Վարչապետի առաջարկը բոլոր նրանց, ովքեր ուզում են աննկատ մնալ
Այսուհետ կարելի է բջջային հավելվածով նկարել ՃՈ կանոնների խախտումը: ՀՀ վարչապետ Նիկոլ Փաշինյանն առաջարկեց ցանկում ավելացնել նաեւ ավտոմեքենայում 2-ից ավելի մարդ լինելու դեպքում՝ դիմակ չկրելու դեպքը:
Փոխվարչապետ Տիգրան Ավինյանն ասաց, որ այդտեղ մարդու անձնական կյանքի իրավունքի հետ կապված խնդիր կա:
Արդարադատության նախարարը խոստացավ եւս մեկ անգամ ուսումնասիրել խնդիրը, որպեսզի դիմակ չկրելու մասը նույնպես ներառվի արձանագրվող դեպքերի ցանկում:
«Այդտեղ ի՞նչ խնդիր կա. մարդը տեսավ, նկարեց, արձանագրվեց, որ մեքենայում առանց դիմակի անձ կա, համարը գրվեց, վարորդին տուգանում են դրա համար: Մենք հիմա այն վիճակում ենք, որ դա պետք է ավելացնել այդ ցանկում: Մենք մեր քաղաքացիներին ասում ենք, որ հակահամաճարակային շարժում ենք սկսում, բայց նրանց չենք ուզում համապատասխան գործիք տա՞լ: Որտե՞ղ է պրոբլեմը»,-ասաց նա:
Ռուստամ Բադասյանը պարզաբանեց. «Եթե անձին տեսանկարահանում են կոնկրետ ժամին, կոնկրետ վայրում, եւ իր մասին տեղեկություններ են հավաքում, դա միանշանակ անձնական տվյալների մշակում է, ինչը խնդրահարույց է»:
«Ավելի լավ, թող դիմակով լինեն, էդ դեպքում՝ չեն ճանաչի, թե ով է, ինչքան էլ նկարեն: Եթե մարդիկ մեքենայով տեղ են գնում եւ չեն ուզում, որ կողքից իրենց ճանաչեն, շատ լավ միջոց է կրել դիմակներ: Ապակիները մգեցնելու կարիք էլ չկա, մանավանդ ոստիկանությունը ռեյդեր է անում, որ մուգ ապակիներով մեքենաներ չլինեն»,-ասաց Փաշինյանը՝ հավելելով, որ ընթացքի ժամանակ նկարելու դեպքում մարդու դեմքը չի երեւա, փոխարենը կերեւա՝ դիմակով է, թե ոչ:
Հետևեք մեզ Viber-ում
