Նիկոլ Փաշինյանը պետք է անկեղծորեն ներողություն խնդրի

Կորոնավիրուսի դեմ պայքարը յուրօրինակ ինդիկատոր դարձավ` բացահայտելու Նիկոլ Փաշինյանի կառավարման ոլորտի վերաբերյալ ունեցած պատկերացումները, իսկ ավելի կոնկրետ` սրանց բացակայությունը:

Մեկ շաբաթվա ընթացքում վարչապետը, կորոնավիրուսով պայմանավորված, մեր երկրում ստեղծված իրավիճակի վերաբերյալ երկու կատեգորիկ ծայրահեղ և միմյանցից 360 աստիճանով տարբերվող հայտարարություններ արեց: Նախորդ շաբաթվա վերջին պարետատան հերթական նիստից հետո Նիկոլ Փաշինյանը հայտարարեց, թե մենք հասել ենք անդունդի եզրին և քայլում ենք դժոխքի միջով: Նիկոլ Փաշինյանի հավաստմամբ` վարակի պատճառով երկու մարդ մահացել է տանը, ևս երկուսին հիվանդանոցում չեն կարողացել տեղավորել վերակենդանացման բաժանմունքում, քանի որ տեղ չի եղել:
Ահա այս հայտարարությունից ընդամենը երկու օր անց նույն ինքը` վարչապետ Նիկոլ Փաշինյանը, պնդում էր, թե այսօր Հայաստանը կորոնավիրուսի դեմ պայքարում աշխարհի ամենազարգացած երկրներից մի քանի անգամ ավելի լավ ցուցանիշներ ունի: Առաջանում է մի շատ տրամաբանական հարց` եթե մեր ցուցանիշներն այդքան լավն էին, երկու օր առաջ ինքը` որպես երկրի ղեկավար, ի՞նչ հիմքով էր հայտարարում, թե անցնում ենք դժոխքի միջով: Այս ի՞նչ փոխվեց երկու օրում:

Հիմա կոնկրետ մի քանի փաստ` մեր և այլ երկրների ցուցանիշների մասին: Մեր ցուցանիշները ամենավատն են տարածաշրջանում. մեզ մոտ վիճակն ավելի վատ է, քան Թուրքիայում, Իրանում և Վրաստանում: Հունիսի 11-ի դրությամբ` Հայաստանում կորոնավիրուսով վարակված էր 14103 մարդ։ Հայաստանում՝ միլիոն բնակչին ընկնող վարակվածների ցուցանիշը կազմում է 4701: Համեմատության համար նշենք, որ 1 մլն բնակչի վարակվածության ցուցանիշով մենք առաջ ենք անցել Իտալիայից, որտեղ այդ թիվը կազմում է 3899, Անգլիայից, որտեղ այդ թիվը կազմում է 4275, Իրանից, որտեղ այդ թիվը կազմում է 2120 մարդ, Թուրքիայից /2053 մարդ/, Ադրբեջանից /842 մարդ/, Վրաստանից /207 մարդ/: Նախկին խորհրդային միության տարածքից մեր թվերը լավ են միայն Բելառուսի համեմատությամբ, քանի որ Լուկաշենկոն հրաժարվեց որևէ կարանտինից և արտակարգ դրությունից:

Ընդհանրապես աշխարհում Հայաստանը 1 մլն բնակչության վարակվածության ցուցանիշով 19–րդ տեղն է գրավում: Աշխարհում 1 միլիոն բնակչի հաշվով կորոնավիրուսից մահացության միջին թիվը կազմում է 53,8 մարդ։ Հայաստանում այդ թիվը հասնում է 77 մարդու։ Եվ սա այն դեպքում, երբ մեր երկրի բնակչությունն ընդամենը 3 մլն է, և մենք ի սկզբանե կարող էինք անգամ համատարած թեստավորում կատարել և չհայտնվել այն անդունդի մեջ, որի հատակը դեռ չի երևում: Այսքանից հետո հետարքրիր է, թե ում հետ էր  իրեն հաեմատել Նիկոլ Փաշինյանը, որ եզրակացրել էր, թե մեզ մոտ վիճակն ավելի լավ է, քան բազմաթիվ զարգացած երկրներում: Մեր վիճակն այնքան վատ է, որ մեր անմիջական հարևան Վրաստանը հուլիսի 1-ից բացում է սահմանները զբոսաշրջիկների համար, սակայն մեր երկրի քաղաքացիներին հրաժարվում է ընդունել:

Այսինքն` ՀՀ կառավարությունը աշխարհի մասշտաբով ամենավատ աշխատող կառավարություններից է, և այս մասին փաստում են վերը հիշատակված թվերը: Նիկոլ Փաշինյանը այսքանից հետո գոնե պետք է անկեղծորեն ներողություն խնդրեր ՀՀ քաղաքացիներից, որ ժամանակին չի կարևորել համավարակի նշանակությունը, չի կարողացել արդյունավետ կանխարգելիչ քայլեր ձեռնարկել: Այո, նա պարտավոր էր ասել` ՀՀ հպարտ քաղաքացի, խնդրում եմ ներիր ինձ, որ համավարակի առաջին օրերին, երբ աշխարհում պանդեմիա էր հայտարարված, ես սահմանդարկան այո-ի քարոզարշավ էի անում, և հայտարարում, թե կորոնավիրուսն ո՞ւմ շունն է:
Բայց մարդը նման գիտակցում չունի, անգամ ընկալում չունի, որ իր փոխարեն համավարակի մասին պետք է մասնագետները խոսեն, որովհետև իր խոսքերին վաղուց արդեն որևէ մտածող մարդ լուրջ չի վերաբերվում:

Հայկ  Դավթյան