Փաշինյանը շատ կարճ ժամանակից կհեռանա. Պուտինը միացել է հեռացնողների ցուցակին

Հայ-ռուսական «փայլուն» հարաբերությունները նորանոր բարձունքներ են նվաճում:
Փաշինյանը հայտարարեց, որ համաճարակի պատճառով չի կարող մասնակցել Մոսկվայում կայանալիք Հայրենական Մեծ պատերազմի 75-րդ տարեդարձին նվիրված միջոցառումներին:
Բոլորի համար պարզ է, որ համաճարակը չէ իրական պատճառը։ Փաշինյանի համար համաճարակը երբեք էլ խոչընդոտ չի եղել՝ սեփական քաղաքական հաշվարկները կյանքի կոչելու համար։ Ճիշտ հակառակը՝ Փաշինյանը նույնիսկ ռեկորդային կարճ ժամանակահատվածում բուժվեց կորոնավիրուսից, որպեսզի մասնակցի Մոսկվայում կայանալիք միջոցառմանը։
Հիմա նա ասում է, որ կորոնավիրուսի պատճառով չի գնա։ Նշանակում է, որ կա՛մ իրեն Մոսկվայից հասկացրել են, որ անցանկալի հյուր է, կա՛մ ինքն է ինչ-ինչ հաշվարկով հետ կանգնել:

Թե ինչու Փաշինյանը Կրեմլի ցանկալի հյուրերի ցանկում չէ, կարծում ենք՝ հասկանալի է բոլորին: Պետական համակարի բարձր պաշտոնները սորոսականներին հանձնելով, հակառուսական գործունեություն ծավալելով երբեք էլ չես կարող դառնալ ռազմավարական գործընկեր:

Հայտնի է նաեւ Մոսկվայի արձագանքը հայ–ռուսական ռազմավարական հարաբերությունների գլխավոր ճարտարապետներից մեկի՝ ՀՀ 2–րդ նախագահ Ռոբերտ Քոչարյանի նկատմամբ քաղաքական հետապնդումների վերաբերյալ։ Թվում էր, թե Փաշինյանին կհաջողի իր պրիմիտիվ շուստրիությունը աշխատեցնել, հունիսի 24-ին ընդառաջ ազատ արձակել Ռոբերտ Քոչարյանին, բայցեւ այդ որոշումը դատախազության միջոցով բողոքարկել Վերաքննիչում՝ հաշվարկով, ոչ կգնամ-կգամ, նորից կփակեմ Քոչարյանին, սակայն դա միայն թվում էր: Նիկոլ Փաշինյանի շնորհիվ հայ-ռուսական հարաբերություններն այն կարգի են փչացել, հասել մի կետի, ուր մյուս կողմին այլեւս ոչնչով չես հուզի, առավել եւս չես մոլորեցնի, գնացքն արդեն գնացել է:

Դատելով այս ամենից՝ Մոսկվայում շատ վատ են արձագանքել ՀՀ խորհրդարանի միակ ռուսամետ կողմնորոշում ունեցող ուժի նկատմամբ իշխանությունների հարձակումները։ Ըստ տեղեկությունների՝ Կրեմլում մերժել են Նիկոլ Փաշինյանի խնդրանքն առանձնազրույց ունենալ Վլադիմիր Պուտինի հետ՝ հասկացնելով, որ նրա հետ քննարկման օրակարգ չունեն եւ ըստ էության նրա փոփոխությունը քաղաքական օրակարգի թիվ մեկ խնդիրն է դարձել: Փաշինյանը շատ կարճ ժամանակից կհեռանա. Պուտինը միացել է հեռացնողների ցուցակին:

Ուշագրավ է՝ եթե Փաշինյանը չի մասնակցելու, ապա չմոռանանք, որ մենք ունենք ՀՀ նախագահ եւ կարող էր ինքը մասնակցել, բայց ոչ՝ մասնակցությունը միայն պաշտպանության նախարարի մակարդակով է լինելու: Արմեն Սարգսյանն ըստ երեւույթին կամ վախենում է Փաշինյանի ճնշումներից ու նախատինքներից, կամ էլ ինքը եւս Կրեմլում անցանկալի պերսոնա է, քանզի այստեղ հասկացել են, որ Սարգսյանը եղած-չեղած մի հաշիվ է ՝ փաշինյանահպատակ պաշտոնյա, ով ունակ չէ որեւէ դիմակայության: Իսկ սա նշանակում է, որ Ռուսաստանն այլեւս չի ցանկանում որեւէ կոմպրոմիսի կամ զիջման գնալ, արդեն բացահայտ դեմարշը սկսված է, որի հետեւանքները Հայաստանի ներքին եւ արտաքին քաղաքական կյանքի վրա զգացվելու են:

Անի Սահակյան