Նիկոլ Փաշինյանը սպասում է Վենետիկի «դաբրոյին»
Արդարադատության նախարար Ռուստամ Բադասյանը նամակ է գրել Վենետիկի հանձնաժողովին` Հայաստանում Սահմանադրական ճգնաժամի շուրջ ելք գտնելու նպատակով:
Այս հարցում Հայաստանի իշխանություններն ակնկալում են Վենետիկի հանձնաժողովի մեթոդական և մասնագիտական աջակցությունը: Մամուլում տևական ժամանակ տեղեկություններ են շրջանառվում, թե իշխանությունը վերջնականապես հրաժարվել է սահմանադրական հանրաքվեի գնալու մտադրությունից, որը կորոնավիրուսի պայմաններում ուղղակի անհնար է: Փոխարենը իշխանությունները քննարկում են Սահմանադրական դատարանի դատավորների լիազորություններն Ազգային ժողովի միջոցով դադարեցնելու տարբերակը։ Թե ինչ է գրված Բադասյանի` Վենետիկ ուղարկված նամակում, պաշտոնապես հայտնի չէ: Սակայն դատելով Ազգային ժողովի արտաքին հարաբերությունների հանձնաժողովի նախագահ Ռուբեն Ռուբինյանի ֆեյսբուքյան գրառումից` իշխանությունը հույս ունի, որ Վենետիկը կաջակցի ՍԴ նախագահին ու անցանկալի դատավորներին հեռացնել առանց հանրաքվեի` Ազգային ժողովի քվեարկությամբ: «Կորոնավիրուսի համաճարակը, ինչպես հայտնի է, արագ չի վերանալու։ Քանի որ մենք բազմիցս հայտարարել ենք, որ հանրային առողջությունը մեզ համար առաջնային է, ակնհայտ է, որ ՍԴ ճգնաժամի լուծմանն ուղղված հանրաքվեն չի կարող կայանալ, քանի դեռ համաճարակը չի վերացել։ Սակայն մյուս կողմից մենք չենք կարող այսքան երկար սպասել և առաջ շարժվել բարեփոխումների և արդարության հաստատման մեր օրակարգով՝ առանց ՍԴ ճգնաժամի հանգուցալուծման։ Հետևաբար, ուզում եմ տեղեկացնել, որ հաշվի առնելով, որ համաճարակը կարող է տևել բավականին երկար, մենք ուղիներ ենք փնտրում ՍԴ ճգնաժամը այլ ճանապարհով և ավելի արագ լուծելու ուղղությամբ։
Հենց այս համատեքստում օրերս արդարադատության նախարար Ռուստամ Բադասյանը հարցեր է ուղղել Վենետիկի հանձնաժողովին։ Այս հարցերը վերաբերում են 2015 թվականի Սահմանադրությամբ նախատեսված, սակայն փաստացի չիրականացված Սահմանադրական դատարանի ձևավորման մոդելը արագ կյանքի կոչելուն, Սահմանադրության փոփոխությունների նախագծի վերաբերյալ Սահմանադրական դատարանի որոշման շրջանակների սահմանմանը, ինչպես նաև նախապես նշանակված և համավարակի պատճառով չանցկացված հանրաքվեն անհրաժեշտության դեպքում չեղարկելու՝ Ազգային ժողովի լիազորությանը։ Այսպիսով, թեև ՍԴ ճգնաժամի հանգուցալուծման հնարավոր այլընտրանքային ուղին իր ծավալով կարող է նույնական չլինել նախնական ուղու հետ, բայց այն, միևնույն է, հանգուցալուծվելու է, և չի բացառվում, որ ավելի արագ և առանց հանրաքվեի»,- գրել է Ռուբինյանը:
Ռուբինյանը ակամայից նաև բացահայտել է, որ արտակարգ դրության երկարաձգման պատճառներից մեկն էլ սահմանադրական հանրաքվեն է եղել: Ամեն դեպքում Ազգային ժողովի քվեարկությունը` ՍԴ ղեկավար կազմին փոխելու առումով, ավելի երաշխավորված տարբերակ է: Հանրաքվեի ելքը, ամեն դեպքում, դժվար կանխատեսելի է: Հիմա, փաստորեն, իշխանությունը ուզում է, կորոնավիրուսի համաճարակն օգտագործելով, համաժողովրդական հանրաքվեն փոխարինել Ազգային ժողովի քվեարկությամբ, բայց քանի որ դա Սահմանադրության կոպտագույն խախտում է ենթադրում, ուզում է նախապես ինքն իրեն ապահովագրել Վենետիկից ստացված գրությամբ:
Իհարկե, շատ կարևոր է նաև, թե կոնկրետ ինչ է հարցրել Հայաստանի իշխանությունը Վենետիկից և հետաքրիր է, թե ինչու Վենետիկ ուղարկված նամակի բովանդակության մասին հստակ տեղեկատվություն չի տրվում: Ժամանակին, երբ շահարկվում էր այն հարցը, թե նախկին սահմանադրության գործողության ժամանակահատվածում նշանակված ՍԴ անդամներն ու ՍԴ նախագահը պետք է ավտոմատ դադարեցնեն իրենց գործունեությունը, Վենետիկի հանձնաժողովը շատ հստակ դիրքորոշում հայտնեց, որ նախկին ՍԴ անդամները միանգամայն օրինական ՍԴ դատավորներ են համարվում և լիազորված են շարունակել իրենց գործունեությունը որպես ՍԴ դատավորներ: Հետաքրիքր է` ինչ մոտեցում է ակնկալում իշխանությունը Վենետիկից և ինչ քայլի է դիմելու, եթե չստանա իր պատկերացրած ցանկալի պատասխանը:
Հայկ Դավթյան
Հետևեք մեզ Viber-ում
