Այլասերում բոլոր ոլորտներում, իշխանությունը հասավ անչափահասներին

Ազգային Ժողովն վավերացրեց աղմկահարույց ԵԽ Լանզարոտեի կոնվենցիան կամ այլ կերպ ասած՝ «Սեռական շահագործումից և սեռական բնույթի բռնություններից երեխաների պաշտպանության մասին» կոնվենցիան,որը հիմք է տալու երեխաների սեռական շահագործումը կանխարգելու քողի տակ ուսումնական ծրագրերում ներդնել սեռական դաստիարակության վերաբերյալ առարկաներ՝ այդ թվում տարրական դասարաններում , որոնք կարող են հակառակ էֆեկտը գործել: Հիշենք «Իմ մարմինն անձնական է» երեխաների համար նախատեսված խայտառակ գիրքը, որն արժանացավ նաեւ սոցապնախարարի դրվատանքին: Կոնվենցիայի ընդունմամբ ՀՀ-ն պարտավորվում է ձեռնարկել օրենսդրական ու այլ փոփոխություններ՝ կյանքի տարբեր ոլորտներում երեխաների հետ շփում ունեցող անձանց հնարավոր ոտնձգություններից երեխաների պաշտպանությունն ու իրավունքների մասին իրազեկումն ապահովելու համար:Կոնվենցիան վավերացրած երկրները պարտավորվում են նաև ապահովել կոնվենցիայի 18-23-րդ հոդվածներով նախատեսված արարքների քրեականացումը: Դրանք են՝ սեռական բնույթի բռնությունը, մանկական մարմնավաճառությունը, մանկական պոռնոգրաֆիան, երեխաների մասնակցությունը պոռնոգրաֆիկ ցուցադրություններին, երեխային սեռական բնույթի գործողություններին դրդելը, երեխայի սեռական այլասերումը և այլն։ Այդուհանդերձ, մասնագետների լայն շրջանակ խնդրահարույց դրույթներ են նաեւ մատնանշում։
Դիցուք հիմք է ստեղծվելու սորոսական քարոզիչների համար անարգել ԼԳԲՏ թեմաներով դասընթացներ անցկացնել դպրոցներում: Կոնվենցիայի ընդունումից հետո արդեն հեշտությամբ կընդունվեն համապատասխան որոշումները և օրենսդրական ակտերը:
Հաջորդ խնդիրը՝ կոնվենցիայով Հայաստանի նորմատիվ իրավական ակտերի համակարգ է ներմուծվելու «սեռական կողմնորոշում» հասկացությունը: ԲՀԿ-ական Գեւորգ Պետրոսյանը մի քանի օր առաջ իր ելույթում առանձնացրեց 6-րդ հոդվածը: «Օրինակ՝ 6-րդ հոդվածը։ Յուրաքանչյուր կողմ ձեռնարկում է անհրաժեշտ օրենսդրական կամ այլ միջոցներ՝ ապահովելու, որ երեխան տարրական և միջնակարգ կրթության ընթացքում ստանա սեռական շահագործման ու սեռական բնույթի բռնությունների հետ կապված վտանգների, ինչպես նաև ինքնապաշտպանության միջոցների մասին տեղեկություններ: Հետո խոսվում է քաղաքացիական հասարակության կողմից իրականացվող ծրագրերի մասին: Ի՞նչ ծրագիր»,- հարցում էր Պետրոսյանը:
Այս կոնվենցիայի վավերացման հարցն ԱԺ է բերվել կորոնավիրուսի տարածման ժամանակ, քննարկվել կիսադատարկ դահլիճում, առանց նախապես հանրային քննարկումներ կամ լսումներ կազմակերպելու: Հակառակ բողոքի եւ կոնվենցիան չվավերացնելու հորդորների, որոնք հնչացրեցին ինչպես խորհրդարանի բակում հավաքված մի խումբ քաղաքացիներ, անպես էլ իրավաբաններն ու Հայ առաքելական եկեղեցին, իշխանությունը այն վավերացնելուն զուգահեռ դիմեց մանիպուլացիայի: Ինչպես հայտն է ՀՀ-ն կոնվենցիան ստորագրել է 2010-ին, բայց մինչ օրս այն չէր ստորագրվել՝ ըստ ամենայնի ելնելով վերը նշված վտանգավոր հետեւանքներից: Բայց ներկայիս իշխանությունները որոշել են, որ հարցը կարելի է էժանագին շահարկումների ենթարկել՝ սլաքները կրկին ուղղելով նախկինների դեմ, թե կոնվենցիայի դեմ բողոքողները հենց նրանք են, այն խմբակը, որն իր ներսում վարչապետի խորհդրական մանկապիղծ ուներ՝ ի դեմս Սերոբ Տեր-Պետրոսյանի: Իհարկե, որեւէ մեկը չի ժխտում նշված անձնավորության այլասերվածության փաստը, բայց ընդամենը վերջերս ԱԺ «Իմ քայլը» խմբակցության երկու պատգամավոր՝ Նիկոլայ Բաղդասարյանը և Հայկ Սարգսյանը, անձնական երաշխավորություն ներկայացրեցին հոլիվուդյան հայազգի կինոպրոդյուսեր , մանկապիղծ Ստեփան Մարտիրոսյանի խափանման միջոցի փոփոխության համար, այդ մասին գրեցին բոլոր լրատվամիջոցները:
Այնպես որ ուրիշի տանը քար նետելուց առաջ լավ կլինի նախ կարգի բերել սեփական ապակե տնակը:

Անի Սահակյան