Դեմոկրատներն առաջիկա նախագահական ընտրություններում կփորձեն ԱՄՆ-ում տեղի ունեցող ցույցերն օգտագործել Թրամփի դեմ. Բենիամին Պողոսյան (տեսանյութ)
ԱՄՆ-ում տեղի ունեցող այսօրվա իրադարձությունների բացառիկությունը նրանում է, որ մասշտաբներն են շատ մեծ: Չեմ կարծում, թե սա պայմանավորված է միայն սևամորթի սպանությամբ, մարդիկ երկար ժամանակ փակված են եղել իրենց տներում և հիմա այսպես իրենց բողոքի ձայն են բարձրացնում: Այս մասին Անժելա Թովմասյանի՝ Արմնյուզ ՀԸ «Հայելու առաջ» հեղինակային հաղորդման ժամանակ ասել է քաղաքագետ, միջազգայնագետ Սուրեն Սարգսյանը՝ անդրադառնալով ԱՄՆ-ում այս օրերին ընթացող բազմահազարանոց ցույցերին:
Հաղորդման մյուս հյուրի՝ քաղաքագետ Բենիամին Պողոսյանի խոսքով՝ պետք է ֆիքսել, որ ԱՄՆ-ում էլ կան խորքային, սոցիալական անհավասարության վերաբերյալ խնդիրներ. «Ռասսայական խնդիրներ, ագրեսիա․ այս ամենը ԱՄՆ-ում ևս կա: Հիշենք, որ 1992թ.-ին Լոս-Անջելեսում նմանատիպ ցույցեր են եղել, որի ժամանակ 50-ից ավել մարդ է մահացել»:
Բենիամին Պողոսյանը կիսում է Սուրեն Սարգսյանի խոսքը՝ համաձայն որի՝ այս ցույցերի պատճառն ավելի խորքային է, կարող են լինել նաև սոցիալական խնդիրներ:
Սուրեն Սարգսյանը նշում է, որ ըստ պաշտոնական թվերի, ամեն տարի ԱՄՆ-ի ոստիկանությունը 1500-1700 մարդու է գնդակահարում. «Գնդակահարվողների հիմնական մասը սպիտակամորթներ են, բայց սա դեռ չի նշանակում, որ ռասսայական խնդիրներ չկան ԱՄՆ-ում»:
Ըստ միջազգայնագետի՝ սա բնորոշ է ոչ միայն Միացյալ Նահանգներին, այլև բազմազգ շատ պետություններին:
Հարցին՝ արդյոք այս ցույցերն ինքնաբուխ են, թե՞ որոշակի հրահրումներ կան՝ հաշվի առնելով, որ ԱՄՆ-ում առաջիկայում նախագահական ընտրություններ են, Բենիամին Պողոսյանը պատասխանել է. «Իհարկե, այս ցույցերը քաղաքականացված են: Այսօր կան մարդիկ, ովքեր նշում են, որ այս ցույցերով փորձում են տապալել Թրամփին կամ գոնե թույլ չտալ, որպեսզի հինգ ամիս անց նա նորից վերընտրվի նախագահի պաշտոնում»:
Քաղաքագետի խոսքով՝ ակնհայտ է, որ դեմոկրատներն առաջիկա նախագահական ընտրություններում կփորձեն այսօր տեղի ունեցող ցույցերն օգտագործել Թրամփի դեմ. «Թրամփն էլ իր հերթին բացահայտ հայտարարում է, որ պատրաստ է անգամ զինված ուժերը ներգրավվել այս ցուցերը դադարեցնելու նպատակով, որպեսզի ցույց տա, որ անգամ այս պայմաններում ինքն ունակ է հաղթահարել այսպիսի ճգնաժամերը»:
Հետևեք մեզ Viber-ում
