Հեղափոխական կոռուպցիա եւ հովանավորչություն, ում «կզոհաբերի» Փաշինյանը
Բարձրագույն որակավորման կոմիտեի նախագահ Սմբատ Գոգյանը որոշել է հեռանալ զբացեղրած պաշտոնից: Նա արդեն պաշտոնից ազատման դիմում է գրել՝ նշելով, որ Հայաստանում լայն տարածում ունի ակադեմիական գրագողությունը, իսկ կրթության և գիտության բարեփոխման իր պատկերացումները չեն համընկել նախարարության ռազմավարության հետ: <<Կրթության և գիտության բարեփոխման իմ պատկերացումները չեն համընկել նախարարության ռազմավարության հետ և ժամանակի ընթացքում այդ հակասությունները խորացել են։ Չնայած այդ տեսակետերի տարբերության, աշխատել եմ խղճի թելադրանքով։ Համակարգում բարեփոխում անելու համար անհրաժեշտ էին օրենքի կողմից լիազորող նորմեր, որոնք ստանալ այդպես էլ չկարողացա։ Իսկ նախարարի կողմից ԱԺ ամբիոնից նոր օրենքով ԲՈԿ-ը փակելու հայտարարությունից հետո աշխատելը դարձավ անիմաստ։ Իմ գաղափարներն այլևս կյանքի կոչել չեմ կարող։ Գրագողերը սպասում են կառույցի փակվելուն։
2. 2019 թվականի օգոստոսին հարցազրույցներից մեկում ասացի, որ եթե Ռ․ Հայրապետյանը հրաժարականի դիմում չգրեր, ապա ես կգնայի։ Իմ խոսքը կոնկրետ Ռուբենի մասին չէր, այլ երևույթի։ Նրանից հետո նշանակված ռեկտորի ժամանակավոր պաշտոնակատարի դոկտորական աշխատանքում առկա են ակնհայտ թարգմանություններ և արտագրություններ, բայց համապատասխան կապերի և հովանավորչության միջոցով նա առ այսօր զբաղեցնում է իր պաշտոնը։ Իր պաշտոնավարումն արժեքային ընտրություն է՝ իմ և իր միջև>>,- ազատման դիմում գրելուց հետո այս գրառումն էլ Ֆեյսբուքում էր տեղադրել:
Այս գրառումից մի քանի օր անց, հայտնի դարձավ, որ ԿԳՄՍ փոխնախարար Գրիշա Թամրազյանը տղայական «ռազբորկայի» է կանչել Սմբատ Գոգյանին, որը համարձակվել էր ՀՊՏՀ ռեկտորի ԺՊ Դիանա Գալոյանի հասցեին «թթու» խոսք ասել։ Թամրազյանը Գալոյանի մտերիմ ընկերն է, Գալոյանը նրա հովանավորչությամբ է հայտնվել ռեկտորի տեղապահի պաշտոնում: Թամրազյանը, ըստ մամուլի, «ատչյոտ» է պահանջել Գոգյանից։
Եւ, ահա, այս հայտարարություններից եւ հանդիպումից հետո ԱԱԾ-ն Թամրազյանին կանչել է հարցաքննության:
«Երեկ և այսօր ես կանչվել եմ ՀՀ ազգային անվտանգության ծառայություն՝ զրույցի»,-խոստովանել է փոխնախարար Գրիշա Թամրազյանը:
Փոխնախարարը չի հայտնել, թե ինչ գործի շրջանակում է հրավիրվել ԱԱԾ։
Հարցին՝ արդյոք դա կապ ունի՞ ԲՈԿ նախագահ Սմբատ Գոգյանի հայտարարության հետ, Թամրազյանը նշել է, որ այս պահին չի ցանկանում մեկնաբանել:
Իրականությունն այն է, որ Թամրազյանն ԱԱԾ է կանչվել Գոգյանի գործով եւ, ըստ նախարարության հավաստի աղբյուրների, նա միակը չէ եւ շղթայական հարցաքննություն է տեղի ունենալու: Իրավապահները կհասնեն անգամ նախարար Արայիկ Հարությունյանին, ում մասին շատերն են կարծում, որ պատահաբար է հայտնվել իր պաշտոնում եւ չի տիրապետում իրավիճակին, ինչի հետեւանքով էլ հավակնոտ փոխնախարարների թուրը աջ ու ձախ կտրում է: Սակայն դա նախարարին չի ազատում պատասխանատվությունից եւ այն, որ Թամրազյանը հովանավորչություն է ստանձնել որոշակի մարդկանց մութ գործերն առաջ մղելու համար, արդեն իսկ նշանակում է, որ Հարությունյանն առնվազն հանցավոր անգործություն է դրսեւորել:
Մի կարեւոր դիտարկում. ԿԳՄՍ նախարարությունում հասունացող այս սկանդալի առանձնահատկությունը թերեւս նրանում է, որ խոսքը հեղափոխականների մասին է, ասել է թե՝ նրանք են հովանավորները, նրանք են կեղծարարները, ի վերջո, նրանք են գրագողերն ու պարտակողները: Չխախտելով անմեղության կանխավարկածը, այդուհանդերձ, այս պատմության մեջ կողմերից մեկը ստում է, կամ ԿԳՄՍ-ում է ամեն ինչ նորմալ, կամ Գոգյանն է ստում: Հետեւաբար առաջիկայում հանրությանը կտեսնի, թե հեղափոխականներից որ մեկն է կանգնելու վարչապետի դատաստանի առջեւ:
Անի Սահակյան
Հետևեք մեզ Viber-ում
