Բացառվում է, որ Գագիկ Ծառուկյանին ձերբակալեն, որովհետև դրա սահմանադրական հիմքն ամբողջությամբ բացակայում է․ Գևորգ Կոստանյան «Փաստինֆո»
«Բացառվում է, որ Գագիկ Ծառուկյանին ձերբակալեն, որովհետև դրա սահմանադրական հիմքն ամբողջությամբ բացակայում է»,- «Փաստինֆո» -ի հետ զրույցի ընթացքում ասել է ՀՀ նախկին գլխավոր դատախազ Գևորգ Կոստանյանը` անդրադառնալով այսօրվա թիվ մեկ իրադարձության` ԲՀԿ առաջնորդ Գագիկ Ծառուկյանի շուրջ ծավալվող իրադարձություններին:
-Պարոն Կոստանյան, ո՞ր պարագայում է հնարավոր իրականացնել Ազգային ժողովի պատգամավորի ձերբակալությունը:
- Քրեական դատավարության օրենսգիրքը սահմանում է անձին ձերբակալելու հիմքերը, բայց պատգամավորին ձերբակալելու հիմքերը քրեական դատավարության օրենսգրքով չի սահմանվում: Պատգամավորին ձերբակալելու համար այլ հիմքեր են նախատեսված՝ բացառապես ՀՀ Սահմանադրությամբ: Սահմանադրության 96-րդ հոդվածը երկու բացառիկ դեպք է նախատեսում ԱԺ պատգամավորի ձերբակակելու համար՝ դա նրա կողմից հանցանք կատարելու պահին կամ դրանից անմիջապես հետո ձերբակալումն է, այսինքն, պատգամավորին պետք է ձերբակալել միայն այն դեպքում, եթե նա հենց այդ պահին որևէ հանցագործություն է կատարում կամ ձերբակալումը հանցանքի կատարման պահից անմիջապես հետո է: Եթե ենթադրյալ հանցանքից արդեն տևական ժամանակ է անցել, ապա պատգամավորին ձերբակալել չի կարելի: Տվյալ պարագայում անհրաժեշտ է նախ պատգամավորի անձեռնմեխելիության հարցով մտնել Ազգային ժողով:
-Դուք ծանո՞թ եք Գագիկ Ծառուկյանին առնչվող դեպքի մանրամասներին, որով պայմանավորված, այսօր նա հարցաքննության է կանչվել ԱԱԾ:
-Այո, ես նայեցի ԱԱԾ հաղորդագրությունները և գիտեմ, թե ինչ գործերի մասին է խոսքը: Տվյալ պարագայում անհնար է պատգամավորին ձերբակակել, որովհետև այդ բոլոր ենթադրյալ հանցանքները կատարվել են շատ տարիներ առաջ, հետևաբար, սահմանադրական այն սկզբունքը, որ պատգամավորին կարող են ձերբակակել հանցանք կատարելու պահին կամ դրանից անմիջապես հետո , արդեն չի կարող արդիական լինել, այն պարզ պատչառով, որ այդ ենթադրյալ հանցանքները կատարվել են տարիներ առաջ: Հետևաբար, ես կարծում եմ՝ բացառվում է, որ Գագիկ Ծառուկյանին ձերբակալեն, որովհետև դրա սահմանադրական հիմքն ամբողջությամբ բացակայում է:
-Իսկ հնարավո՞ր է՝ վաղը կամ ամենամոտ ապագայում գլխավոր դատախազը մտնի ԱԺ և Գագիկ Ծառուկյանին անձեռնմխելությունից զրկելու ու կալանավորելու միջնորդություն ներկայացնի:
- Քիչ առաջ մենք խոսում էինք ձերբակալման մասին: Իսկ ԱԺ պատգամավորին, այդ թվում նաև Ծառուկյանին կալանավորելու կամ քրեական հետապնդման ենթարկելու համար, այո, դատավարական, սահմանադրական առումով իրավունք ունեն մտնել ԱԺ և միջնորդություն ներկայացնել, եթե իհարկե դրա համար կան համապատասխան հիմքեր: Հիմա ես չգիտեմ այդ հիմքերը կա՞ն, թե՞ չկան: Հետևաբար, երբ իրենք կմտնեն ԱԺ (եթե մտնեն) այդ ժամանակ կխոսենք այն մասին, թե արդյո՞ք ունեին բավարար հիմքեր, դա իրականացնելու համար: Սահմանադրական իրավունքի տեսակետից, այն ինչ ասացի՝ վերաբերում էր ձերբակալմանը: Հետևաբար, նրանք այսօր պարտավոր են Գագիկ Ծառուկյանին բաց թողնել: Անգամ, եթե ենթադրաբար նրանք հիմքեր ունեն, որպեսզի վաղը մտնեն ԱԺ և անձեռնմխելիությունից զրկեն Գագիկ Ծառուկյանին, միևնույն է, այսօր նրան պետք է բաց թողնեն:
- Ի՞նչ եք կարծում, արդյո՞ք այն, ինչ այսօր է կատարվում Ծառուկյանի դեպքի առնչությամբ, իշխանությունների ուղիղ հրահանգը չէ ԱԱԾ-ին, որը, կարող էր կապ ունենալ վարչապետի և նրա ընտանիքի վերաբերյալ պարբերաբար հրապարակվող ապօրինի գործողությունների մասին բացահատումների աղմուկը լռեցնելու հետ:
-Ես չեմ կարող հստակ ասել՝ հրահա՞նգ է սա, թե՞ ոչ: Կարող եմ միայն ենթադրել, որ, այո, ակնհայտ հրահանգ է: Ինչո՞ւ, որովհետև պատկերացրեք սա տարիներ առաջ կատարված ենթադրյալ հանցանք էր և, հանկարծ ինչ - որ մի վկա է հայտնվում, որը որոշում է տարիներ անց անկեղծ լինել և նոր մոտեցումներ է ի հայտ բերում: Այսինքն, ինքնին այս հանգամանքն ամբողջությամբ կասկածի տակ է դնում ողջ քրեական դատավարության պրոցեսը: Երկրորդ՝ օրինակ հենց այս դեպքի հետ կապված ինչ- որ փաստաթուղթ են շրջանառում, Մարտունու ընտրական տեղամասերից՝ ինչ - որ մեկի անվան հետ կապված: Իրականում, դա ոչ թե փաստաթուղթ է, այլ պարզապես մի թուղթ, որովհետև թղթի ու փաստաթղթի տարբերությունը կայանում է նրանում, որ փաստաթուղթը պետք է ունենանա կոնկրետ վավերապայմաններ՝ ստորագրություն կնիք և այլն: Երբ այդ վավերապայմանները բացակայում են, սա դառնում է թուղթ և հիմնվելով որևէ թղթի կտորի վրա, այսպիսի քննչական գործողություններ իրականացնել, այն էլ՝ այսպիսի մեծ աղմուկով, ակնհայտ է դարձնում, որ այստեղ, իմ խորին համոզմամբ, իրավական պրոցեսի մասին խոսք լինել չի կարող: Դա նույն է, որ, ասենք, թռուցիկի հիման վրա քրեական հետապնդում կամ քրեական գործ հարուցվի:
-Այդ դեպքում, ձեր կարծիքով ո՞րն է այս ամենի նպատակը, ի՞նչի համար է արվում սա:
- Ես նախկինում էլ առիթ ունեցել եմ ասելու, որ խոսքը բացառապես քաղաքական գործընթացներին է վերաբերում: Ընդ որում այն դեպքերում, երբ մենք գործ ունենք ոչ թե ապացույցների անբավարարության, այլ դրանց իսպառ բացակայության հետ, ապա բոլոր նման դեպքերում մենք կարող ենք խոսել քաղաքական հետապնդման դեպքի մասին: Առավել ևս, նկատի ունենալով Գագիկ Ծառուկյանի կամ շատերի կողմից արված քաղաքական բնույթի հայտարությունները և դրանց անմիջապես հաջորդող, այսպես կոչված, քրեական բացահայտումները, նորից կրկնվեմ՝ ոչ թե առանց բավարար ապացույցների, այլ բացառապես առանց որևէ ապացույցի, ակնհայտ է դառնում, որ այստեղ խոսքը գնում է քաղաքական հետապնդման և քաղաքական իշխանության կամայականության մասին միայն:
Հետևեք մեզ Viber-ում
