Կվերաբացվեն լողափերը, սակայն կգործեն նոր պայմաններով

Հունաստանում 30 աստիճան տաքության ֆոնին կորոնավիրուսի համավարակի հետևանքով երկու ամիս փակված լողափերն այսօրվանից կվերաբացվեն, սակայն կաշխատեն նոր պայմաններով, հայտնում է «ՌԻԱ Նովոստի» գործակալությունը։

Մայիսի 4-ից երկրում սկսվել է մի շարք սահմանափակումների չեղարկումը, սակայն հանրային լողափերը շարունակում էին փակ մնալ, իսկ ծովում լողալը միայն հունիսի 1-ից էր ծրագրվում թույլատրելի դարձնել։

Այժմ ծրագրերը փոխվել են, քանի որ Հունաստանում 30 աստիճան տաքություն է, իսկ հանգստյան օրերին, կանխատեսումների համաձայն, սպասվում է, որ օդի ջեմաստիճանը կհասնի մինչև +40 աստիճան։

«Որոշակի պայմաններ կլինեն, որոնց իրականացումը կվերահսկվի։ Շատ կարևոր թեստ է սա, որը պետք է հաջողությամբ անցնենք։ Ամբողջ աշխարհը Հունաստանին է նայում, քանի որ մինչ այսօր այն համավարակին օրինակելի վերաբերմունք է ցույց տվել»,- ճեպազրույցի ժամանակ նշել է կառավարության պաշտոնական ներկայացուցիչ Սթելիոս Փեթսասը։