Քեզ բացակա չենք դնի. Երևանի քաղաքային պանթեոնում հարգանքի տուրք մատուցվեց ՀՀ վաստակավոր բժիշկ, բարերար, լեգենդար Կառլեն Եսայանի հիշատակին. ՖՈՏՈՌԵՊՈՐՏԱԺ, ՏԵՍԱՆՅՈՒԹ

10:38 - 13/հունիսի/2020

Հունիսի 12-ին, Երևանի քաղաքային պանթեոնում հարգանքի տուրք մատուցվեց ՀՀ վաստակավոր բժիշկ, բարերար, երջանկահիշատակ Կառլեն Եսայանի հիշատակին: Սիրված մարդու, սիրված բժշկի հիշատակն հարգելու էին եկել ընտանիքի անդամները, սակայն մեծ թվով քաղաքացիներ, ընդառաջելով լեգենդար բժշկի ընտանիքի անդամների հորդոր-խնդրանքին՝ կապված հանրապետությունում կորոնավիրուսի հետ, հայտարարված արտակարգ դրության ռեժիմի չխախտման համար հրաժարվել են այցելել Մեծ հայի, Մեծ մտավորականի, Մեծ բարերարի շիրիմին, որպեսզի այդ ամենը չդիտվի արտակարգ ռեժիմի խախտում: Այնուհետև ընտանիքի անդամները այցելեցին Նոր Նորք վարչական շրջանում ՀՀ վաստակավոր բժիշկներ, բարերարներ Կառլեն և Սառա Եսայանների կողմից կառուցված եկեղեցի, որտեղ կատարվեց մոմավառություն և պատարագ: Լեգենդար բժիշկ–բարերարի հիշատակը հարգեցին նաև մայրաքաղաքի «Կառլեն Եսայանի անվան պոլիկլինիկա» փակ բաժնետիրական ընկերության բուժանձնակազմը, ովքեր իրենց խոսքում ասում էին. «6 տարի է, անվանի ու վաստակավոր բժիշկ, լեգենդար հայը մեզ հետ չէ, բայց մենք ինչպես գրել է հայ մեծ գրող Համո Սահյանը՝ «նրան բացակա չենք դնի» ու տեղին է հիշել Մեծն Սահյանի՝ «Ինձ բացակա չդնեք» բանաստեղծությունը, որտեղ գրված է նաև՝ Ես եմ քարե պատարագ, ձեզնից սերված ընդունեք, Դուք ձեր կամքին հակառակ, ինձ բացակա չդնեք, Ոչ խոստումներ, ոչ երդում, չսպասեք ու չքննեք, Անվերջ, անշարժ ձեր երգում ինձ բացակա չդնեք... Ամեն անգամ պոլիկիլինիկայում աշխատանքային առօրյան սկսելիս հիշում ենք մեր մեկ այլ հայ մեծ գրողի խոսքերը՝ Մեծն Պարույր Սևակի և այդ խոսքերը հիրավի ասված են նաև Կառլեն Եսայանի համար՝ Ուշ-ուշ են գալիս, բայց ոչ ուշացած, գալիս են նրանք ճիշտ ժամանակին...

Լուսանկարները և տեսանյութը՝ Գագիկ Շամշյանի