Փնտրվում են Փաշինյանի ասած աշխատատեղերը

Նիկոլ Փաշինյանը «Ֆեյսբուք»-ի ուղիղ եթերում հայտարարել է, որ Հայաստանում կորոնավիրուսի համավարակով պայմանավորված արտակարգ դրության խիստ սահմանափակումների ռեժիմը հանելուց հետո վերականգնվել է 50 հազար 94 աշխատատեղ:

«Մեծ ուրախությամբ պետք է արձանագրեմ, որ մայիսին, երբ մենք որոշեցինք խիստ սահմանափակումների ռեժիմը չշարունակել, 50 հազար 94 աշխատատեղ վերականգնվել է: Այսօր մենք ՊԵԿ նախագահի հետ քննարկում էինք, որ աշխատատեղերի վերականգնման գործընթացը շարունակվում է, սա վերջին շրջանի ամենակարևոր լուրն է»,- ասել է Փաշինյանը:
Նրա խոսքով` պետք է ամեն ինչ անել, որպեսզի ստիպված չլինենք դարձյալ վերադառնալ խիստ սահմանափակումների ռեժիմի: «Պետք է պայմանավորվենք, որ խիստ սահմանափակումների ռեժիմի քաղաքականությանը վերադառնալու անհրաժեշտություն չունենանք, իսկ դրա համար պետք է պահպանենք հակահամաճարակային կանոնները: Մայիսի տնտեսական տվյալները լավատեսություն են տալիս, որ բավականաչափ արագ կունենանք որոշակի վերականգնում: Առևտրի շրջանառության ծավալները նույնպես վերկանգնվում են, պետք է միասին այս տնտեսական տեմպը պահենք, կորցրածը հետ բերենք և եղածը զարգացնենք»,- նշել է վարչապետը:

Փաշինյանը հիշեցրել է, որ ապրիլին խիստ սահմանափակումների ռեժիմի ներդրման պատճառով Հայաստանում կորսվել էր 71471 աշխատատեղ: Մայիս ամսվա վիճակագրական թվերը Ազգային վիճակագրական կոմիտեն դեռ չի հրապարակել, բայց Փաշինյանը 50 հազարից ավելի աշխատատեղի վերականգնման մասին է խոսում` հղում անելով ՊԵԿ-ին: Վերջերս իրականացված հարցումների արդյունքով` հայաստանյան ընկերությունների 17%-ի մոտ գրանցվել է սպառման 90-100% անկում։ Եվս 17%-ի պարագայում վաճառքի անկում չի եղել։ Այսպիսի ցուցանիշ է արձանագրվել Հայաստանի արդյունաբերողների և գործարարների միության կողմից՝ իր անդամների շրջանում անցկացված հարցման արդյունքում։ Վաճառքի ծավալների 50-80% նվազում գրանցվել է ընկերությունների 32%-ի մոտ: Սպառման 10-30% կրճատում ունեցել են ընկերությունների 25%-ը։ Մասնակիցների 9%-ը որպես սպառման խոչընդոտ նշել է արտահանման անհնարինությունը։

Համավարակի պատճառով չի գործում տուրիզմի ոլորտն ամբողջությամբ, հյուրանոցներն ու հանգստյան տները դատարակ կամ լավագույն դեպքում կիսադատարկ են: Բնականաբար, այս ոլորտում աշխատողները կամ հարկադիր պարապուրդի են մատնված, կամ ազատվել ու կրճատվել են կամ էլ լավագույն դեպքում աշխատում են շատ քիչ ծավալով: Նիկոլ Փաշինյանի ներկայացրած թվերն առնվազն տարակուսելի են, որովհետև Փաշինյանը չի ասել, թե ինչպիսին են տնտեսկան ցուցանիշները, որոնք սահմանափակումների հետևանքով գահավիժել էին: Հիշեցնենք, որ ապրիլ ամսին տնտեսական անկումը 17 տոկոս էր կազմել, իսկ պետական բյուջեի եկամուտները հավաքագրվել էին նախատեսվածից 40 տոկոս քիչ: 2020 թ. մայիսին պետական բյուջեի հարկային մուտքերն ակնկալվող 120 մլրդ դրամի փոխարեն կազմել են 83 մլրդ դրամ, այսինքն` 37 մլրդ-ով պակաս: 40 տոկոս թերակատարումը կամ թերհավաքագրումը շատ լուրջ ռիսկ է, և եթե նույն միտումը շարունակվի նաև հունիս-հուլիս ամիսներին, ապա պետությունը կարող է կանգնել աշխատավարձ ու թոշակ վճարելու ռիսկի առաջ:
Նման իրավիճակում Փաշինյանի` աշխատետեղերի մասին պոպուլիստական հայտարարությունը առնվազն լուրջ չէ, եթե արդյունքը, միևնույնն է, տնտեսության անկումն է և բյուջեի առանց այն էլ մեծ ճեղքվածքի խորացումը:

Հայկ Դավթյան