Դավիթ Անանյանը ազատման դիմո՞ւմ կգրի

Ազգային ժողովում անդրադառնալով մաքսանենգ ծխախոտի թեմային՝ Նիկոլ Փաշինյանը ուշագրավ հայտարարություն արեց, որից հետո կամ ՊԵԿ նախագահ Դավիթ Անանյանը պետք է ազատման դիմում գրի, կամ էլ Փաշինյանը պետք է հերքում տարածի սեփական հայտարարության մասին:

Նիկոլ Փաշինյանը, պատասխանելով պատգամավոր Տիգրան Ուրիխանյանի հարցին, նշեց, թե այդ համակարգում վերջին 5 տարում ոչինչ չի փոխվել, հետևաբար, եթե կա պրոբլեմ, դրա պատասխանը պետք է ստանալ Միքայել Մինասյանի աներ Սերժ Սարգսյանից: Ինչպես հայտնի է, Միքայել Մինասյանը վերջերս մաքսանենք ծխախոտի թեմայով ուշագրավ բացահայտումներ է անում ֆեյսբուքյան ուղիղ եթերների միջոցով: Նա անգամ մաքսանենգ արտահանման վերաբերյալ փաստաթուղթ էր հրապարակել, ըստ որի` մայիսին նոր խմբաքանակ է արտահանվել Սոչի` նախատեսված Աբխազիայում իրացնելու համար: Ընդ որում, փաստաթղթի մեջ Աբխազիան նշվել էր որպես Վրաստանի մաս: Իսկ մինչ այդ հայտնի էր դարձել, որ ՌԴ Կրասնոդար և Վորոնեժ քաղաքներում բռնվել էր Հայաստանից տարված մաքսանենք ծխախոտ: «Դուք գիտեք, որ Կրասնոդարում բռնվել է Հայաստանից մաքսանենգ ճանապարհով արտահանված ծխախոտ: Եթե հետ պտտենք իրադարձությունն ու քննենք ՀՀ մաքսային մարմինների գործողությունները, այդ գործողություններում ոչ մի բան չի կարող փոխվել, որովհետև ցանկացած փոփոխություն կլինի ապօրինի: Մարդը գալիս է, ասում՝ ես ծխախոտ եմ արտահանում Աֆղանստան՝ Ռուսաստանով, և այդ մարդն օրինական ձևակերպում, թռչում է: Եթե ճանապարհին վայրէջք է կատարում Կրասնոդարում ու այնտեղ փորձ է արվում բեռնաթափել ծխախոտի մի մասը, ՀՀ իշխանությունը դրա հետ ոչ մի կապ չունի»,- Ազգային ժողոցում ահա այպիսի պարզաբանում է տվել Նիկոլ Փաշինյանը:

Այնուհետև նա փոխաբերական իմաստով պատմել է Պապն ու շաղգամը հայտնի հեքիաթի հայտնի դրվագը` փոքր-ինչ ձևափոխված. «Պապիկը շաղգամից, տատիկը Միշիկից, փիսոն տատիկից ու ամենակարևորը՝ մուկն էլ վերջից ինչքան էլ քաշի, մեկ է` չեն պլստալու»,- նշել է Փաշինյանը: Ակնարկը, հասկանալի է, Միքայել Մինասյանի դեմ հարուցված գործին է վերաբերում: Հեքիաթը մեր հետաքրքրության շրջանակից դուրս է, խոսենք կոնկրետ խնդրի մասին: Պարզաբանումը, որտեղ Նիկոլ Փաշինյանը բառացի նկարագրեց մաքսանենգության ողջ սխեման, ուշագրավ է: Մինչ այդ ծխախոտի հետ կապված պաշտոնական պարզաբանում էր ներկայացրել նաև Պետական եկամուտների կոմիտեն` հավաստիացնելով, թե արտահանումը կատարվել է ԵԱՏՄ-ի մաքսային բոլոր կանոնակարգերին համաձայն: Հայկական կողմը բոլոր ձևակերպումներն արել է ճիշտ` ըստ ԵԱՏՄ համապատասխան ընթացակարգերի: Մինչդեռ Նիկոլ Փաշինյանն ասում է, որ ծխախոտը պետք է արտահանվեր Աֆղանստան՝ Ռուսաստանով: Արտահանողները ճանապարհին որոշել են ծխախոտի մի մասը իրացնել ՌԴ-ում, որն էլ դիտվել է մաքսանենգություն:
Հարց` այդ դեպքում ինչու է Հայաստանում ծխախոտի ձևակերպումն արվել ԵԱՏՄ ընթացակարգերով, չէ որ Աֆղանստանը, որի համար նախատեսված է եղել ծխախոտը, ԵԱՏՄ անդամ չէ: Ազգային ժողովում Նիկոլ Փաշինյանը ոչինչ չհերքեց, նա հասատտեց այն, ինչի մասին խոսում ու գրում են լրատվամիջոցները, ինչի մասին պատմել է Միքայել Մինասյանը: Եվ եթե այս ամենը ճշմարտություն է, ուրեմն Դավիթ Անանյանը պետք է ազատման դիմում գրի կամ էլ հերքում տարածի, որ վարչապետը սուտ տեղեկատվություն է ներկայացրել:

 Հայկ  Դավթյան