Երեխան մեծացել, բայց չի հասունացել

Նիկոլ Փաշինյանի մտավոր անչափահասների թիմի կարկառուն ներկայացուցիչ, Ազգային ժողովի պարտագամավոր, դեռ ավլին՝ կրթության, գիտության, սպորտի եւ մշակույթի մշտական հանձնաաժողովի նախագահ Մխիթար Հայրապետյանը հերթական անգամ փայլատակել է իր պահվածքով: Այս տակավին պատանին, ում աշխատանքային կենսագրության առաջին տողը գրվել է թավշյա քայլարշավից հետո, երբ Նիկոլ Փաշինյանը այս պատանուն նշանակեց սփյուռքի նախարար միայն այն բանի համար, որ Մխիթարը քայլարշավի ողջ ընթացքում թեթեւ թռվռում էր Փաշինյանի կողքին՝ կատարելով նրա հրահանգները:
Հիմա երեխան այնքան է մեծացել,որ իրեն թույլ է տալիս օրենսդիր թիվ մեկ ամբիոնից սպառնալ լրատվամիջոցներից մեկին, խոսել ուլտիմատումի լեզվով: Աժ-ում Մեդիայի մասին իր հեղինակած օրենքի քննարկման ժամանակ սույն պատգամավորը անսպասելիորեն նման ելույթ ունեցավ.<<Քիչ առաջ ինձ մի լրատվականից նյութ ուղարկեցին, որը վերնագրված էր հետևյալ կերպ՝ «ԱԺ-ում այս պահին քննարկվում է ռուսական հեռուստալիքների դեմ օրենքի նախագիծը»: Ես անունը դեռևս չեմ տա, կես ժամ ժամանակ եմ տալիս այդ լրատվամիջոցի շեֆերին, դրանց հետևում կանգնած անձանց, այս հակապետական, խայտառակ, դավաճան վարքագիծը փոխելու համար, կամ շատ արագ այդ վերնագիրը փոփոխում եք, կամ նյութը հեռացնում եք»,- ասաց Հայրապետյանը:

Նա նշեց, որ անձամբ է խոսել երեկ դեսպանի հետ: «Կարող եմ ասել ռուսական կողմի, ռուս գործընկերների կողմից հայտն արդեն ներկայացված է: Նախարարը, հուսամ վերջում արդեն իր ամփոփիչ ելույթում կանդրադառնա սրան: Այս գործելաոճին վերջ տվեք, դադարեցրեք, այսօր մենք խոսում ենք բացառապես մեդիադաշտում, բացառաապես նոր կանոնակարգումների մասին, որոնք, այո, միտված են մեր պետության ազգային անվտանգությանը, լեզվական անվտանգության բարձրացմանը»,- ասաց նա:

Հասկանալի է, որ ձեր մեծը Ռուսաստանի հետ հարաբերություններն այն աստիճանի է փչացրել՝ հասցնելով վտանգավոր եզրագծի, որ հիմա կարծես հասկանում է՝ թքածը լիզելու ժամանակն է ու այդ պատճառով էլ լրատվականի վերնագիրը սարսափի նոպաներ է առաջացրել իշխանականներիդ մոտ: Հասկանալի է նաեւ, որ լրատվամիջոցը ըստ էության որեւէ հակապետական եւ դավաճանական վարքագիծ չի դրսեւորել, նյութը վերնագրել է այնպես, ինչպես հասկացել է, ի վերջո այդ փոփոխությունների վերջնարդյունքում չի բացառվում, որ ռուսական հեռուստաալիքներ փակվեն: Եւ ընդհանրապես չէր խանգարի, որ այսպիսի հետուղականությամբ բարձրաձայնեիք ձեր թիմակիցների հակապետական հայտարարությունները՝ վարչապետից սկսած, վերջացած շարքայիններով:

Բայց եթե նույնիսկ լրատվամիջոցը լուրի վերնագիր ընտրելու հարցում չի արդարացրել ձեր սպասելիքները, ոչ մեկ եւ ոչինչ ձեզ իրավունք չի տալիս բարձր ամբիոնից պախարակել ու սպառնալ լրատվամիջոցին: Ընդամենը կարելի էր հեռախոսը վերցնել եւ զանգահարել տվյալ խմբագրություն, կամ եթե դա ձեր պատվից վեր է, ապա կարելի էր հանձնարարել օգնականներին, խորհրդականներին, որոնք, ինչպես եւ դուք, աշխատավարձ եք ստանում մեր՝ հարկատուներիս հաշվին:
Այպիսի ամբարտավան պահվածք նույնիսկ ձեր վարչապետի հոգեւոր հոր՝ Լեւոն Տեր-Պետրոսյանի ժամանակներում չէին դրսեւորում լրատվամիջոցների հանդեպ: Այո, այդ տարիներին լրատվականներ էին փակվում, խմբագրություններ էին մտնում ջարդուխուրդ անում, լրագրողներ ծեծում, բայց որեւէ պաշտոնյա որքանով հիշում ենք ի պաշտոնե թույլ չի տվել նման տոնով խոսել լրատվամիջոցների հետ:
Քանզի, ինչպես մեր գործընկերնրից շատերն էին այս ելույթին արձագանքել՝ ԱԺ պատգամավորն ո՞վ է, որ որոշի, թե լրատվամիջոցը ինչ վերնագիր դնի․ յուրաքանչյուրը կարող է նյութը վերնագրել այնպես, ինչպես ընկալում է այդ նյութը, ինչպես համարում է ճիշտ։ Եւ վերջում, եթե որոշել եք , իսկապես, խառնվել լրատվական դաշտին եւ այն համապատասխանեցնեք ձեր պատկերացումներին, ապա խորհուրդ կտանք դա սկսել ձեր քաղաքական ուժի ղեկավարին պատկանող թերթի սխալ, մանիպուլյացիոն, աղմկահարույց վերնագրերից:
Հ.Գ,-Ինչպես Գալուստ Գրիգորիչը կասեր՝ երեխաները պարտավոր են մեծանալ, սա ընդունեք որպես ուղիղ իմաստով, հա մեկ էլ՝ մեծանալու հետ էլ հասունանալ, խելք հավաքել է պետք: Մի մտեք այնտեղ, որտեղ անելիք չունեք:

Անի Սահակյան