Վարչապետի «աչք ու ականջից» մինչեւ Սերժ Սարգսյանի «լյուբիմչիկներ»
2017 թվականի Ազգային ժողովի կազմը խիստ չի տարբերվի նախկինից։ Քաղաքական խմբակցությունները առանձնապես չեն թարմացվել, խորհրդարան են մտել հին պատգամավորները: Ապրիլյան պայքարի արդյունքում խորհրդարան անցավ 4 քաղաքական ուժ` իշխող Հանրապետական կուսակցությունը (քվեների ավելի քան 49%), «Ծառուկյան» դաշինքը (27, 37%), «ԵԼՔ» դաշինքը (7,78%) և Դաշնակցությունը (6,58%)։ 2012 թվականին ընտրված խորհրդարանի հետ համեմատ, Ազգային ժողովի նոր կազմում «հնաբնակները» հիմնականում հանրապետականներն են։ Այնուամենայնիվ նոր պատգամավորներ կան։ Կանանցից երկուսն են թարմ կադրեր՝ Աշխատանքի եւ սոցիալական հարցերի նախարարի տեղակալ Ջեմմա Բաղդասարյանն ու Կարեն Կարապետյանի օգնական Շուշան Սարդարյանը։ Տիկին Բաղդասարյանը ջերմ հարաբերություններ ունի նախագահի ընտանիքի հետ, սակայն իր ոլորտում նա հայտնի է որպես միջակ չինովնիկ, ինչպես կդրսեւորվի ԱԺ-ում, կարելի է հետեւություն անել։ Շուշան Սարդարյանը իր հավատարմությունն է դրսեւորել բոլոր ոլորտներում, որտեղ աշխատել է, թիմի մարդ է, տիրապետում է իշխանության խոհանոցին, սակայն առաջին հերթին նա լինելու է վարչապետի ներկայացուցիչը՝ աչքն ու ականջը ԱԺ-ում։ Օրինաստեղծ աշխատանքներին ակտիվ մասնակցություն կունենան արդարադատության նախկին նախարար Հրայր Թովմասյանն ու նախկին գլխավոր դատախազ Գեւորգ Կոստանյանը։ Նրանք կհամակարգեն իրավական ոլորտը ու կհեղինակեն այդ ոլորտին վերաբերող օրինագծերը։ Սերժ Սարգսյանի բիզնես գործընկեր ու առհասարակ մտերիմ Վահան Հարությունյանը եւս պատգամավոր դարձավ, ով «ՄԻԿՄԵՏԱԼ» ընկերության սեփականատերն է, Սերժ Սարգսյանի համար նրա պատգամավոր դառնալու հարցը այնքան կարեւոր էր, որ տեղավորեց համամասնական ցուցակում, քանի որ կասկածենր ուներ, որ Կոտայքում ռեյտինգային պայքարում նա կպարտվի։ Հետաքրքրական էր Արման Սաղաթելյանի խորհրդարան տանելու փաստը։ Նախագահի նախկին խոսնակը հիմա Հանրային ռադիոն է ղեկավարում, ոչ պակաս կարեւոր պոստ՝ ինֆորմացիոն պատերազմի համակարգման առումով։ Չնայած կարծես օրինաչափություն է՝ Սերժ Սարգսյանի խոսնակների վերջին հանգրվանը ԱԺ-ն է, Սամվել Ֆարմանյանը վկա։ «Արարատ» ՀԸ տնօրեն Միհրան Հակոբյանը եւս պատգամավոր է։ Նա հայտնի դարձավ ՊՊԾ գնդի ժամանակ, առաջարկում էր «սատկացնել» Սասնա ծռեր խմբի տղաներին։ Այդ արտահայտության համար նա հայտնվեց ԱՄՆ դեսպանատան նախատինքին, դեսպանությունը չթույլատրեց Հակոբյանի գործուղումը ԱՄՆ։ Օլիգարկիկ պատգամավորների ցանկը կհամալրվի Հակոբ Բեգլարյանի անունով, նա Գագիկ Բեգլարյանի եղբայրն է։ Նույն խմբում կլինի ԴԱՀԿ նախկին պետ, օֆշորային գեներալ Միհրան Պողոսյանը, որը պարտադրված կլինի ԱԺ-ում, քանի որ վարչապետ Կարեն Կարապետյանը չի ցանկանում տեսնել Կառավարության կազմում։ Կենտրոն Համայնքից պատգամավոր է ընտրվել Հարություն Կարապողոսյանը, նա պաշտպանության նախարար Վիգեն Սարգսյանի թիկնազորի պետ Կարո Կարապողոսյանի հայրն է։ Օրենսդիր աշխատանքի կանցնի նախկին ոստիկանապետ Ալիկ Սարգսյանը, ում համար գուցեեւ կապ չունի թե որտեղ կաշխատի, երբ անգործ էր մնացել ու թափուր հաստիքներ էին առաջ գալիս, ոչ պատահական կերպով շրջանառության մեջ էր դրվում իր անունը, ասենք ԱԻՆ նախարարի, ԱԱԽ քարտուղարի ու այլ պաշտոնների դեպքում։ Արագածոտնի նախկին մարպետի եղբայր Նաիրի Սահակյանն է նոր պատգամավոր, նաեւ Սիսիանի քաղաքապետի եղբայր Ավետ Սարգսյանը։ Անի Սահակյան