Անհույս վիճակ․ բավարար բազա՝ դատարան դիմելու համար

 Ենթադրենք` 20 հազար դեպքը իմ սխալն է, բա աշխարհում գրանցված 10 մլն դեպքը ում սխալն է: Այս ինքնախոստովանական արդարացում հիշեցնող բառերը մեջբերում են վարչապետ Նիկոլ Փաշինյանի ելույթից։

Փաշինյանը նաև հայտարարել է, որ 100 նոր վարակվածից 15-ը անխուսափելիորեն հոսպիտալացվելու է, որից 5-ը անխուսափելիորեն հայտնվելու է վերակենդանացման բաժանմունքում, որից երկուսը, ցավոք եւ ի հեճուկս բոլոր ջանքերի, մահանալու է:

Թերևս ենթագիտակցորեն հեղափոխական վարչապետն ու իր թիմը հասկանում են, որ իրենք, այո՛, ունեն մեղքի իրենց բաժինը՝ համավարակի դեմ պայքարի տապալման անփառունակ գործում։ Մեր երկրի բնակչության թիվը մոտ 3 մլն է։ Եթե մենք այս պահին ունենք մոտ 26650 հաստատված դեպք, նշանակում է 1 մլն բնակչի հաշվով վարակվածների թիվը կազմում է ավելի քան 8800 մարդ։ Ընդհանւոր առմամաբ պաշտոնապես վարակված է ՀՀ բնակչության մոտավորապես 0,9 տոկոսը, թեպետ եթե հավատանք հենց վարչապետին, իրական վարակվածների թիվը 3-4 անգամ ավելի մեծ է։ Մահվան դեպքերի թիվը Հայաստանում 459 է հասել, այսինքն՝ 1 մլն բնկչի հաշվով մահվան դեպքերի թիվը 153 է կազմում։ Աշխարհում Covid-19-ի դեպքերի ընդհանուր թիվը մոտենում է 10.7 միլիոնին, մահացածների թիվն անցել է 516 հազարը։ Աշխարհում բնակչության թիվը հասնում է մոտ 7 միլիարդի, հետևաբար աշխարհում վարակված է բնակչության 0,15 տոկոսը, որը Հայաստանում համավարակի տարածման ցուցանիշից ավելի քան 6 անգամ ցածր է։ Մեզ մոտ վարակվածության ցուցանիշները համաշխարհային միջինից անհամեմատ ավելի բարձր են։ Սա փաստ է, և իշխանությունը դա բացահայտ խոստովանում է։

Աշխարհի տարբեր երկրներում դատական և հանրային գործընթացներ են սկսվել ընդդեմ պետության ղեկավարների՝ համավարակի դեմ պայքարի արդյունավետությունը վիճարկելու նպատակով։ Շվեդիայում հանձնաժողով է ստեղծվել, որը գնահատելու է, թե արդյոք իշխանությունների արձագանքը համաճարակին համարժեք է եղել: Իտալիայում դատական հայց է ներկակացվել ընդդեմ կառավարության, և վարչապետին մեղադրանք են ուզում առաջադրել համավարակի դեմ պայքարը ոչ ճիշտ կազմակերպելու համար, որը բազմաթիվ իտալացինեի մահվան պատճառ է դարձել։

Հայաստանում ԱԺ «Բարգավաճ Հայաստանն» ու «Լուսավոր Հայաստան» խմբակությունները դիմել են Ազգային ժողովի նախագահին` ստեղծելու կորոնավիրուսի դեմ պայքարում կառավարության ու պարետատան նախաձեռնած միջոցառումների արդյունավետությունն ուսումնասիրող խորհրդարանական քննիչ հանձնաժողով։ Պատգամավորների ընդհանուր թվի առնվազն մեկ քառորդի պահանջով, իրավունքի ուժով ստեղծվել է ԱԺ քննիչ հանձնաժողով: Հայաստանում համավարակի դեմ պայքարի տապալումը ակնառու է անգամ առանց հատուկ քննիչ հանձնաժողովի։
Ինչ արդյունք կարող է տալ այդ հանձնաժողովն այս պահին, դժվար է ասել։ Բայց միայն պաշտոնական միջոցառումների և պետության կողմից ձեռնարկված քայլերի վերաբերյալ տեղեկատվությն ամբողջացումը, ինչով եթադրաբար պետք է զբաղվի ԱԺ քննիչ հանձնաժողովը, կարող են տվյալների բավարար բազա հանդիսանալ, հետագայում ներկա իշխանությունների դեմ գործ հարուցելու և նրանց համավարակի դեմ պայքարում հանցավոր անփութություն ցուցաբերելու և հանրային առողջությունը ձախողելու համար։

Հայկ Դավթյան