Մարդիկ, հանուն որոնց առաջացավ այս շիլաշփոթը
Կենտրոնական ընտրական հանձնաժողովն արդեն հրապարակել է 6-րդ գումարման Ազգային ժողով կազմը, բայց Ծառուկյան դաշինքում տեղի ունեցող խժդժությունները դեռ շատ ջուր կքաշեն: Ապագայում նոր զարգացումների հավանականությունը բավականին մեծ է: Եղածը եղած է ու փաստ, որ դաշինքի խմբակցությունում առնվազն 8 պատգամավորի Ծառուկյանը չէր ցանկանում տեսնել պատգամավորի կարգավիճակում: Իսկ ովքեր էին այն թեկնածուները, որոնք Գագիկ Ծառուկյանի որոշմամբ պետք է պատգամավոր դառնային: ԿԸՀ-ն ինքնաբացարկների դիմումների վիճարկումից հետո հաստատել է հետեւյալ կազմը, համամասնական ցուցակից պատգամավոր կդառնան Գագիկ Ծառուկյանը, Իշխան Զաքարյանը, Նիրա Զոհրաբյանը, Վարդան Բոստանջյանը, Միքայել Մելքումյանը, Արարատ Զուրաբյանը, Տիգրան Ուրիխանյանը, Իվետա Տոնոյանը, Արթուր Մանուկյանը, Լուիզա Սարգսյանը, Վահե Էնֆիաջյանը, Կարինե Պողոսյանը, Սերգեյ Բագրատյանը, Մարինա Մարգարյանը եւ Շաքե Իսայանը: Ցանկից երեքը այսպես կոչված ինքնակոչեր են՝ Արարատ Զուրաբյանը, Սերգեյ Բագրատյանը եւ Աբրահամ Մանուկյանի որդի Արթուր Մանուկյանը, նրանք այն 12 պատգամավորների թվում էին, որոնք երեկ ներկայացան ԿԸՀ ու հետ վերցրեցին Ծառուկյանի ներկայացրած ինքնաբացարկի դիմումները: Այս երեքի փոխարեն Գագիկ Ծառուկյանը նպատակադրվել էր խորհրդարան տանել եւս երեք կնոջ, մեկը Այծեմնիկ Օհանյանն է, որը անցած աշնանը Վանաձորի քաղաքապետի ընտրություններին ԲՀԿ-ի ավագանու ցուցակն էր գլխավորում, մասնագիտությամբ բժշկուհի, երկրորդը՝ Աննա Մարգարյան ԲՀԿ անդամ, Գառնիի թիվ մեկ հիմնական դպրոց ՊՈԱԿ-ի տնօրեն եւ Մադոյան Լարիսա, ԲՀԿ անդամ, «Աբովյանի ծննդատուն» ՊՓԲԸ տնօրեն։ Ինչ վերաբերում է ռեյտինգային թեկնածուներին, ապա այստեղ եւս բազմաթիվ անակնկալներ կային, թիվ 1 ընտրատարածքում ԾԴ-ից առաջատար երեք թեկնածուներն (Մամոյան Արթուր, Ծառուկյան Արտյոմ, Եղիկյան Ալիկ) ըստ Ծառուկյանի ցանկության պետք է ինքնաբացարկ ներկայացնեին, որ պատգամավոր դառնար 1120 ձայն հավաքած աշխատանքի եւ սոցիալական հարցերի նախկին նախարար Գեւորգ Պետրոսյանը: Բայց Արտյոմ Ծառուկյանը վերականգնեց իր իրավունքները եւ հետ վերցրեց ինքնաբացարկի դիմումը, հիմա պատգամավոր նա կդառնա: Թիվ 2 ընտրատարածքից Ծառուկյանը պատգամավոր էր ուզում դարձնել «Պրահա» ՍՊԸ տնօրեն Մելիք Սաֆարյանին, որը Ծառուկյանի թիկնապահն է եղել, բայց այս ընտրատարածքում Վահան Կարապետյանը կրկնակի անգամ շատ ձայներ էր ստացել եւ ընտրություններից առաջ էլ ծեծի ենթարկվեց Արման Սահակյանի թիմակիցների կողմից: Կարապետյանը նույնպես վերականգնեց մանդատը: Թիվ 3-ից՝ Ծառուկյանը խորհրդարան էր ուղարկում ԲՀԿ Մալաթիա-Սեբաստիա տարածքային կառույցի նախագահ Հակոբ Նազարյանին, մի քանիսը, այդ թվում ամենաշատ թվով ձայն ստացած Հարություն Ղարագյոզյանը՝ Կարամելի Հարութ, ինքնաբացարկ էին ներկայացրել: Վերջինս վերջին պահին ԿԸՀ մտավ ու հետ վերցրեց դիմումը, նա է լինելու այս ընտրատարածքի պատգամավորը: Թիվ 4-ից՝ ԱԺ պատգամավոր Վահե Էնֆիաջյանին էր որոշել Ննապոլեոն Ազիզյանի փոխարեն ռեյտինգայինով ճանապարհել ԱԺ,բայց Ազիզյանը ամենաառաջինը ըմբոստացավ Ծառուկյանի որոշման դեմ, նա կլինի ԱԺ-ի ամենատարեց պատգամավորը: թիվ 5-ից՝ Հովիկ Աբրահամյանի որդի, Արտաշատաի քաղաքապետ Արգամ Աբրահամյանը եւ պատgամավոր Տիգրան Ստեփանյանը կանցնեն, թիվ 6-ից՝ Արայիկ Աղաբաբյանը, թիվ 7-ից՝ Նորա Առուստամյանին էր Ծառուկյանը պատրաստվում գործուղել օրենսդիր աշխատանքի, Նորան Ծառուկյանի գործերի տնօրենի դուստրն է, բայց նա ձայների քանակով այս ընտրատարածքում 3-րդն է, Խաչիկ Մանուկյանի ու Լյովա Խաչատրյանըի անունից ինքնաբացարկի դիմումներ էին ներկայացվել, որպեսզի Նորան պատգամավոր դառնա, բայց Խաչիկ Մանուկյանը չհամակերպվեց այդ մտքի հետ ու հետ վերցրեց մանդատը: Թիվ 8-ից՝ նախկին պատգամավոր Հրանտ Մադաթյանը , թիվ 9-ից՝ Սպիտակի նախկին քաղաքապետ, «Հավ» մականունով Վանիկ Ասատրյանը, թիվ 10-ից՝ Անդրանիկ Մանուկյանի որդին, Գագիկ Ծառուկյանի փեսան՝ Դավիթ Մանուկյանը եւ «Շշի Մելո» մականունով հայտնի ԱԺ պատգամավոր Մելիք Մանուկյան: ԹիՎ 11-ից՝ Գյումրիի մանկավարժական համալսարանի նախկին ռեկտոր, քաղաքապետի նախկին թեկնածու Վարդեւան Գրիգորյան եւ Գյումրիի նախկին քաղաքապետ, Վարդան Ղուկասյանը, թիվ 12-ից՝ ԱԺ պատգամավոր Մերուժան Սիմոնյանը: Վերջին մի քանի տարածքների վերաբերյալ Ծառուկյանը առարկություններ չուներ: Անի Սահակյան