեռավորությունը կազմում է 2 մետր 80 սմ: Այսինքն՝ սոցիալական հեռավորությունը ապահովված է եւ վարչական վարույթ բացելու պարտադրանքը ապօրինի գործողություն է: Կան տաղավարներ, որտեղ միայն մեկնաբանն է աշխատում, հետևաբար այս դեպքում սոցիալական հեռավորություն պահելու խնդիր չկա: Ի վերջո, կա նաև միջազգային պրակտիկա. պարետն ու վարչապետը միջազգային հեռուստաընկերություններ թերևս չեն դիտում, այլապես կտեսնեին, որ մեկնաբանները դիմակ չեն կրում: Դա, իսկապես արտադրական տարածք է, և այս դեպքում դիմակով տաղավարային մեկնաբանը եթերում նաև հակաէսթետիկ է:

Բայց սա մի կողմ: ՀՌԱՀ նախագահ Տիգրան Հակոբյանն այսքանից հետո, փոխանակ փորձեր մտահոգություն հայտնել, կատարվածին գնահատական տալ, մի երկարաշունչ տրակտակ է հրապարակել, թե գզրոցներում այնպիսի փաստեր ունի մեդիայի դեմ ճնշումների մասին, որոնց համեմատ ԶԼՄ-ին 10 հազար դրամով տուգանելը գրեթե բարեգործություն է: Իսկ վերջում ՀՌԱՀ նախագահը ինքն իրեն և մեզ բոլորիս մաղթել է, որ այլևս «Լրատվամիջոցների դեմ արշավը» լինի միայն այսպիսին` 10 000 դրամ տուգանքով…. 

Նախ, ի պաշտոնե ՀՌԱՀ նախագահն այն մարդն է, որը պարտավոր է անել ամեն ինչ, որպեսզի լրատվամիջոցների դեմ որևէ արշավ, անգամ 10 հազար դրամ տուգանքի տեսքով, չլինի: Խնդիրն այս դեպքում ոչ թե տուգանքի չափն է, այլ ոստիկանին լրատվամիջոցի վրա ուղարկելը: Իսկ եթե ոստիկանը մտնում է խմբագրություն, անկախ ամեն ինչից, դա ունի, ունեցել է և կունենա քաղաքական ենթատեքստ: Այդպես եղել է միշտ: Դեռ ՀՀՇ-ի ժամանակներից հանրային գործունեություն ծավալած և Սերժ Սարգսյանի բարեհաճությանը հասնելու համար տևական ջանքեր գործադրած Տիգրան Հակոբյանը չի կարող այս մասին չիմանալ:
Նորերի կեղտերը նախկինների արածներով կոծկելը անշնորհակալ և ամոթալի գործ է: Ի վերջո, իշխանությունները մի օր նախկին են դառնում, իսկ մեդիան ամեն ինչ փաստագրելու և հիշելու հատկություն ունի: Ձեզ էլ կհիշեն:

 Հայկ  Դավթյան