Որքան գումար է վերադարձվել կոռուպցիայի դեմ պայքարի արդյունքում. պատգամավորը՝ նախարարին
2019 թվականի պետական բյուջեի կատարողականի քննարկումները շարունակվում են: «Լուսավոր Հայաստան» խմբակցության պատգամավոր Մանե Թանդիլյանը մի քանի հարց ուղղեց ՀՀ Ֆինանսների նախարար Ատոմ Ջանջուղազյանին: Դրանք վերաբերում էին ՀՀ պետական պարտքին, կառուպցիայի դեմ պայքարին:
Մանե Թանդիլյանը հետաքրքրվեց` կոռուպցիայի դեմ պայքարի շրջանակում որքա՞ն գումար է վերականգնվել բյուջե, որքա՞ն է եղել պլանավորված, որին ի պատասխան Ատոմ Ջանջուղազյանը պատասխանեց, որ առանձնացված որևէ ծրագիր չկա կոռուպցիայի դեմ պայքարի շրջանակում, և նման հաշվառում էլ չկա, քանի որ կոռուպցիայի դեմ պայքարը, դրսևորումները շատ բազմազան են:
Մանե Թանդիլյանը հարցրեց նաև, թե ինչպես կարելի է իմանալ, թե այն, ինչ հայտարարվում է Դատախազության կողմից, համապատասխանում է իրականությանը:
«Պետական բյուջերում նման հաշվառում չկա: Դատախազի ներկայացրածում պետք է համոզվենք ներկայացրածի հիմնավորմամբ, եթե այդ 1,4 միլիարդի տակ կա կոնկրետ բացվածք և երևում է, որ դրանից այսքան գումարը այս գործի շրջանակում է, և այսինչ տեղն է վճարումը կատարվել, Դուք որևէ խնդիր չունեք համոզվելու»,-ասաց Ատոմ Ջանջուղազյանը և նշեց, որ այդ տեղեկությունը հասանելի է:
Հետևեք մեզ Viber-ում
