«Հակահեղափոխության փայատերերը» ստարտային վիճակում. առաջին քայլը Ծառուկյանինն է

Կիրակի օրվանից Հայաստանում քաղաքական պայքարն արդեն սեփականության ու կապիտալի լայնամաշտաբ վերաբաշխման հարցին է վերաբերում։ Գագիկ Ծառուկյանի շուրջ կատարվող իրադաձությունների գլխավոր նպատակը նրան ունեզրկելն է եւ Ծառուկյանով այդ պրոցեսի մեկնարկը տալը: Թերեւս սա էր պատճառը, որ քաղաքական գործընթացներում մշտապես զգուշավոր ԲՀԿ առաջնորդը, ինչպես ինքն է ասում` այս անգամ մինչեւ վերջ գնալ, եւ մի հատ էլ հրապարակային երդում ուտում, թե ով չգնա, անբարոյականի տղա լինի:

Կհաջողվի արդյոք Ծառուկյանին կանգնեցնել իր դեմ աշխատող պետական մեքենայի ընթացքը, կախված է միայն մի հանգամանքից, ինչպիսին կլինի դիմադրությունը: Նրա առանձնատանը կիրակի օրը կատարված խուզարկության օրը բավականին արագ ինքնակազմակերպվեց, տասնյակ աջակիցներ, աշխատակիցներ, ԲՀԿ-ական պատգամավորները ի աջակցություն Ծառուկյանի դուրս եկան փողոց բողոքի ինքնաբուխ ակցիա իրականացնելու: Իհարկե, առաջին անգամվա համար այն բավականին հաջողված ակցիա էր, բայց առաջիկայում ավելի հզոր ուժի ցուցադրություն է հարկավոր: Ծառուկյանը պետք է փոխի երկու տարի շարունակ Հայաստանը զբաղեցրած քաղաքական սերիալը, որի գլխավոր հերոսը Նիկոլ Փաշինյանն է, նա անում եւ ասում է ամեն ինչ՝ հայտարարելով, որ ունի հանրային վստահություն, ժողովրդի աջակցությունը:

ԲՀԿ առաջնորդն այժմ պետք է ցույց տա, թե ինքը որքան վստահություն ունի եւ այդպիսով իրեն ապահովագրի վարչապետի կամայականություններից: Ընդ որում՝ մեկնարկի համար անիմաստ է ակնկալել քաղաքական այլ ուժերի կամ իշխանությունների տեսադաշտում հայտնված մնացած անհատների, պոտենցիալ <<զոհերի>> աջակցությունը մի քանի պատճառներով, նախ առաջինը, որ թեեւ քաղաքական դաշտում ակնհայտ խմորումների եւ ընդդիության կոնսոոլիդացիայի նախանշանների, քաղաքական ուժերն այս պահին խուսափելու են քայլ անել՝ աչքի առաջ ունենալով ԲՀԿ-ի նախկին պահվածքը, երբ մի քանի անգամ ընկրկել է վճռական պահերին: Հետեւաբար նրանք ջուրը չտեսած չեն բոբիկանալու՝ սպասելով, որ առաջին քայլն անի իշխանության մսաղացի տակ այս պահին հայտնված Գագիկ Ծառուկյանը: Միայն վերջինիս վճառականության ու հաստատակամության պարագայում կարելի է ակնկալել, որ մյուսներն էլ ոտքի կանգնեն: Եւ, ի վերջո, պրոցեսների՝ ընդդիմության համար հաջողված սցենարից հետո սկսվելու է այսպես կոչված հակահեղափոխության փայատերերի կողմից իշխանության բաժանումը: Ուստի բոլորը կգործեն հենց այս հաշվարկով, նախ կտեսնեն ինչ ունի Ծառուկյանը, որքան ռեսուրս է կարողանում գեներացնել, ապա կցուցադրեն նաեւ իրենցը: Չնայած այս պահին էլ այնպես չէ, որ բոլորի մոտ <<ձեռքերը լվացած>> վիճակ է, մեկը մեդիա ռեսուրսով է աջակցություն ցուցաբերում, մյուսը իր երիտակտիվիստներին էր փողոց գործուղել եւ այսպես շարունակ: Բայց մեծ հաշվով, իշխանության դեմ պրոցեսների հաջողության գրավականը կախված է լինելու մեկնարկից, թե ինչպես է Ծառուկյանն այն տալու ու, ըստ այդմ էլ, կզարգանան գործընթացները:

Անի սահակյան