Ամոթալի ու աննախադեպ փոփոխություն

Արդեն ավանդույթ է դարձել, որ երկրի բոլոր կարևոր հարցերի շուրջ իր ուրույն կարծիքն է հայտնում ժողվարչապետի դուստրը՝ Մարիամ Փաշինյանը: Երկրում ներքաղաքական գործընթացին զուգընթաց ոչ միայն վարչապետն է ակտիվացել, աջուձախ սպառնում, հայհոյում ու ահաբեկում է ընդդիմադիրներին, այլեւ ընտանիքի անդամները, նախեւառաջ՝ ավագ դուստրը .«Բոլոր նախկին հանցագործ-թալանչի-պաշտոնյաներին, իրենց հարազատներին ու բարեկամներին, իրենց վաճառված համակիրներին, կոչ եմ անում նույն ոգով շարունակել, որովհետև այս մարտավարությունը ձեզ ձեր իսկ փորած թակարդն է նետելու»:

Այս մասին Facebook-ի իր էջում գրել է նա: Այս աղջիկն այնքան շատ բաների ու շատերի մասին է իր հեղինակավոր կարծիքը հայտնել, որ նրա մասին գիտեն բոլորը, գիտեն նաեւ, թե տանն ինչ են խոսում ու մտածում ընտանիքի մեծերը: Մի ժամանակ ընտանիքը հենց նրա վրա էր դրել ԱԱԾ նախկին տնօրեն Արթուր Վանեցյանին քննադատելու գործը, առհասարակ ցանկացած պահի նա կարող է անակնկալ հայտնվել եւ իր հեղինակավոր կարծիքը հայտնել: Նա չի լռել անգամ արտակարգ դրության օրերին, կամ, ինչպես իր հայրը կասեր, պատերազմական ժամանակներում: Երբ բոլորը քննադատում էին աղմկահարույց նախագիծը, որով նախատեսվում է հայտնաբերել կորոնավիրուսով վարակվածների շփումների շրջանակը, տեղորոշել հեռախոսազանգերով, պառլամենտում և հանրության շրջանում դժգոհության մեծ ալիք բարձրացվեց, Մարիամ Փաշինյանը դարձյալ ստիպված եղավ խառնվել և իրավիճակը շտկել. «Մեր անձնական տվյալները օգտագործվում են թե facebook-ում, instagram-ում, viber-ում և գրեթե բոլոր սոցիալական հարթակներում որտեղ մենք գրանցում ենք անձնական տվյալներ, թողնում էլեկտրոնային հասցե, անուն ազգանուն, կամ հեռախոսահամար: Երբ խոսում եմնք գաղտնիության մասին, արդյոք մենք կարդում ենք բոլոր սոցիալական ցանցերի privacy policy-ները, որտեղ թողնում ենք մեր անձնական տվյալները: Երևի շատ քչերն են անում, բայց շատերն են չափազանցնում և դրամատիկացնում այսօրվա նախագիծը: Հեռախոսազանգերի միջոցով քաղաքացիների շարժը հետևելու միակ նպատակը կորոնավիրուսով վարակված քաղաքացիների շփումների շրջանակը պարզելն է և հետևաբար կորոնավիրուսի տարածումը կանխելը: Խոսքը վերաբերվում է համաշխարհային պանդեմիային և մարդկային կյանքեր փրկելուն:Նորից փայլուն առիթ դիվիդենտներ շահելու համար»:

Հեղափոխությունից հետո, երբ այս աղջկա հայրը հայտարարում էր, որ երկրում իրավիճակ է փոխվել, թերեւս չէր սխալվում, գոնե մեկ հարցում: Անցած երկու տարիների ընթացքում մենք տեսանք, իրապես, փոխված իրավիճակ: Նախորդ երեսուն տարվա ընթացքում նախորդ 3 նախագահների երեխանեից եւ ոչ մեկն այսպիսի անզուսպ ու սանձարձակ չէր պահել իրեն, որքան անում է Նիկոլ Փաշինյանի ավագ դուրստրը: Ընդ որում, այդպես չեն պահել ոչ մտավորական առաջին նախագահի զավակները, ոչ էլ Ռոբերտ Քոչարյանի եւ Սերժ Սարգսյանի: Սա դաստիարակությա, էթիկայի եւ արժեհամակարգի խնդիր է: Եթե Նիկոլ Փաշինյանը մնացել է դստեր «պաշտպանության» հույսին, ապա այլ խնդիր է, եթե պարզապես չի կարողանում աղջկա լեզվի վրա, դա էլ ուրիշ հարց է: Բայց չէր խանգարի մի քիչ աչք գցել նախկինների երեխաներին, թեկուզ իրենց կողմից այդքան ատելի Քոչարյաններին: Կարելի էր պատկերացնել, թե ինչ կաներ Մարիամիկը, եթե իր հոր հետ էլ վարվեին այնպես, ինչպես Փաշինյանն է անում Քոչարյանի նկատմամբ, բայց նրա որդիների զսպվածությունն ու պահվածքը միայն հիացմունքի են արժանի: Ուստի, իսկապես, այս առումով երկրում աննախադեպ իրավիճակ է փոխվել, երբ պետության ղեկավարի երեխաները գործիք են դարձել քաղաքական հակառակորդների դեմ:

Անի Սահակյան