«Թավիշը» Եվրոպաներում. «X» պահ Փաշինյանի համար

Հայաստանի երրորդ նախագահ, ՀՀԿ նախագահ Սերժ Սարգսյանը երեկ երեկոյան մասնակցել է Բրյուսելից անցկացվող Եվրոպական ժողովրդական կուսակցության (ԵԺԿ) Արևելյան գործընկերության առաջնորդների տեսակոնֆերանսին` ԵԺԿ նախագահ Դոնալդ Տուսկի նախագահությամբ:

Սերժ Սարգսյանը գագաթնաժողովում հանդես է եկել ելույթով, որտեղ անդրադարձել է Հայաստանի ներքին և արտաքին քաղաքականության ու անվտանգության կարևորագույն մի շարք հարցերի: Սերժ Սարգսյանը խոսել է ինչպես կորոնավիրուսի համավարակի պայմաններում երկրում առողջապահական, սոցիալ-տնտեսական խիստ մտահոգիչ իրավիճակի, այնպես էլ չափազանց վտանգավոր մեկ այլ՝ պոպուլիզմի քաղաքական վիրուսով ախտահարված Հայաստանի իշխանությունների ապաշնորհ կառավարման արդյունքում երկրում ստեղծված ներքաղաքական վիճակի մասին: Նա գործընկերներին հանգամանորեն ներկայացրել է Հայաստանի ներքաղաքական վերջին զարգացումները, որոնց երեկ հրապարակած հայտարարության մեջ խստորեն դատապարտել է իր գլխավորած ՀՀԿ Գործադիր մարմինը:

Սերժ Սարգսյանն անդրադարձել է նաև Հայաստան-Եվրամիություն համագործակցության օրակարգին և այդ համատեքստում` Եվրամիության և Հայաստանի միջև դեռևս 2017 թվականին ստորագրված՝ Համապարփակ և ընդլայնված գործընկերության համաձայնագրի իրագործման ընթացքին` ցավով նշելով, որ այս ուղղությամբ ևս Հայաստանի նոր կառավարության ջանքերը բավարար արդյունավետ չեն:

Ի դեպ, ՀՀԿ-ի հետ սերտ կապեր ունեցող ԵԺԿ-ւ նախագահ Դոնալդ Տուսկը թվիտերյան իր էջում ԵԺԿ Արևելյան գործընկերության առաջնորդների հանդիպման ընթացքում անդրադարձել է Հայաստանին։

Տուսկը հայտնել է, որ ԵԺԿ-ն մտահոգված է Հայաստանում ժողովրդավարական հետընթացի բազմաթիվ օրինակներով և կոչ է անում Հայաստանի իշխանություններին զերծ մնալ ընդդիմության նկատմամբ ճնշումներից։ Միաժամանակ ԵԺԿ-ն կշարունակի աջակցել ԵՄ-Հայաստան հարաբերություններին ՀԸԳՀ (CEPA) շրջանակներում, ցուցաբերելով քաղաքական կամք նրա լիակատար վավերացման և իմպլեմենտացիայի համար»։

Հայաստանի վերաբերյալ, այսպիսով, եվրոպական այս կուսակցությունը հայտնել է խիստ բացասական դիրքորոշում է հայտնել: Փաշինյանը երկու տարի եվրոպական ամբիոններից ներկայացնում է «Թավշյա հեղափոխությունը» դրական լույսի ներքո:

Երկրի ներսում, սակայն որոշ գործընթացներ, վաղ, թե ուշ ուշադրության կարժանանան նաև արևմուտքում:

Պարզապես այս պահին՝ արևմուտքը դեռ հույսեր է կապում Փաշինյանի հետ, և նրանց մի որոշ հատվածի համար Փաշինյանը բարեփոխիչ է:

Բայց այս սպասելիքների հետևում կա մի բայց... Ինչ է ակնկալում արևմուտքը Փաշինյանից... Արցախյան հարցում զիջումներ:

Երբ կգա այդ պատասխանատու X պահը, այդ ժամանակ էլ ամեն ինչ կնկատեն, ավելի մանրամասն, բոլոր նրբերանգներով:

Իսկ երեկ Վենետիկի հանձնաժողովի նախագահ Ջիանի Բուքիքիոն, ամփոփելով Հանձնաժողովի 2019 թվականի գործունեությունը, Եվրոպայի խորհրդի Նախարարների կոմիտեին ներկայացրել է զեկույց: Բուքիքիոն անդրադարձել է նաև Հայաստանի հետ համագործակցությանը։ Նա, մասնավորապես, ասել է, թե երկու անդամ պետություններում՝ Հայաստանում, Մոլդովայում օլիգարխիկ ռեժիմներ են տապալվել:

«Մենք աջակցում ենք այս երկու երկրների՝ ժողովրդավարական համակարգեր ձևավորելու ջանքերին: Հիմնական մարտահրավերներից մեկը հատկապես Հայաստանի, բայց նաև Մոլդովայի իշխանությունների համար, ճիշտ հավասարակշռություն գտնելն է՝ մի կողմից մարդկանց սպասելիքները արդարացնելու և երկրում իրական փոփոխություններ անելու, մյուս կողմից էլ՝ իրավական կայունության պահանջներն ու օրինականության չափորոշիչները պահպանելու միջև », նշել է Բուքիքիոն:

Ի դեպ, հունիսի 18-ից 19-ը Վենետիկի հանձնաժողովը գրավոր ընթացակարգով քննարկելու է նաև Հայաստանի իշխանությունների դիմումը, որը վերաբերում է Սահմանադրական դատարանին և դատավորներին, ինչպես նաև Սահմանադրական դատարանի դիմումը՝ Հայաստանի Հանրապետության քրեական օրենսգրքի 300.1-րդ հոդվածի՝ Սահմանադրությանը համապատասխանության հարցով:

Մետաքսյա Շալունց