Սա կայուն վիճակ չէ. «Ջայլամի» քաղաքականությանը պետք է վերջ տալ
Հայաստանի և Ադրբեջանի ԱԳ նախարարներ Զոհրաբ Մնացականյանն ու Էլմար Մամեդյարովը երեկ տեսակոնֆերանս անցկացրեցին՝ ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցիչ Անջեյ Կասպրչիկի միջնորդությամբ և մասնակցությամբ։
Հայաստանն ու Ադրբեջանը դժգոհել եմ միմյանցից:
Մնացականյանն ընդգծել է Ադրբեջանի կողմից հնչեցվող ռազմատենչ և ապակառուցողական հայտարարությունների անթույլատրելիությունը՝ նշելով, որ դրանք վնաս են հասցնում խաղաղ գործընթացի միջավայրին և խոչընդոտում ժողովուրդներին խաղաղության նախապատրաստելու հանձնառության իրականացումը: Միևնույն ժամանակ նա կարևորել է Արցախի ժողովրդի համապարփակ անվտանգության շարունակական ապահովման անհրաժեշտությունը, այդ թվում՝ ազատ և անվտանգ տեղաշարժի միջոցով:
Մամեդյարովն էլ իր հերթին համանախագահներին բողոքել է Հայաստան-Արցախ ավտոմայրուղու կառուցման հեռանկարների թեմայով:
Երեկ ավելի ուշ համանախագահները հանդես եկան հայտարարությամբ: Նրանք շեշտել են բովանդակային բանակցություններին և խաղաղության մթնոլորտին նպաստող մթնոլորտի խթանման և պահպանման կարևորությունը, ապա դրական են գնահատել տեղում իրավիճակի համեմատաբար կայունությունը և գոհունակություն են հայտնել, որ կողմերը շարունակում են կիրառել ուղիղ հաղորդակցության ուղիները՝ լարումից խուսափելու համար։
Տարօրինակ է, որ Ադրբեջանից հնչող ռազմատենչ հայտարարությունների, Ալիևի՝ Հայաստանը գրավելու, Երևանը «ադրբեջանական տարածք», առհասարակ՝ ողջ Հայաստանը՝ «Ադրբեջանի պատմական հողեր» ներկայացնելու ֆոնին համանախագահները համարում են ամեն ինչ կայուն է, և նույնիսկ գոհ են ընդհանուր իրավիճակից:
Տարիներ առաջ, տևական ժամանակ մինչև 2016թ. ապրիլյան պատերազմը, համանախագահների նման «բալանսավորված» հայտարարությունները ու Ռուսաստանի կողմից Ադրբեջանին՝ սպառազինության վաճառքը հանգեցրեցին մի իրավիճակի, երբ Ալիևն իրեն այնքան ազատություն տվեց, որ որոշեց մի քանի օրանոց ռազմական գործողություններով հայկական կողմից ցանկալի «տարածքները» կարող է հետ ստանալ:
Հիմա միջնորդների՝ ոչինչ չեմ տեսնում, ոչինչ չեմ լսում կեցվածքը, ի վերջո, հանգեցնելու նույն մթնոլորտի ձևավորմանը, եթե իհարկե, արդեն չի ձևավորվել նման իրավիճակ:
ՀՀ ԱԳՆ-ն չպետք է թույլ տա, որպեսզի նման իրավիճակում համանախագահները «ջայլամի» քաղաքականություն վարեն: Նրանց հայտարարություններում պետք է հասցեական Ադրբեջանի բարձրագույն իշխանությունների հայտարարությունները դատապարտվեն:
Մետաքսյա Շալունց
Հետևեք մեզ Viber-ում
