Փոխհրաձգություն. Գագիկ Ծառուկյան-Նիկոլ Փաշինյան

ԲՀԿ խմբակցության քաղաքական խորհրդի նիստում Գագիկ Ծառուկյանը հայտարարել է, որ կառավարությունն իր 100 տոկոս կազմով պետք է հեռանա, քանի որ ձախողել է կորոնավիրուսի դեմ պայքարը:

Ծառուկյանի խոսքով` կառավարությունն ուներ բավարար ժամանակ` կատարելու հեղափոխության ժամանակ տրված խոստումները, ապահովելու զարգացման բարեփոխումներ, իրագործելու տնտեսական հեղափոխություն: Ծառուկյանը կոչ է արել բոլոր առողջ քաղաքական ուժերին համախբվել իր շուրջը, ստեղծել ազգային համաձայնության և համերաշխության կոնսենսուս և հանդես բերել երկիրը ծանր կացությունից դուրս բերելու նախաձեռնություն: ԲՀԿ առաջնորդը նաև նշել է, թե այն անձինք կամ ուժերը, որոնք հանրության աչքին վարկաբեկված են, չունեն բավարար վստահություն, չեն կարող իր հետ համագործակցել, իսկ երկրի ապագայով մտահոգ բոլոր անհատների և ուժերի հետ ինքը պատրաստ է համագործակցել:

Գագիկ Ծառուկյանի այս հայտարարությունից անմիջապես հետո վարչապետ Նիկոլ Փաշինյանի խոսնակ Մանե Գևորգյանը ՖԲ իր էջում հանդես է եկել պատասխան գրառմամբ. «Կարծում եմ պարոն Ծառուկյանը պարզապես մտահոգված է մի շարք քրեական գործերի ընթացքով, որոնք վերաբերվում են փողերի լվացմանը, ընտրակաշառք բաժանելուն, հարկերից խուսափելուն, կոռուպցիային: Եթե պարոն Ծառուկյանը կարծում է, որ իր քաղաքական հայտարարությունները կշեղեն քննության բնականոն ընթացքը, սխալ հաշվարկ է, որովհետեւ Հայաստանում բոլորը հավասար են օրենքի առաջ, նաեւ՝ ապօրինի ձեռքբերված գույքը բռնագանձելու մասին օրենքի առաջ, որով մտահոգվելու առիթ նույնպես պարոն Ծառուկյանը կարող է ունենալ»,- նշված է խոսնակի գրառման մեջ:

Սա փաստորեն վարչապետ Նիկոլ Փաշինյանի անունից Ծառուկյանին ուղղված շատ հստակ մեսիջ է, որ եթե փորձի խոսքից գործի անցնել, ապա պետական մեքենան գործի կանցնի, որի արդյունքում Ծառուկյանը կկորցնի իր կուտակած կապիտալը, հնարավոր է անգամ` հայտնվի բանտում: Նիկոլ Փաշինյանը շանտա՞ժ է անում, թե՞ քաղաքական համագործակցության առաջարկ. թերևս երկուսը միաժամանակ: Իր ելույթում Ծառուկյանը չթաքցրեց, որ իր հետ հանդիպումներ և բանակցություններ եղել են: Ըստ ամենայնի` դրանք չեն բավարարել Ծառուկյանին: Իրականում Ծառուկյանի վիճակը բարդ է` նա շատ լավ հասկանում է, որ եթե Նիկոլ Փաշինյանն անցնի իր հեղափոխության երկրորդ էտապի իրագործմանը, կապիտալի վերաբաշխումն ու կուլակաթափությունն անխուսափելի են լինելու: Փաշինյանը պատրաստվում է խլել Ծառուկյանի սեփականությունը, և նա իր այդ մտադրությունն անգամ չի էլ թաքցնում:

Խոշոր հաշվով Գագիկ Ծառուկյանն այլ ելք չունի, քան գնալ մինչև վերջ` թույլ չտալով, որ հեղափոխության փլատակների տակ մնան երկրի տնտեսությունն ու դրա հետ միասին նաև սեփական բիզնես կայսրությունը:

Հայկ Դավթյան

Հ. Գ. Վարչապետի խոսնակի գրառմանը շատ օպերատիվ արձագանքել է նաև Ծառուկյանի խոսնակ, ԱԺ պատգամավոր Իվետա Տոնոյանը` գրելով, թե Մանե Գևորգյանի տեքստի իրական հեղինակը պարզապես թաքնվել է խոսնակի թիկունքում:
«Վարչապետի խոսնակի պատասխանն ավելի ուշագրավ է այն առումով, որ իր մեջ պարունակում է քաղաքական ցինիզմի ու շանտաժի ակնհայտ տարրեր։ Իշխանությունն՝ իր խոսնակի շուրթերով, ըստ էության՝ ազդարարում է, որ մտացածին պատրվակներով քրեական հետապնդում կարող է սանձազերծել ցանկացած մեկի դեմ, ով վայելում է հասարակության հարգանքը ու հանդգնում է քննադատել կառավարության կողմից իրականացվող անհեռանկար քաղաքականությունը։
Իշխանությունն այսպիսով ազդարարում է, որ պատերազմ է հայտարարում ոչ թե կորոնավիրուսին ու աղքատությանը, այլ՝ ընդդիմությանը, խորհրդարանական ամենամեծ ընդդիմադիր խմբակցությանը։ Միով բանիվ՝ ակնհայտ է դառնում, որ վիճահարույց օրենքներն ընդունվել են՝ ոչ թե երկրում օրինականություն և արդարություն հաստատելու, այլ՝ ընդդիմության դեմ՝ որպես մահակ, օգտագործելու համար։
Գագիկ Ծառուկյանը վերահաստատում է իր ելույթում արտահայտված բոլոր մտքերը՝ կառավարությանը կոչ անելով վերջ տալ քաղաքական շանտաժին ու վերադառնալ երկխոսության ու քաղաքակիրթ բանավեճի դաշտ»,- նշել է Տոնոյանը։