Դամ պահողը

Սահմանադրական դատարանի թնջուկը ոչ մի կերպ չի լուծվում: Իշխանության քայլերը հայտնի ըմպելիքի <<կրկին փորձիր>> կարգախոսն է հիշեցնում: Արդեն որերորդ պլանն են մշակում, օրենք ընդունում, մինչեւ անգամ սահմանադրական կարգի տապալման գնացին՝ լուծում տալու ՍԴ-ի հարցը, բայց այն չի լուծվում ու չի լուծվում: Իսկ պատճառը հայտնի է բոլորին: Տգիտության մարաթոնում անվիճելի առաջատար համարվող իշխանությունների խելքի բանը չէ օրենք գրելը կամ այն փոփոխելը: Ու մինչ մի բան անում են, ապա ժամանակից շուտ ՝ ուռա բացականչում, որ վերջապես ունենալու են իրենց երազանքների դատարանը, պարզվում էր, որ գործն էլի կիսատ են թողել ու այդ երազանքը դեռ հեռու է իրականությունից:

Երեկ էլ արտահերթ նիստ էին հրավիրել որի օրակարգում Սահմանադրական դատարանի մասին օրենքում փոփոխություն կատարելու մասին նախագիծն էր։

Հիշեցնենք, որ այս փոփոխությունը պարտադիր էր սահմանադրական փոփոխությունների իրականացումից հետո, բայց իմքայլականները այդ մասին թերևս տեղյակ չէին՝ նրանց պետք էր հապշտապ, օր առաջ ազատվել Հրայր Թովմասյանից ու ՍԴ երեք դատավորներից, ուստի մտքներով չէր անցել, որ պետք է նաև Սահմանադրական դատարանի մասին օրենքը համապատասխանեցնեն: Եվ ՍԴ անդամների, և տարբեր իրավաբանների կողմից այս մասին բարձրաձայնելուց հետո միայն որոշեցին արտահերթ նիստով բերել այս փոփոխությունները։ Նիստն այդ, ինչպես և նախորդը, երբ սահմանադրական փոփոխություններն էին քննարկվում, «Իմ քայլի» պատգամավորներն անցկացրեցին մենք-մերոնցով՝ ԲՀԿ-ն ու «Լուսավոր Հայաստանը» բոյկոտել էին: Իմքայլականներն իրենց համար նիստ արեցին, իրենց համար զեկուցեցին ու նախագիծն ընդունեցին միաձայն՝ 80 ձայնով, ութը բացակայում էին, քանի որ վարակված են կորոնավիրուսով: Ղազագրերի փաստը ծաղրող Նիկոլ Փաշինյանի թիմում նույն մեթոդնրով են առաջնորդվում, թերեւս մի տարբերությամբ, որ այստեղ միգուցե նախապես ղազագրեր չեն ստորագրվել, բայց հաստատվել է ղազագրային մթնոլորտ ու որեւէ մեկն իրավունք չունի խախտել չգրված օրենքները: Ինչեւէ, հիմա, երբ այս փոփոխություններն էլ ընդունեցին, ու կարծես թե ամեն ինչ համապատասխանեցրեցին եւ օրենքը պետք է ստորագրվեր ու ուժի մեջ մտներ՝ վերջ դնելով իշխանության ամիսների տվայտանքները, ՀՀ նախագահ Արմեն Սարգսյանի աշխատակազմից հայտարարեցին, որ նախագահը չի պատրաստվում ստորագրել այն: «Հանրապետության նախագահ Արմեն Սարգսյանը հունիսի 30-ին Ազգային ժողովի նախագահ Արարատ Միրզոյանին տեղեկացրել է, որ «Սահմանադրական դատարանի մասին» սահմանադրական օրենքում փոփոխություններ և լրացումներ կատարելու մասին օրենքը հարակից օրենքով իր կողմից չեն ստորագրվելու»:

Նախագահականից չեն պարզաբանում պատճառների մասին, բայց առանց դրա էլ պարզ է, որ հանրապետության թիվ մեկ տուրիստը չի պատրաստվում իրեն նեղություն տալ, ավելի ճիշտ որեւէ գործ անել, որեւէ հարցում պատասխանատվություն ստանձնել ՝ կամ ստորագրել օրենքը, կամ ուղարկել ՍԴ կամ էլ առնվազն հայտնել, թե ինչու չի ստորագրում: Սահմանադրության 129-րդ հոդվածի համաձայն՝ Հանրապետության նախագահի կողմից որևէ օրենք չստորագրվելու դեպքում այդ լիազորությունը 21 օր հետո փոխանցվում է ՀՀ Ազգային ժողովի նախագահին:

Որևէ կերպ, նորմատիվ-իրավական ակտով չի կարող սահմանվել ավելի կարճ ժամկետ կամ ժամկետի կրճատում, քանի որ Սահմանադրությունն ունի բարձրագույն իրավաբանական ուժ: Հետևաբար ՀՀ Ազգային ժողովի նախագահը կարող է ստորագրել նախագահի կողմից չստորագրված օրենքը բացառապես այն դեպքում, երբ նախագահի կողմից օրենքը ստորագրելու համար նախատեսված 21-օրյա ժամկետը լրացել է և այն չի ստորագրվել:

Բայց քանի որ իշխանական թիմի համար Սահմանադրություն բռնաբարելը դարձել է հաճելի զբաղմունք, կասկած չկա, որ չսպասելով սահմանված ժամկետին վաղը եւեթ ԱԺ նախագահը կստորագրի այդ օրենքը:

Անի Սահակյան