Իշխանությունը պայթում է․ վերջին հույսը Սորոսն է

Հայաստանում ներքաղաքական զարգացումներն ընթանում են լույսի արագությամբ։ ԲՀԿ ղեկավար Գագիկ Ծառուկյանի հայտնի հայտարարությունից հետո իշխանությունում քաոսային իրավիճակ է, մի կողմից մարտական պատրաստվածության է բերվել Իմ Քայլը խմբակցությունը, մյուս կողմից գործի է անցել վարչապետ Նիկոլ Փաշինյանը։ Բայց նախ գործի անցնելը նա հայտարարեց իր եւ ընտանիքի առողջացման մասին, որը, իբր, պարզ է դարձել հերթական թեստավորման արդյունքում։ Փաստորեն, ընդամենը մեկ մարդու իշխանափոխության պահանջ էր հարկավոր եւ կոնսենսուսի հեռանկար, որպեսզի Փաշինյանը, եւ ոչ միայն, մեկ օրում ապաքինվեր։ Իրականում նա հաստատեց իր եւ ընտանիքի կորոնովիրուսով վարակված լինելու մասին կասկածները եւ ահա նորից ակտիվ աշխատանքի է անցնում։

Վարչապետի հրահանգով պաշտոններից ազատվեցին ՀՀ ոստիկանապետը, ԱԱԾ պետը, ՀՀ Զու շտաբի պետը, մամուլը գուժում է, որ այլ ազատումներ էլ կլինեն։ Նիկոլ Փաշինյանը, ըստ տեղեկությունների, նախանձելի օրեր չի ապրում, բոլորին կասկածում է իրեն դավաճանելու, այսպես կոչված հակահեղափոխականների հետ համագործակցելու եւ իրեն իշխանությունից հեռացնելու մեջ։ Բնականաբար հայտնի է, թե որ մարդիկ են կասկածամտությամբ տառապում, եւ կարծում ենք՝ կարիք չկա «իրերն իրենց անուններով կոչել»։ Մեզ հայտնի է դարձել, որ երեկ նա հավաքել է թիմին եւ սպառնալից ելույթներ է ունեցել, բոլորին տեղեկացրել է, որ կասկածներ ունի իր թիկունքում ծրագրվող դավադրության վերաբերյալ, տեղեկացրել է, որ առաջիկայում կադրային ջարդ է իրականացնելու։

Ինչպես ասում են երեկոն խոստանում է հետաքրքիր լինել, այս ազատումներն ինքնին հուշում են իշխանության նավի խորտակումը եւ փրկվելու հուսահատ փորձերը։ Կարծում ենք այլեւս կարիք չկա հիշեցնելու, որ երկու տարվա ընթացքում Նիկոլ Փաշինյանը ոչ միայն կյանքի չկոչեց իր խոստումներից ամենահիմնականը, այլեւ Հայաստանի արտաքին քաղաքականությունը դրեց մի վտանգավոր հունի մեջ, որի արդյունքում այսօր ստիպված է իշխանությամբ հատուցել։ Մենք բազմիցս ենք գրել, որ Ռուսաստանը առաջիկայում հզոր պրեսինգի է դիմելու, կիրառելու է կոշտ գործիքներ, ինչին ի պատասխան Փաշինյանը ուժեղացնում է պետության ուժային կառույցները, նախեւառաջ՝ կառավարական առանձնատունը, որի մասին մամուլում արդեն իսկ հրապարակումներ կան։ Նիկոլ Փաշինյանի կադրային փոխատեղումներն էլ հուշում են, որ նա որոշակի խմբագրումներ է փորձելու անել՝ ելնելով արտաքին քաղաքական ազդեցություններից։

Գաղտնիք չէ, որ իշխանափոխությունից հետո Նիկոլ Փաշինյանը ամբողջովին չբավարարեց հեղափոխության փայատեր սորոսականների ակնկալիքներն ու ախորժակը։ Որոշ հարցերում նա գործեց ընդդեմ այդ խմբի՝ նպատակ ունենալով սիրաշահել մեր ռազմավարական դաշնակցին։ Բայց Փաշինյանին ամեն դեպքում չհաջողվեց իրական փայլուն հարաբերություններ հաստատել ՌԴ-ի հետ, թե ինչում, մենք բազմիցս ենք գրել։ Հիմա, ըստ երեւույթի, իշխանությունը փրկելու միակ հույսը Փաշինյանը տեսնում է սորոսականներին իշխանությունը հանձնելու եւ նրանց միջոցով բալանսը վերականգնելու, իշխանությունը այլ ուժերի չհանձնելու մեջ։
Այս համատեքստում է պետք դիտարկել սորոսական, կամ հակառուսական պաշտոնյա Արգիշտի Քյարամյանի ԱԱԾ պետ նշանակելու փաստը։ ԱԱԾ-ն բարդ համակարգ է, 29-ամյա երիտասարդին այս համակարգի ղեկավար նշանակելը հղի է պետության համար լուրջ վտանգներով, բայց Նիկոլ Փաշինյանն այսօր իշխանությունը կորցնելու վտանգի առջեւ է եւ հավանաբար հաշվարկել է, որ ավելի լավ է պետություն կորցել, քան իշխանություն։ Մեկ այլ սորոսական էլ օրերս նշանակվեց ՊԵԿ նախագահի պաշտոնում, խոսքը արդարադատության նախարար Ռուստամ Բադասյանի ընկեր Էդվարդ Հովհաննիսյանի մասին է։ Առաջիկա նշանակումները նույնպես կտեղավորվեն այս տրամաբանության մեջ, քանի որ Փաշինյանին այլ բան չի մնում, քան հույսը դնել սորոսի վրա։ Կամ էլ պաշտոններում կնշանակի իր մտերիմ-բարեկամներին, որպեսզի նրանց միջոցով ինչ ուզի, այն էլ անի, ինչպես եղավ ոստիկանապետի դեպքում, նա այդ պաշտոնում նշանակեց իր դասընկեր Վահե Ղազարյանին, իսկ ՀՀ ԶՈՒ պետի պաշտոնում իր համերկացի Օնիկ Գասպարյանին:

Անի Սահակյան